Ɔrɔmu Shiinbii 11

Kile ɲyɛ a cyé Izirayɛli shiinbii na mɛ

Ɲyɛ yibige wà sí n‑jà n‑pyi ke, kuru ku ɲyɛ: «Lire e ke Kile à u shiinbii, shiinbii cyé bɛ?» Mà byanhara bá la! Ɲaha na yɛ mii yabiliŋi na ɲyɛ Izirayɛli shin, maa mpyi tùluge shin, mà fworo Bɛnzhama bage e. 2 Sùpyire Kile à cwɔɔnrɔ mà lwɔ́ fo ku tasiige e ke, u ɲyɛ a pi cyé mɛ. Ɲje Kile tùnntunŋi à jwo Kile á Izirayɛli shiinbii kyaa na ke, Kile Jwumpe Semɛŋi à ɲjemu jwo mà yyaha tíi ná yire e ke, yii ɲyɛ a yire cè mà? 3 U à jwo: «Kafooŋi, pi à mu tùnntunmpii bò, maa mu sárayi tawwuyi jya. Mii kanni u à kwôro, pi la na ɲyɛ si mii mú bò.» 4 Ŋka di Kile à u ɲwɔ shwɔ a jwo yɛ? U à jwo: «Mii à shiin kampwɔhii baashuunni (7.000) bégelʼa yaha naye mɛɛ na, pire wà ɲyɛ a u niŋkure sín Baali taan mɛ.» 5 Lire pyiŋkanni na mú, niɲjaa Izirayɛli shiinbii paanra na ɲyɛ wani, Kile à ɲwɔ pire na, maa pi cwɔɔnrɔ. 6 Ná u sʼà ɲwɔ pi na maa pi cwɔɔnrɔ, pi kapyiiŋkii bà cyi à lire pyi lʼà pyi mɛ. Kampyi pi kapyiiŋkii fyè u mpyi u wi, li mpyi na sí n‑pyi mu à jwo fwotonɔ na Kile ɲyɛ, ná lire bà mɛ, u ɲyɛ a ɲwɔ pi na mɛ.

7 Ɲyɛ ɲje mii sí n‑jwo ke, yire yi ɲyɛ: nde Izirayɛli shiinbii mpyi na ɲcaa ke, pi ɲyɛ a lire ta mɛ. Mpii Kile à cwɔɔnrɔ ke, pire pi à lire ta. Pi sanmpilʼà pi niŋgyigigii waha. 8 Yire yʼà jwo Kile Jwumpe Semɛŋi i na:

«Kile à pi yákilibii tò,

maa pi ɲyiigii pyi cyi ɲyɛ na ɲaa mɛ,

maa pi niŋgyigigii pyi cyi ɲyɛ na núru mɛ,

fo mà pa nɔ niɲjaa na.»

9 Saanŋi Dawuda mú à jwo:

«Ɲjyìŋi pi à wwɔ̀ a lyî ke,

Kile à uru pyi pi á kànhaŋa kʼa pi cwôre,

maa u pyi pi á kaɲuŋɔ sí raa pi cyáan,

lire si mpyi pi kapyiini sàraŋi.

10 Na pi ɲyiigii cyi wwɔ̀, pi àha raa ɲaa mɛ,

pi tùbuubii pi kûrʼa yaha tèrigii puni i.»

Izirayɛli shiinbii nùmpanŋke kani

11 Ɲyɛ yibige wà sí n‑jà n‑pyi ke, kuru ku ɲyɛ: «Taha shiinbii sí n‑kwôro pi taburuguɲcwoge e?» Mà byanhara bá la! Pi ɲcwuŋʼà pyi kaɲuŋɔ, ka si nùmpanŋa ta. Lirʼà pyi bà yiɲcyɛge si mpyi si jyè Izirayɛli shiinbilʼe mɛ. 12 Ɲyɛ Izirayɛli shiinbii ŋgurugoŋi ká mpyi kaɲuŋɔ mà kacɛnŋii nimbwɔhii pyi ɲìŋke na, ka pi ɲcwuŋi si mpyi kaɲuŋɔ mà supyishiŋi sanŋi pyi u à tɔ̀ɔn nimbwo ta, lire e ke pi puni ká núrʼa pa Kile á tèni ndemu i ke, nàkaana baa, là sí n‑bâra kacɛnŋkii ɲyahaŋi na. 13 Yii pi ɲyɛ supyishiŋi sanŋi wuubii Yahutuubii shwɔhɔlʼe ke, ná yii e mii ɲyɛ na yu. Mii na ɲyɛ Yesu tùnntunŋɔ ŋgemu u à tun supyishiŋi sanŋʼá ke. Mii à uru báaraŋi cû ná na cyeyi shuunniŋi i, 14 bà yiɲcyɛge si mpyi si mpêe mii cìnmpyiibii Izirayɛli shiinbilʼe, lire si pi pìi pyi pi shwɔ mɛ. 15 Kampyi Kile à pi yaha ŋkere na ke, lirʼà pyi kaɲuŋɔ mà Kile ná diɲyɛ sùpyire shwɔ̀hɔŋi yaa, Kile ká núrʼa pi bâra uye na tèni ndemu i ke, karigii niɲcɛnŋkii cyi sí n‑pyi ke, yii sɔ̂nŋɔ cyire na kɛ. Li sí n‑pyi mu à jwo mpii pi mpyi a kwû ke, pirʼà núrʼa ɲɛ̀.

16 Sùmaŋi niɲcyiiŋi u à nɔ pi à kwɔ̀n ke, uru ká yaha Kile mɛɛ na, u mbyìmpe ká ntɛ̀gʼa bwúuru yaa, uru mú na ɲyɛ Kile wu. Cige ndìre ká yaha Kile mɛɛ na, ku ŋkéɲyi mú maha mpyi u wuyo. 17 Izirayɛli shiinbii na ɲyɛ mu à jwo olivye cige, ŋkemu kʼà cɛnmɛ kɛrɛge e ke, yii supyishiŋi sanŋi sí ɲyɛ mu à jwo ɲyɛge funŋɔ woge. Pi à kɛrɛge woge ŋkéɲyi yà kwɔ̀n, maa ɲyɛge funŋɔ woge ŋkéɲyi yà kwɔ̀n a pwɔ yire takwɔnyi i, bà yii si mpyi si ku tunmpe pà ta mɛ. 18 Lire e ke ma hà raa ŋkéɲyi niŋkwɔnɲyi fwɔ́hɔre si maye pêe mɛ. Mu aha maye pêe, li cè na mu bà u à ndìre yyéeŋɛ mɛ, ŋka ndìre tʼà mu yyéeŋɛ. 19 Mu sí n‑jà n‑jwo na yire ŋkéɲyʼà kwɔ̀n, si mu pwɔ yi takwɔnyi i. 20 Sèe mu à jwo. Yi dánabaare kurugo yʼà kwɔ̀n, maa mu pwɔ yi takwɔnyi i mu dániyaŋi kurugo. Ŋka ma hà maye pêe ná lire e mɛ! Fyá Kile na! 21 Kile ká mpyi u ɲyɛ a ɲùɲaara ta cige yabiliŋi ŋkéɲyi na mɛ, mu ɲyɛ a cè na u sí n‑jà mu mú pyi amuni mà? 22 Kile kacɛnni ná u kawaani nimpyiini wíi kɛ! Mpii pi à cwo ke, u à kawaa pyi pire na, maa kacɛnnɛ pyi mu na. Maye waha maa ŋkwôro puru ticɛnmpe e dɛ, lire baare e mu mú sí n‑kwɔ̀n. 23 Izirayɛli shiinbii mú ká fworo pi dánabaare e, Kile sí núru pi pwɔ pi talyɛge e, ɲaha na yɛ sí na ɲyɛ Kile na mà pi pwɔ sahaŋki. 24 Mu u à kwɔ̀n ɲyɛge olivye cige na mà pa mpwɔ kɛrɛge olivye cige ŋkéɲyi takwɔnge e mà ta yii ɲyɛ niŋkin mɛ, mu ɲyɛ a cè a jwo na yire pwɔhɔmɔ sí n‑táan yi ɲùŋke na mà tòro mu taan mà?

25 Mii cìnmpyiibii, kani lʼà ŋwɔhɔ ke, mii la ɲyɛ yii i lire cè, bà li si mpyi, yii pi ɲyɛ supyishiŋi sanŋi shiinbii ke, yii àha ŋkwɔ̀ yiye pyi yákilifee mɛ. Supyishiŋi sanŋi shiinbii pi sí n‑shwɔ ke, Izirayɛli shiinbii pìi sí pi niŋgyigigii waha fo sà yaa ná pire e pi à fûnŋɔ. 26 Lire ká mpyi, Izirayɛli puni sí n‑shwɔ bà yʼà sémɛ Kile Jwumpe Semɛŋi i na:

«Shwofooŋi sí n‑yîri kànhe e,

U sí n‑pa Yakuba tùluge shiinbii pyi pi pi toroŋkanni kɛ̂ɛnŋɛ, pi raa fyáge Kile na.»

27 Yire Kile mpyi a jwo u Jwumpe Semɛŋi i na: «Tunmbyaare mii sí n‑le ná pi e ke, tire ti ɲyɛ nte: mii sí pi kapegigii yàfa pi na.»

28 Jwumpe Nintanmpe kàmpanŋke na, pi à cyé puru na ke, pi à pyi Kile zàmpɛnmii, ka lire si yii pyi yii à tɔ̀ɔn ta. Kile pi ɲcwɔɔnrɔŋi kàmpanŋke na, pi kyaa saha à táan u á pi tulyeyi kurugo. 29 Ɲaha na yɛ Kile ká yaage ŋkemu kan ke, u saha ɲyɛ na kuru shuu mɛ, u à ŋgemu yyere ke, u ɲyɛ na urufoo cyíge sahaŋki mɛ. 30 Tèni lʼe, yii ɲyɛ a mpyi a Kile ɲwɔmɛɛni cû mɛ, ŋka numɛ, Izirayɛli shiinbilʼà cyé Kile na ke, lirʼà Kile pyi u à ɲùɲaara ta yii na. 31 Lire pyiŋkanni ninuuni na, Izirayɛli shiinbilʼà Kile ɲwɔmɛɛni yaha, bà li si mpyi, Kile à ɲùɲaara ta yii na pyiŋkanni ndemu na ke, u u ɲùɲaara ta pi na numɛ mú. 32 Yii li cè na Kile à sùpyire puni yaha ti ɲwɔmɛɛ yahare e, si ŋkwɔ̀ mpa ɲùɲaara ta ti puni na.

Kile yákilifente kani

33 Ei! Tɛgɛlɛ ɲyɛ Kile nàfuufente ná u yákilifente ná u ɲcèŋi na mɛ!

Karigii u à bégelʼa yaha ke, wà sì n‑jà cyire yyaha cè mɛ.

Wà ɲyɛ a u kurigii cè mɛ.

34 Yʼà sémɛ Kile Jwumpe Semɛŋi i na:

«Jofoo u à Kafooŋi Kile sɔ̀nŋɔre cè yɛ?

Jofoo u ɲyɛ u yɛrɛfooŋi yɛ?

35 Jofoo u à fyânha a yaaga fwoo le u na,

u u mpa urufoo fwooni tò yɛ?»

36 Yii li cè na yaayi punʼà fworo Kile e,

maa mpyi u mɛɛ na,

maa mpyi u wuyo.

Pèente ti taha u na fo tèekwombaa.

Amiina.