24
Kalangan 24
Kalangan si Daꞌud
1 Sukuꞌ PANGHŪꞌ dunya itu sampay kapanyapanna.
Sukuꞌna alam itu sampay kabangsa-bangsahanna.
2 Pinatꞌnnaꞌ eꞌna gintanaꞌan ma tꞌngngaꞌ sꞌllang,
pinahogot heꞌna ma tꞌngngaꞌ kasꞌllogan.
3 Sai bahāꞌ makatukad ni būd PANGHŪꞌ?
Sai bahāꞌ makatꞌngge ma deyom lumaꞌ pangarapan ni iya?
4 Luwal aꞌa ya asussi tanganna min dusa,
ya apoteꞌ deyom pangatayanna.
Luwal isab aꞌa ya mbal anumba ni taꞌu-taꞌu,
maka mbal magsapa pagputingan.
5 Makasambut pahalaꞌ min PANGHŪꞌ bang aꞌa buwattēꞌ kajarihanna.
Tinungbasan iya kabontolan itikad eꞌ Tuhan Manglalappas.
6 Buwattēꞌ isab kahālan saga aꞌa ya angangut Tuhan,
ya atuyuꞌ paharap ni kaꞌa, O Tuhan si Yakub.
7 Bang paꞌin paukab saga tambol!
Bang paꞌin paukab saga lawang awal-jaman,
boꞌ supaya makasōd Sultan Sanglit-sahaya!
8 Sai sa Sultan Sanglit-sahaya itu?
Si Yawe koꞌ itu, ya landuꞌ akosog, landuꞌ aesog.
PANGHŪꞌ koꞌ itu, ya makagaꞌos ma pagbonoꞌ.
9 Bang paꞌin paukab saga tambol!
Bang paꞌin paukab saga lawang awal-jaman,
boꞌ supaya makasōd Sultan Sanglit-sahaya!
10 Sai sa Sultan Sanglit-sahaya itu?
Si Yawe koꞌ itu, ya Sangat Kawasa.
Ya na Sultan Sanglit-sahaya!