Sùpyaŋi wà tufiige ɲyɛ à tíi mɛ
3
Ɲyɛ lʼaha nta amuni,
ɲaha kʼà Yahutuŋi wwû supyishiŋi sanŋi i yɛ?
Kaɲwɔɔ na ɲyɛ ŋkwɔ̀nŋi na bɛ?
2 Kaɲwɔɔ nimbwoo na ɲyɛ u na kàmpanɲyi puni na!
Yahutuubilʼá Kile à fyânha a u Jwumpe kan.
3 Ɲyɛ ná Yahutuubii pìi sí ɲyɛ a pyi ɲwɔmɛɛ niŋkinfee mɛ,
lire sí Kile pyi u yîri u ɲwɔmɛɛni ɲuŋʼi la?
4 Sèeŋi na,
lire sì n‑pyi mɛ.
Wuu à yaa wuu li cè na Kile na sèeŋi yu,
sùpyire puni sí ɲyɛ kafinivinimii bà yʼà sémɛ Kile Jwumpe Semɛŋi i mɛ,
na:
«Kile,
sùpyirʼà yaa ti li cè na mu jwumpʼà tíi.
Pi aha mu cɛ̂ɛgɛ,
mu à yaa mu u ta tàngafooa.»
5 Ŋka kapegigii wuu ɲyɛ na mpyi ke,
cyire ká li cyêe na Kile à tíi,
ɲaha saha yɛ?
Kile lùuni ká yîri wuu taan,
tá wuu à yaa wuu jwo na u ɲyɛ a tíi mɛ?
(Naha mii na yu funŋɔ baa shin fiige.)
6 Kaɲɛɛ bà mɛ!
Kampyi Kile mpyi a tíi mɛ,
di u mpyi na sí diɲyɛŋi sùpyire kapegigii fwooni tò pi na n‑jwo yɛ?
7 Ɲyɛ pìi mú sí n‑jà n‑jwo:
«Mii kafinare cye kurugo,
Kile sèeŋi ká fworʼa yyére u pèente kurugo,
lire e,
ta mii saha à yaa mii i ɲcû mu à jwo kapimpyiŋɛ?»
8 Ɲyɛ pìi ká a puru yu,
ɲaha na wuu àha n‑jwo na:
«Wuu à kapegigii pyi,
kacɛnŋkii si nta a fworo cyi e mà yɛ»?
Pìi na mii cɛ̂ɛge na mii à yire jwo.
Pire sì n‑sìi n‑shwɔ Kile yoge na mɛ.
9 Di yi ɲyɛ yɛ?
Wuu Yahutuubilʼà pwɔ́rɔ sùpyire sannte na la?
Mà byanhara bá la!
Mii à fyânha a li cyêe,
Yahutuubii bâra supyishiŋi sanŋi na,
pi puni na ɲyɛ kapegigii tugure ɲwɔhʼi,
10 bà yʼà sémɛ Kile Jwumpe Semɛŋi i na:
«Sùpyaŋi wà tufiige ɲyɛ a tíi mɛ,
ali shin niŋkin!
11 Wà ɲyɛ a sìi yákilifoo mɛ,
wà ɲyɛ na Kile caa mɛ!
12 Pi punʼà kuni niɲcɛnni yaha,
pi punʼà pyi kaɲwɔɔ baa.
Wà ɲyɛ na kacɛnnɛ pyi mɛ,
ali shin niŋkinb!
13 Pi ŋkɔ̀ɔnyi na ɲyɛ mu à jwo fanmugoɲahaga.
Pi maha pi ɲjirigii tɛ̀gɛ na pi sanmpii wurugec.
Pi ɲwɔshɛɛnrʼà pi mu à jwo màcwɔn shɔnrɔd.
14 Laŋaŋke jwumpe ná jwumpimpe kanni pu maha fwore pi ɲwɔyi ie.
15 Pi supyibo tonʼà wyɛ̀rɛ.
16 Pi maha ŋkɛ̀ɛgɛŋi ná yyefuge yare pi tatoroyi puni i.
17 Pi ɲyɛ a yyeɲiŋke kuni cè mɛf.
18 Pi ɲyɛ a sìi na fyáge Kile na mɛg.»
19 Ɲyɛ yire yʼà sémɛ Kile Jwumpe Semɛŋi i Saliyaŋi kyaa na.
Wuu sʼà cè na wuu Yahutuubilʼá yʼà sémʼa kan,
bà li si mpyi sùpya kà tànga ta mɛ,
sùpyire puni si ɲcɛ̂ɛgɛ Kile yyahe taan.
20 Lire kurugo Kile yyahe taan,
sùpyaŋi wà tufiige sì n‑jà n‑tíi Saliyaŋi kurigii ɲaaraŋi cye kurugo mɛ.
Nde kanni Saliyaŋi maha jà a pyi ke,
lire li ɲyɛ,
u maha sùpyaŋi pyi u à kapiini cè.
Sùpyaŋi ká dá Kile na, Kile maha jwo na u à tíi
21 Ŋka numɛ,
pyiŋkanni na wuu si n‑jà n‑tíi Kile yyahe taan ke,
Kile à lire cyêe wuu na.
Lire ɲyɛ a lwɔ́ a pwɔ Saliyaŋi kurigii ɲaaraŋi na mɛ.
Yire Kile tùnntunŋi Musa ná Kile tùnntunmpii sanmpilʼà jwo.
22 Kile maha sùpyire pyi shintiilii dániyaŋi cye kurugo Yesu Kirisita na,
wà ɲyɛ a wwû wʼe mɛ.
23 Sùpyire punʼà kapegigii pyi,
lire lʼà pi nàzhan yige Kile sìnampe e.
24 Ŋka Kile à ɲwɔ pi na maa pi pyi pi à tíi mana,
Yesu Kirisita à pi ɲùŋɔ wwû pi kapegigilʼe ke,
lire cye kurugo.
25-26 Kile à Yesu yaha a pa,
pi i u kwòro cige na,
bà u si mpyi si Kile lùuni tìŋɛ,
si wuu kapegigii yàfa wuu na,
u sìshange ŋguŋi cye kurugo mɛ.
Mà ta lire sàha mpyi mɛ,
Kile lùtaanni kurugo,
u ɲyɛ a mpyi a sùpyire cû a tàanna ná ti kapyiiŋkilʼe mɛ.
Numɛ,
Yesu à pa,
mpii pi à dá u na ke,
ali mà ta pi à kapegigii pyi,
Kile à jwo na pi à tíi.
Lire Kile à pyi ke,
ntiimbaa bà mɛ,
ɲaha na yɛ Yesu à pi kapegigii tugure lwɔ́.
27 Ɲyɛ tá tànga saha na ɲyɛ wà a u uye pêe?
Ɔnhɔ!
Ɲaha kurugo yɛ nde li ɲyɛ na wíi ke,
Saliyaŋi kurigii ɲaaraŋi bà mɛ,
ŋka dániyaŋi.
28 Sèe wi,
wuu à li cè na sùpyire ntìiŋi na ntaa dániyaŋi cye kurugo,
ŋka Musa Saliyaŋi kurigii ɲaaraŋi i bà mɛ.
29 Taha Yahutuubii kanni wu u ɲyɛ Kile?
Supyishiŋi sanŋi wu mú bàlʼà?
Ɔɔn kɛ!
Supyishiŋi sanŋi wu wi mú dɛ!
30 Ɲaha kurugo yɛ Kile niŋkin u ɲyɛ.
Uru u sí Yahutuubii pyi na pi à tíi pi dániyaŋi kurugo,
si supyishiŋi sanŋi mú pyi na pi à tíi pi dániyaŋi kurugo.
31 Ɲyɛ wuu aha dániyaŋi kaɲwɔɔni jwo amuni,
lirʼà li cyêe na Musa Saliyaŋi na ɲyɛ kaɲwɔɔ baa la?
Mà byanhara bá la!
Wuu bá maha u kaɲwɔɔni yalʼa cyêe.