Wuu ná Kile shwɔ̀hɔŋʼà yaa
5
Lire pyiŋkanni na,
wuu à pyi shintiilii Kile yyahe taan,
wuu dániyaŋi kurugo,
lire e wuu ɲyɛ yyeɲiŋke e ná Kile e numɛ,
wuu Kafooŋi Yesu Kirisita cye kurugo.
2 Yesu baragʼe,
wuu dániyaŋi kurugo,
wuu à Kile ticɛnmpe cè,
maa pu taa numɛ canŋa maha canŋa.
Wuu funɲyʼà sàa táan,
ɲaha na yɛ wuu à dá li na na Kile sí wuu pyi shinbwoo uye yyére.
3 Mà bâra lire na,
wuu à kwôro funntange e yyefuge tèni i,
ɲaha na yɛ wuu à li cè na yyefuge maha ma ná mayezhiiliŋi i.
4 Mayezhiiliŋi maha ma ná sítaare e zòzhwɔɔre na.
Síŋi ká nta,
sɔ̀nŋɔre tatahage mú maha nta.
5 Tire sɔ̀nŋɔre tatahage sì wuu ɲwɔhɔ yaha mɛ,
ɲaha na yɛ Kile à wuu zòmpyaagii ɲî u tàange na u Munaani cye kurugo,
u à lire ndemu kan wuu á ke.
6 Mà wuu yaha wuu fànhaɲcyɛrɛre e,
Kile ɲyii tènʼà nɔ ke,
ka Kirisita si ŋkwû maa wuu nimpiibii shwɔ.
7 Shinŋi u à tíi ke,
li sí n‑waha sùpya u ɲɛɛ si ŋkwû uru kurugo;
ŋka shinŋi u ɲyɛ na ŋkanŋi pyi sèlʼe ke,
wà bá kú n‑jà ɲùŋɔ waha si ɲɛɛ ŋkwû uru kurugo.
8 Ŋka Kile à li cyêe wuu na na urʼà sàa wuu kyaa táan uyʼá.
Mà wuu yaha kapegigii mpyiŋi i sahaŋki,
Kirisita à kwû wuu kurugo.
9 U à u sìshange wu mà pyi sáraga maa wuu pyi shintiilii numɛ Kile yyahe taan.
Ná lire sʼà pyi,
wuu à sàa tɛ̀ɛn ná lʼe na Yesu Kirisita sí wuu shwɔ Kile lùyirini na.
10 Mà wuu yaha Kile zàmpɛnmii,
Kile à wuu ná uru shwɔ̀hɔŋi yaa u Jyaŋi ŋkwùŋi cye kurugo.
Mà wuu ná u shwɔ̀hɔŋi yaha u à yaa,
nàkaana baa,
wuu sí n‑shwɔ u Jyaŋi ɲɛ̀ŋi cye kurugo.
11 Lire kanni bà mɛ,
wuu funntanga wuu pi ɲyɛ Kile wwoɲɛɛge e wuu Kafooŋi Yesu Kirisita cye kurugo,
uru u à wuu ná Kile pyi wuu à wwɔ̀.
Kapegigii sìiŋkanni ná cyi láhaŋkanni
12 Kapegigilʼà jyè diɲyɛŋi i shin niŋkin cye kurugo,
uru u ɲyɛ Adama,
ka kapegigii si mpa ná kwùŋi i.
Lire pyiŋkanni na,
kwùŋʼà nɔ sùpyire puni na,
ɲaha na yɛ pi punʼà kapegigii pyi.
13-14 Yii li cè,
mà lwɔ́ Adama tèni na mà pa nɔ Kile tùnntunŋi Musa wuuni na,
sùpyire mú mpyi na kapegigii pyi.
Lire tèni i,
Kile mpyi na sì n‑jà yoge kwɔ̀n pi na na pi à Musa Saliyaŋi kuni yaha mɛ,
ɲaha na yɛ uru Saliyaŋi mpyi na sàha ŋkwɔ̀ à kan pi á mɛ.
Pi mú ɲyɛ a mpyi a Adama kapiini nimpyiini shi pyi mɛ.
Lire ná li wuuni mú i,
pi mpyi maha ŋkwûu.
Ɲyɛ nde Adama mpyi a pyi ke,
lire mpyi a kyaa nɔ sùpyire na.
Amuni li mú ɲyɛ,
Yesu Kirisita u mpyi na sí n‑pa ke,
nde urʼà pa mpyi ke,
lirʼà kyaa nɔ sùpyire na.
15 Ŋka Kile à kani ndemu pyi mana ke,
lire tayyérege ná Adama kapiini nimpyiini woge ɲyɛ sumara mɛ.
Shin niŋkin kapii ká mpyi kaɲuŋɔ mà kwùŋi nɔ shinɲyahara na,
yii li cè na kacɛnni Kile à sàa pyi shinɲyahara á shin niŋkin cye kurugo,
ná uru u ɲyɛ Yesu Kirisita ke,
lire sì n‑jà n‑jwo si nɔ li tɛgɛni na mɛ.
16 Mà bâra lire na,
Kile kacɛnni tayyérege ná shin niŋkinŋi kapiini tayyérege ɲyɛ niŋkin mɛ,
ɲaha na yɛ shin niŋkin kapii kurugo,
Kile à sùpyire puni cɛ̂ɛgɛ.
Ŋka kapegii niɲyahagii pyiŋkwooni kàntugo,
Kile kacɛnni nimpyiini kurugo,
pi sí n‑jà n‑tíi Kile yyahe taan.
17 Shin niŋkin kanna u à kapiini pyi,
ka lire si sùpyire pyi ti i ŋkwûu.
Ná lire sʼà pyi,
nàkaana baa,
shin niŋkin cye kurugo mú,
mpiimu ká ɲɛɛ Kile ticɛnmpe na,
ka u u pi pyi na pi à tíi ke,
pire sí sí ta,
mà lwɔ́ numɛ na,
fo tèekwombaa.
Uru shinŋi niŋkinŋi u ɲyɛ Yesu Kirisita.
18 Ɲyɛ shin niŋkin kapii kurugo,
Kile à sùpyire puni cɛ̂ɛgɛ,
lire pyiŋkanni na mú,
shin niŋkin kacɛnnɛ kurugo,
sùpyire punʼà pyi shintiilii maa shìŋi niŋkwombaaŋi ta.
19 Shin niŋkin Kile ɲwɔmɛɛyahani kurugo,
shinɲyahara à pyi kapimpyimii.
Lire pyiŋkanni na mú,
shin niŋkin Kile ɲwɔmɛɛcunte kurugo,
shinɲyahara sí n‑pyi shinztiilii Kile yyahe taan.
20 Kile à Saliyaŋi kan,
bà sùpyire si mpyi si ɲcè na pirʼà kapegii niɲyahagii pyi mɛ.
Ŋka cyage e kapegigilʼà ɲyaha ke,
Kile kacɛnŋkii maha núrʼa ɲyaha sèlʼe cyi na.
21 Tèni lʼe,
sùpyire mpyi na sì n‑jà n‑pyi ná ti ɲyɛ na kapegigii pyi mɛ;
lire na kwùŋʼà nɔ ti na.
Ŋka Kile à ɲwɔ wuu na maa jwo na wuu à tíi,
lire e,
wuu Kafooŋi Yesu Kirisita cye kurugo,
wuu sí shìŋi niŋkwombaaŋi ta.