22
Kalangan 22
Kalangan si Daꞌud
1 O Tuhanku, angay aku siya-siyanu?
Angay ka palawak na paꞌin min aku?
Angay halam takalenu pangandahingku?
2 O Tuhanku, anganjunjung aku ni kaꞌa kahabaꞌ llaw,
saguwāꞌ mbal aku sambungannu.
Angamuꞌ-ngamuꞌ aku ni kaꞌa kahabaꞌ sangom,
sagōꞌ halam aniyaꞌ halianku.
3 Malaingkan ilu ka aningkōꞌ ma deyom kamahaldikaꞌan.
Kaꞌa ya Tunggal Mahasussi, ya pinudji eꞌ bangsa Israꞌil.
4 Bay angiman ma kaꞌa saga kamattoꞌahan kami,
bay sigām pasangdol ni kaꞌa ati liyusannu min kasigpitan.
5 Bay sigām parahing ni kaꞌa, ati lappasannu,
bay sigām angandol ma kaꞌa, ati halam karapatan.
6 Saguwāꞌ aku itu saliꞌ kalog tanaꞌ, saliꞌ nggaꞌi ka manusiyaꞌ.
Niudjuꞌ aku heꞌ pagkahiku, nihalipulu eꞌ kampungku.
7 Pinakaiyaꞌ aku heꞌ sasuku angꞌndaꞌ.
Nihinaꞌ aku, pinagelong-elongan, pinagtunggīng.
8 Ya lling sigām ma aku, “Aꞌa itu angandol ma si Yawe,
na, patabangta iya ma PANGHŪꞌ-Yawe.
Kalu iya pinuwas min kasigpitan,
pagka aheya lasa PANGHŪꞌ ma iya.”
9 Malaingkan, Tuhanku, kaꞌa ya bay amaluwas aku min kulunan inaꞌku.
Tabowa aku angandol ma kaꞌa min karikiꞌ-dikiꞌku giꞌ,
min waktuku ondeꞌ duruꞌan lagiꞌ.
10 Kaꞌa ya kaholatanku min llaw kapaganak ma aku,
kaꞌa ya Tuhanku sangay min kapangiram ma aku.
11 Daꞌa konoꞌ ka palaꞌan min aku,
sabab itiyaꞌ aku maraiꞌ taluwaꞌ kasusahan.
Luwal kaꞌa ya makatabang.
12 Sikapūn-pūnan ni aku baꞌanan palbantahanku,
sapantun sapiꞌ mandangan min lahat Basan.
13 Pinabangaꞌ bowaꞌ sigām tudju ni aku,
sapantun halimaw maraiꞌ na anꞌkkob, anꞌkkat.
14 Angalongkoy anggautaꞌku, magsalisiꞌ lullun toꞌolangku.
Angalunuk atayku, ibarat lansuk atunaw eꞌ pasuꞌ.
15 Katohoꞌan kꞌllongku, buwat katohoꞌ buliꞌ lapohan.
Angakkot dꞌllaꞌku ni isi emponku,
tahinangnu aku anginam bagunbun nalkaꞌ.
16 Aniyaꞌ sapantun eroꞌ ma sakalibutku,
pinagtipunan aku heꞌ aꞌa jahulakaꞌ.
Nilagbas eꞌ sigām tapeꞌ-tanganku.
17 Taꞌndaꞌan di-na bokogku kamemon,
pinatong aku eꞌ saga aꞌa abꞌnsihan aku,
kinōgan sigām ma kalaꞌat pangluwahanku.
18 Pinagbahagiꞌan sꞌmmekku heꞌ sigām,
pinagkoꞌot-koꞌot badjuꞌku bang sai makarapu.
19 Ya PANGHŪꞌ, daꞌa paꞌin ka palawak min aku.
Kaꞌa ya gaꞌosanku, bang paꞌin ka pasaꞌut anabang.
20 Tampanin aku boꞌ mbal taōk eꞌ kalis.
Ahalgaꞌ ma aku nyawaku, angkan amuꞌku pinuwas min kosog saga eroꞌ itu.
21 Liyusun aku min bowaꞌ halimaw,
papuwasun aku min tanduk sapiꞌ talun.
22 Ati pasaplagku ōnnu ni dauranakanku,
pudjiku ka ma palhimpunan saga jamaꞌanu.
23 Kaꞌam ya magmatāw ma si Yawe, pudjihunbi!
Kaꞌam saga panubuꞌ si Yakub, pagmahaltabatinbi!
Kaꞌam bangsa Israꞌil kamemon, hulmatunbi!
24 Sabab halam pabiyalna pagdahing saga aꞌa asukkal,
halam bay pasagaranna ma deyom kasigpitan.
Halam bay taikutanna sasuku angamuꞌ-ngamuꞌ,
gom paꞌin tabangna.
25 O Tuhan, kaꞌa ya pagpudjihanku ma palhimpunan aheya,
suhulku isab najalku ma matahan saga aꞌa magmatāwan kaꞌa.
26 Amangan saga miskin ma sinosōng sampay sigām asso.
Sasuku kam angangut ma si Yawe ananglit du ma iya.
Mura-murahan, bang paꞌin kam allum saumul-umul.
27 Kinannal si Yawe heꞌ aꞌa kamemon ma mpat pidju alam itu,
ati papinda sigām magtaꞌat ni iya.
Magpudji sabarang bangsa ma alopanna,
28 sabab PANGHŪꞌ-Yawe ya tag-parintahan ma dunya.
Iya ya makapagagi ma kabangsa-bangsahan.
29 Sasuku taga-karaya ma dunya itu, sigām balkanan,
pasujud du ma alopan Tuhan.
Sasuku amoleꞌ lahat kamatayan magpatireyoꞌ ma iya,
sampay saga aꞌa ya mbal makapakalluman di-sigām, pasujud du.
30 Niꞌisbat Tuhan eꞌ panubuꞌ magsuring-magsaingsing,
pinanduꞌan sigām pasal si Yawe ma sinosōng.
31 Ati sigām ya pasꞌlleꞌ amatanyag ni saga aꞌa halam giꞌ palahil
pasal kabontolan ya tahinang eꞌ Tuhan ma sabab aꞌa sukuꞌna.