Kile à tunmbyara le ná Nuhu i
9
Ɲyɛ Kile à jwó le Nuhu ná u jyaabilʼá, maa jwo pi á: «Sege ku táan yii na, yii pyìi niɲyahamii si, yii i ɲìŋke ɲî.» 2 Yii sí n-sìi n-pyi fyagara yaaga ɲìŋke múnayaayi punʼá, sige yaare ná yatɔɔre ná saɲcyɛɛnre ná ɲìŋke yafilyi ná fyaabii. Mii sí yi yaha yire puni ɲùŋɔ na. 3 Mii sí yire múnayaayi puni kan yii á yi pyi kyara, bà mii à fyânha a sùmaŋi kan yii á mɛ.4 Ŋka yii àha múnayaage kà pyi kyara si ku múnaani yaha kʼe mɛ, lire ɲwɔhɔ ku ɲyɛ, yii àha ku sìshange yaha kʼe si ku pyi kyara mɛ. 5 Yii sìshange ku ɲyɛ yii múnaani ke, yaaga maha yaaga kʼà ku pyi kʼà wu ke, mii sí yibige pyi ku kyaa na. Naŋiyaaga ká sùpya bò, mii sí uru múnaani kyaa yíbe kuru naŋiyaagʼá, sùpya ká u supyiɲɛɛ bò, mii sí uru múnaani kyaa yíbe urufolʼá.
6 Kile à sùpyaŋi yaa uye málwɔrɔ.
Lire e, sùpya ká u supyiɲɛɛ múnaani kwɔ̀n,
urufoo wunʼà yaa li kwɔ̀n sùpya cye kurugo mú.
7 Ɲyɛ yii pi ke, sege ku táan yii na, yii pyìi niɲyahamii si, yii tɛ̀gʼa ɲìŋke ɲî.»
8 Lire kàntugo, Kile à núrʼa jwo Nuhu ná u pyìibilʼá 9 «Numɛ, mii yabiliŋi sí *tunmbyara le mii ná yii shwɔhɔlʼe si ti le ná yii tùluge e, 10 si ti le ná múnayaayi puni i, mu à jwo saɲcyɛɛnre, yatɔɔre, sige yaare ná yaaga maha yaaga kʼá fworo batoŋi i ná yii e ke. 11 Tire tunmbyaare ti ɲyɛ: zànbwɔhɔ saha sì múnayaayi shi tò ɲìŋke na mɛ, zànbwɔhɔ saha sì ɲìŋke kɛ̀ɛge mɛ.
12-13 Ɲyɛ mii à zànhaŋwɔɔge yaa. Kuru ku sí n-pyi mii ná yii ná múnayaayi puni tunmbyaare tàfyɛŋi. Tire tunmbyaare sí n-kwôro n-yaha fo mu tùluge tɛ̀gɛni. 14 Mii aha ɲahaɲyi bínni ɲìŋke nìɲyiŋi na, zànhaŋwɔɔge sí n-fworo. 15 Lire tèni i, tunmbyaare mii à le mii ná yii ná múnayaayi puni shwɔhɔlʼe ke, tire sí n-kwôro mii funŋʼi. Mii saha sì zànbwɔhɔ cyán ku kwɔ̀ a múnayaayi puni shi tò mɛ. 16 Zànhaŋwɔɔge sí raa n-fworo ɲahaɲyi i. Mii aha kuru ɲya tère o tère e ke, mii funŋɔ sí n-cwo na tunmbyaare na, nte mii Kile à le mii ná ɲìŋke múnayaayi puni shwɔhɔlʼe ke.»
17 Ɲyɛ lire pyiŋkanni na, tunmbyaare Kile à le ná ɲìŋke múnayaayi puni i ke, Kile à jwo Nuhu á na tire tafyɛŋi u ɲyɛ zànhaŋwɔɔge.
Nuhu ná u jyaabii
18 Ɲyɛ Nuhu jyaabii pi ɲyɛ Shɛmu ná Kyamu ná Zhafɛti, u ná pire pi à fworo batoŋi i. Kyamu u ɲyɛ *Kana tuŋi. 19 Pire pi ɲyɛ Nuhu jyaabii taanreŋi. Ɲìŋke sùpyishiŋi punʼà fworo pire tùluyi i.
20 Ɲyɛ Nuhu na mpyi faapyi. Uru u ɲyɛ shincyiiwe mà *ɛrɛzɛnŋi fàa. 21 Canŋka, Nuhu à ɛrɛzɛnŋi sinmpe pà bya, ka pu u u cyán, ka u u ŋkàrʼa sà sínni vàanŋke bage e u cípyire wuŋi i. 22 Ɲyɛ Kana tuŋi Kyamu, urʼà kàrʼa sà u tuŋi Nuhu cípyire wuŋi ta u à sínni. Ka u u fworʼa kàrʼa sà yi jwo u sìɲɛɛbii sanmpii shuunniŋʼá, cyíinŋi na. 23 Ka Shɛmu ná Zhafɛti si vàanntinmbwɔhe kà lwɔ́ a yaha pi fukanyi na, maa jyè kàntugo mà sà pi tuŋi cípyire wuŋi tò. Pi à kàntugo wà pi tuŋʼá, lire e pi ɲyɛ a u vàanɲyibaawuŋi ɲya mɛ. 24 Sinmpʼà pa Nuhu yaha ke, ka u yyahe si ɲcwo, nde u pyìibii puni kàntugowuŋʼà pyi ke, ka u u lire cè. 25 Maa jwo
«Mii à Kana láŋa, u pyi u sìɲɛɛbii bilibii kàntugowuŋi.»
26 Maa núrʼa jwo
«Mii à Kafooŋi Kile mɛtanga yyere, uru u ɲyɛ Shɛmu u Kileŋi.
Kana u pyi Shɛmu biliwe.
27 Kile u Zhafɛti cyeyaayi ɲyaha, u u u yaha u sà ntɛ̀ɛn u sìɲɛɛŋi Shɛmu yyére.
U u Kana yaha u pyi pi biliŋi.»