Ɲaaraŋkanni nivɔnni kani
12
Ɲyɛ mii cìnmpyiibii,
ná Kile sʼa ɲùɲaara ta wuu na,
lire e ke,
mii na li caa yii á,
yii yiye puni kan u á sáraga niɲcɛnŋɛa fiige,
ŋkemu ku ɲyɛ Kile yahare e,
maa ntáan u á ke.
Kile pèeŋkanni niɲcɛnni li ɲyɛ lire.
2 Yii àha raa yii karigii pyi diɲyɛ sùpyire wogigii fiige mɛ,
ŋka yii Kile yaha u a yii kɛ̂ɛnŋi,
u u yákilii nivɔnmii kan yii á.
Lire ká mpyi,
nde li ɲyɛ Kile ɲyii wuuni,
maa ɲwɔ,
maa ntáan ná cyaga ɲyɛ a li fô mɛ,
yii sí lire cè.
3 Kile à ɲwɔ mii na maa sífente ntemu kan mii á ke,
mà tàanna ná tire e,
mii sí yi jwo yii punʼá,
yii àha yiye pêe si ntòro mɛ.
Yii yiye tîrige,
fànhe Kile à kan yii á yii dániyaŋi kurugo ke,
yii a yii karigii pyi yii a ntàanni ná kurʼe.
4 Wuu cyeere na ɲyɛ niŋkin,
ŋka ti yatanɲyʼà ɲyaha,
yi puni ná yi báara sí u ɲyɛ.
5 Lire pyiŋkanni na,
wuu dánafeebilʼà ɲyaha,
ŋka wuu na ɲyɛ cyere niŋkin Kirisita wwoɲɛɛge e.
Wuu punʼà pwɔ pwɔ wuye na.
6 Kile à ɲwɔ wuu na,
maa màkanyi ɲjemu kan wuu á wuu a báare ke,
yirʼà ɲyaha.
Kile tùnnture ɲjwuŋi màkange ɲyɛ ŋgemu á ke,
urufoo u a ti yu u tàanna ná u dániyaŋi i.
7 Dánafeebii ntɛ̀gɛŋi màkangʼà kan ŋgemu á ke,
urufoo u a pi tɛ̀re.
Ŋgemu wogo ku ɲyɛ na kàlaŋi kaan sùpyirʼá ke,
urufoo u a lire pyi.
8 Yɛrɛge màkangʼà kan ŋgemu á ke,
urufoo u a sùpyire yɛrɛge.
Sùpyire ŋkanŋi màkange ɲyɛ ŋgemu á ke,
urufoo u a sùpyire kaan sèlʼe.
Yyahe yyére shingire màkangʼà kan ŋgemu á ke,
urufoo u a ti pyi ná sèlʼe.
Kanhamafeebii ntɛ̀gɛŋi màkangʼà kan ŋgemu á ke,
urufoo u a li pyi ná funntange e.
9 Tàange sèe woge ku pyi yii ná yiye shwɔhɔlʼe,
yii a kapegigii fún,
yii i ŋkwôro yii a kacɛnŋkii pyi.
10 Tàange ku maha mpyi cìnmpyiibii ná piye shwɔhɔlʼe ke,
kuru ku pyi yii shwɔhɔlʼe.
Shin maha shin u a li caa si mpyi shincyiiŋi sí raa pi sanmpii pêre.
11 Yii àha mpyi sàafee mɛ,
yii pyi màbanfee.
Yii a báare Kafooŋi á ná yii zòmpyaagii puni i.
12 Sɔ̀nŋɔre tatahage ku ɲyɛ yii á ke,
yii pyi funntange e kuru kurugo.
Yii funɲyi ɲíŋɛ yyefuge tèni i,
yii yiye waha Kileɲarege na.
13 Yaayi kuuŋi u ɲyɛ yii cìnmpyiibii dánafeebii na ke,
yii yire kan pi á,
yii raa nàmpwuunbii cwôre yii a ɲwɔge yii pyɛnyi i.
14 Mpii pi na yii kyérege ke,
yii a jwó leni pirʼá.
Yii àha pi láŋa mɛ,
yii a jwó leni pi á.
15 Mpii pi ɲyɛ funntange e ke,
yii pyi funntange e ná pire e;
mpii pi na mɛɛ súu ke,
yii a mɛɛ súu ná pire e.
16 Yii yii sɔ̀nŋɔre pyi niŋkin,
yàmpeenɛ kà mpyi yii e mɛ,
yii yiye tîrige,
yii àha yiye yaha yákilifee mɛ.
17 Yii àha kapii fwoo tò ná kapilʼe mɛ,
yii yiye waha yii raa kacɛnŋii pyi sùpyire puni na.
18 Yii fànha le bà yyeɲiŋke si mpyi si ŋkwôro yii ná pi sanmpii shwɔhɔlʼe,
kampyi lire sí n‑jà n‑pyi mɛ.
19 Mii ntàannamacinmpyiibii,
wà ká yii mùmpɛnmɛ pyi,
yii àha yii wuuni ŋkooŋi láha mɛ,
yii li yaha Kile á.
Yii li cè na yʼà sémɛ Kile Jwumpe Semɛŋi i na:
«Mii u sí yii tùbileni kɔ̀rɔ,
mii u sí yii ŋkooŋi wwûb.»
Kafooŋi Kile u à jwo amuni.
20 Yʼà jwo mú na:
«Katege ká mpyi mu zàmpɛnŋi na,
ɲjyì kan u á.
Byage ká mpyi u na,
lwɔhɔ kan u á.
Mu aha lire pyi,
li maha mpyi mu à jwo nàŋkyanhii mu à wwû u ɲùŋke ec.»
21 Ma hà kapegigii mpyiŋi lage yaha ku fànha ta ma na mɛ,
maye waha ma a kacɛnŋkii pyi,
ma a fànha ta kapegigii mpyiŋi na.