Kile à zànbwɔhe yyéŋɛ
8
Ŋka Kile ɲyɛ a funŋɔ wwɔ̀ Nuhu ná sige yaare ná yatɔɔre na batoŋi funŋke e mɛ. U à kafɛɛge pyi ku u fwu ɲìŋke na, ka lwɔhe si wá na ntîre. 2 Ka ɲìŋke lùbilibii ná nìɲyiŋi zànhe wyigigii si ntò, ka ku u yyére. 3 Ka lwɔhe si wá na fwu na ŋkɛ̀ɛge, canmpyaa ŋkuu ná beeshuunni ná kɛŋʼà ta cyi tòro ke, ka lwɔhe fànhe si ɲcyɛ̀rɛ.4 Yiŋke baashɔnwoge, canmpyikɛ ná baashɔnwuuni, ka batoŋi si ntîgʼa tɛ̀ɛn Arara kìni ɲaŋke kà ɲuŋʼi. 5 Ka lwɔhe si ŋkwôro na ntîre fo mà sà nɔ̀ yiŋke kɛ woge na, kuru canmpyicyiini ɲaɲyi ɲùɲyʼà fworo.
6 Canmpyaa beeshuunni kàntugo, Nuhu mpyi a ɲwɔge ŋkemu yaa batoŋi na ke, ka u u ku múgo. 7 Ka u u fwɔnrɔgɔ yaha a fworo, ka kuru si wá na sì, marii ma, fo ka ɲìŋke lwɔhʼà sà ŋkwɔ̀. 8 Ka u u mpánmpɔrɔgɔ yaha kʼà fworo, ku sà wíi kampyi lwɔhʼa kwɔ̀. 9 Ŋka mpánmpɔrɔgʼà fworo ke, ku ɲyɛ a tatɛ̀ɛnge ta mɛ, lwɔhe mpyi ɲìŋke cyeyi puni i, ka ku u núrʼa kàre Nuhu yyére. Ka u u cyɛge yige mà tɛ̀gʼa ku cû a lèŋɛ batoŋi i.
10 Maa canmpyaa baashuunni yaha cyi à tòro, maa núrʼa mpánmpɔrɔge yaha kʼà fworo. 11 Yàkoŋke, ka mpánmpɔrɔge si láha a jyè batoŋi i ná olive cige wyempurugʼe ɲwɔge e. Lire e, Nuhu à cè na pà a fworo lwɔhe e sèlʼe. 12 Maa canmpyaa baashuunni yaha cyi à tòro sahaŋki, maa núrʼa mpánmpɔrɔge yige. Kʼà fworo kuru tɔɔge e ke, ku saha ɲyɛ a núrʼa pa u yyére mɛ.
13 Yyeeni Nuhu shìŋʼà pyi yyee ŋkwuu baani ná yyee niŋkin ke, lire yyeeni canmpyicyiini, ɲìŋke mpyi a li ɲwɔ cû na lwɔhe byii. Ka Nuhu si batoŋi nìɲiɲwɔge múgo maa wíi, maa li ɲya na lwɔhe mpyi na ŋkwùu ɲìŋke na. 14 Lire yyeeni yizhwɔnwoge canmpyibeeɲjaaga ná baashwɔnwuuni, lwɔhʼà kwɔ̀ ɲìŋke na feefeefee.
15 Lire tèni i, ka Kile si jwo Nuhu á 16 «Fworo batoŋi i, mu ná ma cwoŋi, ná ma jyaabii ná ma napworibii. 17 Sige yaare ná yatɔɔre ti ɲyɛ ná mu i ke, ti shiŋi puni ná ɲìŋke yafiliyi ná saɲcyɛɛnre, yi puni yige, yi raa sì ɲìŋke cyeyi puni i, yi raa sini yi raa ɲyahage.»
18 Ɲyɛ Nuhu à fworo batoŋi i ná u jyaabii ná u cwoŋi ná u napworibilʼe. 19 Sige yaare ná yatɔɔre ná ɲìŋke yafiliyi ná saɲcyɛɛnre punʼà fworo batoŋi i, yi shiŋi punʼà fworo yiye niŋkin niŋkin.
20 Ka Nuhu si sáraya tawwûgo yaa Kafooŋi Kile mɛge na. Sige yaare ná yatɔɔre ná saɲcyɛɛnre ti sí n-jà n-kan sáraga Kile á ke, u à tire tà pyi sáraya nizógoyo Kile á. 21 Ka yire *sárayi nùgutaangawuyi si Kafooŋi Kile lùuni bò. Ka u u jwo uye funŋʼi: «Mii saha sì ɲɛɛ ɲìŋke kɛ̀ɛge sùpyire kurugo mɛ, sùpyaŋi múnaani mɛ́ɛ ká ntaha kapegigii mpyiŋi na, fo u nimbilere wuŋi. Mii saha sì ɲɛɛ múnayaayi puni shi bò, bà mii à li pyi mɛ.
22 Mà ɲìŋke yaha wani,
ɲɛɛmpe ná sùmakwɔngigii sì n-kwɔ̀ mɛ,
wyeere ná kafwuge sì n-kwɔ̀ mɛ,
nùŋgwɔhe ná bɛ̀nge sì n-kwɔ̀ mɛ,
numpilage ná canŋke mú sì n-kwɔ̀ mɛ.»