Hulasokwe yal irkye enaru ma yaso sir ma rety wasi nyanoke
11
*Ode nyaso manosy laitke it a yal lalwakwe ma yaw,
neke kola tektekanke.
Ode tyanuk ma yaw de byohe,
“Mbwai nus Yerusalemke,
ode mal lalwaw desy ma mlwaw a Hulasokwe Seike,
ktyabal a lat raeh heal tike.
Ode maki iry masambayan ti Hulasokwe Seike krala desy o irkye enai sir.
2 *Keskyede kete mlwaw a kintal Hulasokwe Seike,
kali Hulasokwe yal wen desike ti iry a lema Yahudi-nare,
neke iry a lema mahe Hulasokwe ne,
ma ral wen desy ma rhareta ti de.
Ode iry a lema Yahudi desikre sir ne rsosno rtabak nus nelnyely desy,†
nini hulke hean at a kresi enaru (42).”
3 Ode nyaso desy lyosu ma yaw ma byohe,
“Hulasokwe tyanuk ma byohe,
‘Ana ksweti irkye enaru ma ti rlosu wasikw nyanoke.
Ode ana rba ti rlosu nyano kunal ti sir desy,
nini sekwe ribunke sasam a ksala atkwe enaru a kresi hean-nem (1260).
Ode iry deru manety wasikw nyano desike,
sew kyaki nekre ana rhonak rabit boare,
ma klyosu ohe rasesal sir ti raatos irkye ti wasi ktela atyat ialanare ne.’ ”
4 *Iry deru manety Hulasokwe wasi nyano neke rola dene aw a zaitunke enaru,
ma kimdiry ti ity Ebut mahareta nuske ktem ne wasi lulululw ne.
Ode rola dene damarke kwenake enaru,
ma kimdiry ti ity Ebutke wasi lulululw ne dakun.
5 Ode kolnye irire rala atyat iry deru manety Hulasokwe wasi nyano desikre,
desike bonyo akye ana kbyetik kyosy iry deru desy hahatare,
ma ktyabahunw a iry maala atyat iry deru desy.
Koldyesike mane esei desike yobak ma yala atyat manety nyano deru desy,
desikeo akye ana knyaa khyunw a i elik.
6 *Ode kyoat iry deru desy rabrita Hulasokwe wasi nyano desikre ti lasmyerke khaha ne a nggora,
desikeo haretke kimin sir dakun,
ma bisa ma rbu eta uske ma lema kyoras,
ode bisa ma rala wer o tasi nekre ma kihihi i ma kola larke,
ode bisa ma rala masunw ribun sai ta sai ti lasmyerke khaha ne,
ti sew kabei ta kabei bo,
ma ktyoha rabuke.
7 *Ode kyoat iry deru desike rabrita nyano manosy Hulasokwe ma ktei,
desike bonyo heal mahatkwe it a byetik toha kuran demdemw a lema talaw tal kademnwanakke ne,
ma mya ma ikahrea yor iry deru desy,
ma tyabahunw a deruke.
8 *Dendye kele rlosik iry deru desike tbunatare ti stratke krala mamin ti nus desy.
Neke nus lan a rabakw a ity Ebutke ti tul masanwalw ike ti ne.
Nus lan desike irire rahliak ti Sodom dete lemamo Mesir,
kali iry mamin nus desy rala ktela atyatare kola ne iry a mamin ti Sodom o Mesir ne.
9 Ode iry manosy a klolanare mumu,
ode iry manosy a negara-nare mumu,
ode iry manosy a bangsa-nare mumu,
ode iry manal tel salno salikare mumu dakun ti nuske ktem ne,
raktemtem ne mumu neke rasu iry deru desike tbunatare nini sekwe enatelw o ktera (3,5).
Ode rbu eta ma lema irkye it a yal iry deru desike tbunatare ma ti ramlin dakun.
10 Ode iry mamin ti lasmyerke khaha neke mumu ne ramukmuka sir a ksyalik,
kali iry deru manety Hulasokwe wasi nyano desike rmaty de.
Dendye iry mamin ti lasmyerke khaha ne rala kalkal,
ma it de yosa hadia ti it,
kali iry deru desy ana lema bisa ma rala masunkwe huruk ti iry mamin ti lasmyerke khaha ne mumu de.
11 *Keskye kyoat sekwe enatelw o ktera desike kisakut bonyo,
Hulasokwe Memeanke ksyukar ei iry deru manety Hulasokwe wasi nyano desy,
ma kyala sir ma rmorif huruk,
ma ramdiry ti wen desy.
Ode kyoat iry masu desikre ratos a iry deru desy ma rmorif huruk ma ramdiry ti wen desy bonyo,
iry masu desikre mumu ne ramtaut ma ksyeman sir a ksyalik.
12 *Ode iry deru manety nyano desy rtomolu teltelke it ma kbyetik kyosy wen sra eraske mo kduduke lan a ksyalik,
ma ktyanuk ti deruke ma kbyohe,
“Miru,
msyai mai san!”
Dendye ti iry a maala atyat sirare wait lulululw ne,
oanke kmya ma kkyoal eta iry deru desy,
ma ksyalak sir bai wen sra eraske.
Ode iry a maala atyat iry deru desike ratos elik ktela madi ti desy.
13 *Ode kyoat desy dakun o lurwakye lan a ksyalik,
ma khyury ma sey o sar mamin ti nus lan desike ribun† (1/10) a klyily ma kiskyui-kiskyay,
ma irkye ribunke itw rmaty khyali lurway desy.
Ktela ne khyury ma iry mamorif a nggora ti nus lan desikre ramtaut ma kiseseman sir a ksyalik,
lemadendye rleru Hulasokwe Anike ti wen sra eraske.
14 Dendye masunw matoha mamunake,
neke masunw enaruke ksyakut ba de.
Keskye myatos!
Masunw matoha masunw enaruke kyala ma kmya ma ne,
neke masunw enatelkwe.
Hulasokwe wasi nyaso itkwe yohw a wasi strompetke
15 *Maktei o Hulasokwe wasi nyaso matoha nyaso nemke,
neke nyaso itkwe yohw a wasi strompetke,
desike bonyo ti wen sra eraske rtomolu telare ma kbyoran ma kbyohe,
“Kyala kyosy senwe ma ti kiba knaru ne,
Hulasokwe hyareta nuske ktem ne de.
Ode Kristus a Hulasokwe isaa sima ti I neke,
ika Raja ma yor Hulasokwe rhareta nini nam dakun.”
16 Dendye iry a dehean-ru a kresi enaat (24) manety lulw ma rataklulw ti wait kader mahareta ma kisara Hulasokwe ne,
ramdiry ma rsakitil ode rou ti Hulasokwe,
17 ode rtanuk ma rbohe,
“O ara Ebumy Hulasow a Mahareta Lan Lahuk O,
senweke mumin de,
ode Oi neke mumin kyala kyosy khyehyeike dakun de!
Aramy msyalak eraske ba ti O,
kali Oi neke nenmo mal wasimw haret lan desy,
ma mhwareta kola Rajake de.
18 *Ode bangsa lema matohak ti ara Ebumy a O ne,
sir ne mumu neke rsorw a O,
kali rkeyer a O.
Keskyede kyait sekwe de,
ma Oi ne mswusu wasimw keyerke,
ma mukun tun ti iry mamatire mumu.
Ode kyait sekwe dakun mane,
ma wasimw makaryaare,
mal ksewanke ti sir,
neke iry manety wasimw nyanoare,
rtabal wasimw iry a nelnyelire mumu,†
neke iry a lan o kakan,
ma kolnye rtomolu Animkwe,
desyo ramtaut O,
ode ralan O.
Ode kyait sekwe dakun de,
ma muhnutuk a iry mahnutuk nam mamin ti lasmyerke khaha ne dakun.”
19 *Ode kyoat desike holholat a Hulasokwe Sei mamin ti wen sra eraske kimlakat.
Desike bonyo kmwatakit Batbatak Hatetakke ti Hulasokwe Seike krala desy.
Neke batbatak a tnyetak Hulasokwe ihatetak inor wasi irire ne rasosan tike.
Ode khyitik o ktyarbaka ti lasmyerke khaha ne,
ode lurwakye lan,
ode us a eske,
neke kyoras o lan dakun.