Dánafeebilʼà yaa pi piye tîrige fànhʼá
13
Sùpyire punʼà yaa ti tiye tîrige fànhʼá,
ɲaha na yɛ fànha ɲyɛ wani,
ŋkemu kʼà tìŋɛ Kile pàama mɛ,
fànhafeebii pi ɲyɛ ke,
Kile u à pi tìŋɛ.
2 Lire e ke ŋgemu u à cyé fànhafeebii wuyi na ke,
urufolʼà cyé Kile wuyi na mú.
Mpii pi à cyé amuni ke,
pire maha ɲcɛ̀ɛgɛŋi pyi u à nɔ piye na.
3 Mpii pi na kacɛnŋkii pyi ke,
pire ɲyɛ na fyáge fànhe yyaha na mɛ,
mpii pi ɲyɛ pi ɲyɛ na kacɛnŋii pyi mɛ,
pire pi maha fyáge ku yyaha na.
Kampyi mu la ɲyɛ sʼa fyáge ku yyaha na mɛ,
ta kacɛnŋii pyi.
Lire ká mpyi,
mu sí ŋkèe ta.
4 Fànhafeebii na ɲyɛ Kile báarapyii yii tɔ̀ɔnŋi kurugo.
Ná mu ɲyɛ na kacɛnŋii pyi mɛ,
mu sí raa fyáge pi na,
ɲaha na yɛ kàshikwɔnyaage ɲyɛ pi cye e tawage e mɛ.
Kile báaraŋi na pi ɲyɛ sʼa kapegigii pyifeebii kapyiiŋkii ŋkooŋi wwû pi na.
5 Lire e ke sùpyirʼà yaa ti tiye tîrige fànhʼá.
Yyefuge pi maha ntɛ̀gɛ sùpyire na ke,
pi àha li pyi kuru yyaha na kanna mà dɛ,
ŋka pi li pyi,
ɲaha na yɛ li kunʼà tíi.
6 Lire na yii na múnalwɔɔre sârali mú.
Mpii pi maha ti shuu ke,
Kile u à pire yaha uru báaraŋi na,
pi raa u pyi pi a ɲwɔge.
7 Shin maha shin à yaa ná ndemu i ke,
yii lire kan u á.
Shinŋʼá yii à yaa yii a múnalwɔɔre kaan ke,
yii a ti kaan urʼá.
Cùuyʼà yaa yʼa ŋkaan ŋgemu á ke,
yii a yi kaan urʼá.
Shinŋi na yii à yaa yii a fyáge ke,
yii a fyáge uru na.
Shinŋi yii à yaa yii a mpêre ke,
yii a uru pêre.
8 Tàange baare e,
yafyin kà zìi mpyi yii ná yii supyiɲɛɛbii shwɔhɔlʼe mɛ.
Ŋgemu u à sùpyire sannte kyaa táan uyʼá ke,
urufoo na Kile Saliyaŋi kurigii puni ɲáare.
9 Yii li cè na ɲje yʼà jwo Kile Saliyaŋi i na:
«Ma hà zínni ná wabɛrɛ cwo e mɛ,
ma hà sùpya bò mɛ,
ma hà nàŋkaaga pyi mɛ,
ma hà ma supyiɲɛɛŋi cyeyaage ɲyipɛɛn pyi mɛa» ke,
yire ná Saliyaŋi kapyaagii sanŋkilʼà lwɔ́ a pwɔ nde kabilini na:
«Ma shinɲɛɛŋi kyaa táan mayʼá ma yabiliŋi fiigeb.»
10 Tàange ká mpyi ŋgemu i ke,
urufoo ɲyɛ na kawaa pyi u shinɲɛɛŋi na mɛ.
Ɲyɛ mu aha sùpyire sannte kyaa táan mayʼá,
mu à Kile Saliyaŋi kurigii puni ɲaara.
Wuu bégele, wuu a wuu Kafooŋi cannuruge sigili
11 Yii mpe lógʼa tara,
tèni i wuu ɲyɛ numɛ ke,
yii à lire cè.
Tènʼà nɔ wuu ɲɛ̀ a yîri ŋɔɔmpe na,
ɲaha na yɛ tèni i wuu à jyè Kile kuni i ke,
wuu à zhwoŋi byanhara numɛ mà tòro lire tèni na.
12 Numpilagʼà nɔ cyage e,
ɲyɛge na ŋko raa múru.
Lire e ke wuu numpire karigii ɲwɔ yaha,
wuu bɛ̀ɛnmpe kàshikwɔnyaayi le wuye na.
13 Wuu a ɲaare ntìiŋi i,
bà sùpyaŋi maha ɲaare canŋke e mɛ.
Wuu láha ɲjyìntoroŋi ná sinmbyaani ná jacwɔɔre ná silegebaare ná yukwɔɔnni ná yiɲcyɛge na.
14 Yii Kafooŋi Yesu Kirisita pyiŋkanni lwɔ́ yii karigii puni i,
yii àha raa yii cyeere ɲyii karigii pyi mɛ.