Pyiŋkanni na Kile à Ibirayima pyi na u à tíi ke
4
Ɲyɛ Ibirayima u mpyi wuu Yahutuubii tùluge sìifooŋi ke,
ɲaha wuu sí n‑jwo uru kyaa na yɛ?
2 Kampyi yi mpyi a jwo na Ibirayima à tíi u kapyiiŋkii kurugo,
u mpyi na sí n‑jà uye pêe,
ŋka ná yire sí bà yʼà jwo mɛ,
u sì n‑jà uye pêe Kile yyahe taan mɛ.
3 Yii li cè na yʼà jwo Kile Jwumpe Semɛŋi i na:
«Ibirayima à dá Kile na,
u dániyaŋi kurugo,
Kile à jwo na u à tíia.»
4 Shin ká báara pyi,
u sàraŋʼà yaa u kan u á.
Uru sàraŋi ɲyɛ a kan mana mɛ,
ŋka u ná urʼà yaa.
5 Shinŋi u ɲyɛ u ɲyɛ a u sɔ̀nŋɔre taha u katiigii nimpyiiŋkii na mɛ,
maa dá li na na Kile maha kapegigii pyifeebii kapegigii yàfani pi na ke,
Kile maha urufoo le shintiibilʼe u dániyaŋi kurugo.
6 Lire pyiŋkanni na,
sùpyaŋi Kile à pyi u à tíi mà ta u kapyiiŋkii fye bà mɛ,
saanŋi Dawuda mú à mɛɛ cêe urufoo wuuni ɲwɔŋi kyaa na:
7 «Mpiimu u ntiimbaa karii cyi à yàfa pi na,
ka toro si ntaha pi kapegigii na ke,
pire wuunʼà ɲwɔ.
8 Kafooŋi Kile ɲyɛ a shinŋi ŋgemu cû a tàanna ná u kapegigilʼe mɛ,
urufoo wuunʼà ɲwɔb.»
9 Ɲyɛ mpii pi à kwɔ̀n ke,
pire kanni wuuni lʼà ɲwɔ laa,
niŋkwɔnmbaabii wuuni mú à ɲwɔ?
Wuu à yi jwo a kwɔ̀ na:
«Ibirayima à dá Kile na,
u dániyaŋi kurugo,
Kile à jwo na u à tíi».
10 Tèni i Kile à u cè shintiiwe ke,
u mpyi a kwɔ̀n laa,
u mpyi na sàha ŋkwɔ̀n mɛ?
U niŋkwɔnŋi bà mɛ,
ŋka u niŋkwɔnmbaaŋi.
11 Lire kàntugo ka u u ŋkwɔ̀nŋi fyèŋi ta,
ŋgemu u à li cyêe na Kile mpyi a u cè shintiiwe u dániyaŋi kurugo mà u ta kwɔ̀nmbaa ke.
Lire pyiŋkanni na,
mpii pi ɲyɛ pi ɲyɛ a kwɔ̀n mɛ,
ŋka pi à dá Kile na,
ka Kile si jwo na pi à tíi ke,
Ibirayima à pyi pire puni tuŋi dániyaŋi kuni i,
ali pi mɛ́ɛ nta pi ɲyɛ a kwɔ̀n mɛ.
Kile à pire cè shintiilii.
12 Mpii pi à kwɔ̀n ke,
Ibirayima mú u ɲyɛ pire tuŋi.
Mpii pi ɲyɛ pi ɲyɛ a kwɔ̀n cyeere e kanna mɛ,
ŋka pi na dániyaŋi kuni ɲaare wuu tuŋi Ibirayima fiige ke,
pire kyaa mii ɲyɛ na yu.
Urʼà dá Kile na mà ta u sàha ŋkwɔ̀n mɛ.
13 Ɲwɔmɛɛni Kile à lwɔ́ Ibirayima ná u tùlugʼá na pi sí diɲyɛŋi ta kɔɔgɔ ke,
li ɲyɛ a lwɔ́ mà li ɲùŋke pyi na Ibirayima na Saliyaŋi kurigii ɲaare mɛ,
u à dá Kile na ka Kile si jwo u à tíi ke,
lire kurugo lʼà lwɔ́.
14 Lire ɲwɔmɛɛni nʼa mpyi a lwɔ́ a pwɔ Saliyaŋi kurigii ɲaaraŋi na,
dániyaŋi kaɲwɔɔ mpyi na sì n‑pyi mɛ,
Kile ɲwɔmɛɛni mpyi na sì n‑pyi laage e mú mɛ.
15 Yii li cè na Kile lùyirini ɲùŋke ku ɲyɛ Saliyaŋi,
ŋka ná Saliya ɲyɛ mɛ,
wà mpyi na sì u kafuun pyi mɛ.
16 Lire pyiŋkanni na,
yaayi ɲwɔmɛɛni Kile à lwɔ́ ke,
dániyaŋi kurugo lʼà lwɔ́,
bà yi si mpyi sʼa ntaa mana mɛ.
Wuu pi ɲyɛ Ibirayima tùluge shiinbii ke,
wuu à tɛ̀ɛn ná lʼe,
wuu sí yire ta dániyaŋi cye kurugo,
ali wuu mɛ́ɛ ká mpyi wuu ɲyɛ na Yahutuubii làda karigii pyi mɛ.
Mpii pi à dá Kile na Ibirayima fiige ke,
pire puni mú sí yire ta.
Uru u ɲyɛ wuu puni tuŋi Kile kuni i.
17 Amuni yʼà sémɛ Kile Jwumpe Semɛŋi i na:
«Mii à mu pyi supyishi niɲyahawa tuc.»
Kile u maha kwùubii ɲɛ̀ni,
yaayi yi ɲyɛ yi mpyi mɛ,
maa yire dá ke,
uru u à mpe jwo.
Ibirayima à dá Kile na maa mpyi wuu tuŋi Kile yyahe taan.
18 Sɔ̀nŋɔrɔ mpyi na sì n‑jà n‑taha kani ndemu na mɛ,
Ibirayima à dá maa u sɔ̀nŋɔre taha lire na.
Lire e u à pa mpyi supyishi niɲyahawa tu bà yʼà jwo Kile Jwumpe Semɛŋi i mɛ na:
«Mu tùluge shiinbii sí ɲyaha wɔrigii fiiged.»
19 Ibirayima mpyi a byanhara yyee ŋkuu (100) na mà kwɔ̀.
Ali mà u yaha u u sɔ̂nŋi na urʼà lyɛ pyìtaa na,
u cwoŋi Sara sí ɲyɛ cijiriŋɛ,
u ɲyɛ a u sɔ̀nŋɔre láha Kile na mɛ.
20 Ɲwɔmɛɛni Kile à lwɔ́ ke,
u sɔ̀nŋɔre ɲyɛ a láha lire na mà ɲya mɛ.
Lire bá mpyi a u pyi u à dá Kile na sèlʼe,
maa u pêre.
21 Ibirayima mpyi a sàa dá li na na ɲwɔmɛɛni Kile à lwɔ́ ke,
u sí n‑jà li fûnŋɔ.
22 Lire e u dániyaŋi kurugo,
Kile à jwo na u à tíi.
23 «Kile à jwo na u à tíi» puru jwumpe ɲyɛ a sémɛ uru kanni kurugo mɛ.
24 Kile u à wuu Kafooŋi Yesu ɲɛ̀ a yige kwùŋi i ke,
wuu mpiimu pi à dá uru na ke,
pʼà sémɛ wuu kurugo mú,
ɲaha kurugo yɛ wuu mú sí n‑pyi na wuu à tíi.
25 Kile à u kan kwùŋʼá wuu kapegigii kurugo,
maa u ɲɛ̀ a yige u e,
bà wuu si mpyi si ntíi uru yyahe taan mɛ.