Nyatos maka kbuan lanke it neke sory alaske syorw a wamfwet nelnyelkye
12
Kyoat desike kyala mait bonyo,
katos nyatos maka kbuan lan ne it ti laitke,
neke wamfwetke it ma kola ne yal sekwe ma kindika rabit ma hyonak,
ode imdirik hulke,
ode syulw a sulsulw rajake ma thun mahitikke hean a kresi enaru neke kimin ti sulsulw desy.
2 Ode wamfwet desike dakun o yor tenanke,
ma kyait wasi sekwe ma yala ma idur hah,
desikeo byoran,
kali kyoman ksunsunuke.
3 *Ode kyala mait bonyo,
katos ti laitke mo,
sory alas lan ne it ma iblunke mermermer.
Ma sory alas desike usuke khatuke itw,
ode syulw a sulsulw a rajake itw dakun.
Ode sorsoruke hean.
4 *Ode sory alas desike yayak ikuke ti laitke ma ksyoly a thunare nenma serit (1/3),
ma kele rabur sir ei lasmyerke khahake.
Maktei o sory alas desike imdiry ma syara wamfwet a maala ma madur hah desy,
ma ikita ma kolnye wamfwet desike idur hah bonyo,
tyel naman kakan ana radur ti i desy.
5 *Ode wamfwet desike idur hah bonyo,
ananke wamwany a i.
Ode haret malkyakakwe kimin naman desy,
ma ana hyareta nuske ktem ne mumu,
kola ne inal tektekan a hnutanke ma ihareta ne.
Keskyede kyoat sory alas desike yala ma tyel naman desy,
desike bonyo Hulasokwe wasi nyaso manosy laitke it a mya,
ma isoruk naman desy toha ena,
ode yor I ba ti Hulasokwe ti wena ihareta tike.
6 Lemade wamfwet desike ila byai lasmyer malosy-losy a Hulasokwe itutuk kita ike.
Ode ti lasmyer malosy-losy desike,
ana Hulasokwe wasi nyasoare raorif wamfwet desy,
ma kyal nini sekwe ribunke sasam a ksala atkwe enaru a kresi hean-nem (1260).
Sory alaske kyala de
7 *Lemadendye inamdiriatke lan ti wen sra eras Hulasokwe imin tike.
Ma Mikhael nyaso lan manosy laitke yor wasi nyaso matoha iare,
neke rsorw a sory alas lan desy ma ramdiriat.
Dendye sory alas lan desike yabuk wasi nyaso matoha iare dakun,
ma rsorw a Mikhael yor wasi nyaso matoha iare,
ma ramdiriat.
8 Keskyede Mikhael yor wasi nyaso matoha i desikre rala ral sory alas desy yor wasi matoha iare.
Dendye Hulasokwe tyian lakhidik a sory alas desike yor wasi nyaso matoha iare toha wen sra eraske.
9 *Lemadendye Mikhael yor wasi nyaso matoha i desikre,
rotuk sory alas lan desy yor wasi nyaso matoha iare mumu ne ei lasmyerke khahake.
Sory alas desike ngkeskwaure wait uskwe khatuke i desy,
ma ani Ibliske,
ode ani Satanke dakun.
Ode i ne dakun o ni a kyoat heitlulswo,
neke i desy.†
Ma i ne iakal iry ribun mamin nuske ktem ne,
mane kihury ma irkye isorw a Hulasokwe ne.
10 Ode kyoat raotuk sir ei hahke bonyo,
ktwomolu teltelke it ma kyatela kyosy laitke ma ktyanuk de kbyohe,
“Senweke,
nenmo kyait sekwe ma Hulasokwe yaorif irkye.
Ode senweke Hulasokwe nenmo syusu wasi haretke,
ma hyareta kola rajake.
Ode senweke Mesiaske,
neke Iry a Hulasokwe isusu ma ika Raja ode iaorif irkye ne,†
neke nenmo syusu wasi haretke dakun mane.
Kali ngkeskwaure wait uskwe khatu a kyalamo sewah o msarin ne,
ioit sal ti iry a matohak ti Hulasokwe ne,
neke rotuk lakhidik i ba toha wen sra eraske de.*
11 Ode waikw o hatnimakw e,
ity wait matohakare rala ral ngkeskwaure wait uskwe khatuke de,
kali Dombake Ananke larake kibo ei lasmyerke khaha ne,
ma ksyos ity wait lim o sal ba de,
ode rares ma ti rabrita Dombake Ananke ti kabei ta kabei bo.
Ode ity wait matohakare dakun o lema ra-la toha matmyatkye,
de rares ma rtohak ti Yesuske.
12 Lemadendye iry mamin ti wen sra eraske krala desy musti mo mimukmuka e!
Keskyede ana masunkwe kdyan nam mamorif ti lasmyerke khaha ne,
ode nam mamin ti tasike kralake dakun,
kali ngkeskwaure wait uskwe khatuke yorw ei lasmyerke khahake ma ti yait e de.
Ode kyeyer a ksyalik,
kali hye ohe sekwe kyala ma ktei mane.”
Sory alaske yobak ma tyabahunw a wamfwet nelnyely desy
13 Ode kyoat sory alas desike hye ohe,
rotuk a i ei lasmyerke khahake bonyo,
sory alas desike yobak ma tyabahunw a wamfwet madur hahak naman wamwany desy.
14 *Keskyede Hulasokwe yal manu lakke ani lan deruke ti wamfwet desy,
ma wamfwet desike nyem bai wen malosy-losy a Hulasokwe itutuk kita ike,
ma soso i toha sory alas desy.
Ode ti wen desike Hulasokwe wasi nyasoare rma ma rajaga,
ode rseak ti wamfwet desy nini ainke enatelw o ktera.
15 Lemade sory alas desike byurik werke toha hahake ei wen a wamfwet desy imin tike.
Wer iburik desike knyaha kola sahke kinaha ne,
ma kyobak ma knyaha wamfwet desy ba.
16 Keskyede Hulasokwe syaluk wamfwet desy,
lemade yal haretke ti lasmyerke,
ma lasmyerke kimnan ma ktyel a wer a sory alas desike iburik toha hahake desy,
ma kete wer desike knyaha wamfwet desy ba.
17 Ktela desike khyury ma sory alas desike imnisik wamfwet desy ksyalik.
Lemade bya ti imdiriat yor wamfwet desike tesnwo natu mamin ti wen salik nekre,
neke iry matoha Hulasokwe wasi tnyetakare,
ode iry a makumak malkyakaw nam Yesuske iajarare.
18 Lemadendye sory alas desike imdiry ti namwatake khahake.