Kirisi sʋʋ ká bɩr'isé wɩ́ɛ́
15
1 Ŋ maábináŋa, ŋ có rɩ́ŋ líísíwa Labaarɩwero ná ŋ há bʋ́lɛ́ pɛ́ɩ́wa, ɩ́ laa dí, a vɔ́wɩ́wa tɩɩ ɓárʋ́ mɛ́ wérí wɩ́ɛ́ nɛ́.
2 Ɛ́ Labaarɩwero ní lɛ́ɩ́wa tá, rɩɩ́wa nɛ́ sáŋʋ́, ʋ ɛ́ ná ŋ há bʋ́lɛ́ pɛ́ɩ́wa; rɩ ɛ́ rá, ɩ́ laadí ná ká yɔ́ɔ́ nɛ́.
3 Wɩ́ɩ́ ná ŋ há nɩ́ɛ́, ʋ nɛ́ ŋ la sɩ́ɛ́ pii kármɩ́wa ɛ́:
Kirisi sʋ́wɔ́ á wɩ́bɔma yɩr mɛ́, anɛ ɛ́ ɓa há pʋ́ŋsɛ́ Wɩɩsɛ Kɛnɔ sɩɛrʋ;
4 ɓa húú, ká tápʋlɛ botoro kal, ʋ bɩ́rɔ́ isi sʋʋ mɛ́, anɛ ɛ́ ɓa há pʋ́ŋsɛ́ Wɩɩsɛ Kɛnɔ sɩɛrʋ.
5 Ʋ kenú tɩɩ ko makɛ Sefa,* a kánʋ́ tɩɩ cáánʋ́ nɩtʋmɛ́ fí rí bɛllɛ má,
6 a baa kánʋ́ tɩɩ makɛ cáánʋ́ hatɩŋna, há kɛ zɔmmʋ́ɔ́, a hé náŋá mɛ́; ɓa sɩɛrʋ dɩkáŋ ha mɩ́nɔ́, ká náŋa sʋsɛ.
7 Ɛ́ har rɩ́ mɛ́, ʋ mákʋ́ tɩɩ cáánɛ Zakɛ,* a ha cɩ́ ráŋ mɛ́, a mákʋ́ tɩɩ cáánɛ nɩtʋmɛ́ ná wuu.
8 Ɛ́ nɩɛ wuu har rɩ́ mɛ́ nɛ́ sɩɛ́, ʋ ko mákʋ́ tɩɩ cáánɩ́ŋ má.
9 Ŋ nɛ́ ká Zeezi nɩtʋmɛ́ ná wuu sɩɛrʋ ɓɩwie; ŋ bɛ́ŋsɛ́ wɩcʋɔla púl* nɩɛ daarɛ, ʋ wɩ mɔhɛ̃́ rɩ́wɔ́ yɩ́rɩ́ŋ Zeezi nɩtʋmɩ́.*
10 Amá Wɩɩsɛ zilé mí ní, ŋ zaá nɩ́ŋ há nɩhɩ̃́ nyɛ; ʋ zilé sɩɛ́ wɩ yɔ́ɔ́ tɛ́ɛ́; bee wɩ́ɛ́ ŋ tʋ́mɔ́ kɩ́llɛ Zeezi nɩtʋmɛ́ ná wuu.
Ŋ tɩɩ dóé mí rá sɩɛ́, Wɩɩsɛ dóé ná há mɩ́nɩ́ŋ mɛ́ nɛ́.
11 Ɛ́ wɩ́ɛ́ sɩɛ́, rɩŋ nɛ́, rɩ ɓa nɛ́, ɛ́ wɩ́ɛ́ nɛ́ á pii bʋl aá pɛ́ɩ́wa; ɓa nɛ́ sɩɛ́ ɩ́ laa dí.
Nɩbííne sʋʋ ká bɩr'isé wɩ́ɛ́
12 Raá nɛ́ sɩɛ́ sɛ́ Kirisi sʋ́wɔ́ ká bɩr'isi, beé rí tɛ, ɩ́ sɩɛrʋ náŋa wólli bʋlɛ́, nɩbííno wɩ sʋ́wɛ́ ká bɩrɛ aá isi?
13 Rɩ sʋsɛ bɩr'isé ní toó, Kirisi má wɩ bɩ́rɛ́ isi.
14 Rɩ Kirisi ní sɩɛ́ wɩ bɩ́rɛ́ isi sʋʋ mɛ́, á wɩ́bʋlɛ́ ná wuu ká yɔ́ɔ́ nɛ́, ɩ́ yardá má a yɔ́ɔ́.
15 Ká, á nyɛ nyɩɛrʋ má pá Wɩɩsɛ, á há sʋ́ʋ́ nɛ́ ílli Kirisi sʋʋ mɛ́, ká ʋ wɩ wɩ́ɩ́ ɛ́ɛ́, rɩ sʋsɛ nɛ́ wɩ bɩ́rɛ́ aá isi.
16 Rɩ sʋsɛ nɛ́ waá isi é, Kirisi má wɩ ísé.
17 Rɩ Kirisi ní wɩ bɩ́rɛ́ isi sʋʋ mɛ́, ɩ́ há lɔ́ʋ́ dí ná ká wɩ́yɔ́ɔ́ nɛ́ ɩ́ a; ɩ́ ha mɩ́nɩ́wa wɩ́bɔmɔ sɩɛrʋ nɛ́.
18 Ká nɩɛ ná má há lá Kirisi dí ká sʋsɛ, ɓa má yʋ́ksɔ́.
19 Raá há kéŋ yɩɛla ná Kirisi mí, ká dúníé hiẽsó né dʋŋɔ wɩ́ɛ́ nɛ́, á nɛ́ ká dúníé susunáára wuu sɩɛrʋ wɩɩla nɩɛ.
20 Amá Kirisi ɓɩɛ́na bɩ́rɔ́ isi sʋʋ mɛ́; ʋ nɛ́ ká sɩ́laarɔ.
Ɛ́ mákɔ́ rɩ́ nɩɛ ná wuu há sʋ́sɛ́ sɩ́ bɩr'isi sʋʋ mɛ́.
21 Sʋʋ há tɩ́ŋ nɩbalá mɛ́ rɛ́ ko tɔ́ɔ́, sʋʋ mɛ́ bɩr'isé máá á rʋ́ʋ́ tɩ́ŋ nɩbalá mɛ́ rɛ́ ko.
22 Nɩɛ wuu há tɩ́ŋ Adaŋ* mɛ́ nɛ́ aá sʋsɛ, nɩɛ wuú á rɩ́wɔ́ tɩŋ Kirisi mí ní, a bɩrná hiẽsó.
23 Kirisi kal bɩrkóé, nɩɛ ná wuu há kɔ́ʋ́ nɩ́ɛ́, ɓa sɩ́ tʋkɛ náŋá mɛ́, a isi sʋʋ mɛ́, rɩ́ Kirisi a sɩ́laarɔ, ká rɩ́wɔ́ tɩŋ.
24 Ɛ́ har rɩ́ mɛ́ nɛ́ ká dúníé isé, rɩ́ Kirisi sɩɛ́ zɔkɛ bána nyúú, rɩ́ tíé nyúú tíŋ tɩ́náwa* wuu; a tʋŋ ballɩ́ kuóre wuu nyúú, a zɔkɛ dóé tɩ́náwa rɩ́ áŋwóŋwa má wuu, ká sɩɛ́ pi kuorí hóú Ana Wɩɩsɛ nɛ́sɛ mɛ́.
25 Ʋ mɔhɔ̃́ rɩ́ Kirisi dí kuorí a kaá ja tɛ́ŋ ná mɛ́, Wɩɩsɛ há sɩ́ kɛ́sʋ́ dɩŋdɔma wuu hóú nɛ́sɛ mɛ́.
26 Dɩŋdɔŋ ná ʋ háá á rʋ́ʋ́ tɩŋ har zɔkɛ nɛ́ ká sʋʋ.
27 Pʋ́ŋsɛ sɛ́ Wɩɩsɛ pí ɓɩɛ wuu hóú nɛ́sɛ mɛ́, ɛ́ ká taŋá rɛ́; amá Wɩɩsɛ ná há pí ɓɩɛ wuu hóú nɛ́sɛ mɛ́, ʋ é to ráŋ.
28 Wɩɩsɛ sɩ́ a rɩ́ onni wuu múúríwó tɩɩ pɔ́ʋ́ Bio Kirisi, rɩ́ Bio má baa múúrú tɩɩ pá Ana ná há ɛ́ɛ́ onni wuu múúríwó tɩɩ pɔ́ʋ́, a makɛ rɩ́ Wɩɩsɛ dʋŋɔ nɛ́ dí kuorí ɓóŋ, ɓa wuu nyúú.
29 Rɩ sʋsɛ nɛ́ wɩ bɩ́rɛ́ aá isi, beé rí tɛ, nɩɛ náŋa a ɓa káŋwɔ́ aá muŋsi nyii, ɓa nɩsʋsɛ yɩr mɛ́?
Bee yɩ́ɛ́lá rɛ́ ɓa ka, aá tʋŋ ɛ́?
30 Beé rí sɩɛ́ tɛ, sʋʋ cɩ́ tɩ́krá tɛ́ŋ wuu mí?
31 Kál wuu, ŋ mɩŋ sʋʋ dánnʋɔ mɛ́ nɛ́, maábináŋa; ká, ɩ́ lo rɩ́ŋ bʋl pɛ́ɩ́wa, ŋ tɩ́ŋɩ́wa wɩ́ɛ́ aá nyʋ́kɛ á Nyuutɩna Zeezi Kirisi mí.
32 Ŋ rɩ́ nɩɛ ɓɩkana lówó, Ɩfɛɛzɛ* mɛ́, anɛ kaadíhuorúwa; rʋʋ ɛ́ sɩɛ́ ká rɩŋ lówó aá ja yɩr nɛ́, nɩbííne rɩ́, ʋ nyʋɔrɛ́ mɩŋ nɛɛ́?
Rɩ nɩsʋsɛ nɛ́ wɩ bɩ́rɛ́ aá isi, á tʋŋ anɛ ɛ́ nɩɛ náŋa há sʋ́ɔ́lɛ bʋlɛ́:
«Á dídí, a nyʋ́nyɔ,
bee wɩ́ɛ́ á cíé níí sʋsɛ́.»
33 Ɩ́ sɩ́ɩ́wa tɩɩ nyɩ́sʋ́, nɩtɩɛnnɛ mɛ́ tɩŋɛ́ nɩ́ɩ́ zɔkɛ nɩtáŋnɛ.
34 Ɩ́ ɔsɛ cɩ́ wérí, a báá sɩ́ wɩ́bɔmɔ á, ʋ ɛ́ nɛ́ cɛ́rɛ́.
Ɩ́ sɩɛrʋ nɩɛ náŋa wɩ Wɩɩsɛ ɛ̃ má tɩɩ.
Ŋ bʋ́l nyɛ rɩ́ŋ hɩ́ɩ̃́sɩ́wa nɛ́.
Tɛŋ ná duo á háá káá lɛ sʋʋ mɛ́
35 Amá nɛrɔ nɔ́ŋɔ sɩ́ bɔsɛ bʋlɛ́:
«Sʋsɛ á ɛrɛ́ káá isi?
Tɛŋ orí dúó rí, ɓaá a rɩ́wɔ́ kaa isi?»
36 Nɩcʋʋlɛ́!
Rɩɩ pí oŋbíí du, rʋʋ wɩ sʋ́wɛ́, ʋʋ́ nyʋ́ rɛ́?
37 Omo ná ɩ háá dué, nyɩ́la rá ɩ dúdu, ɩɩ́ du bíí ní; rɩ lɛɛmɩ́ nɛ́, ʋ há ká oŋduo ná wuu.
38 Ká Wɩɩsɛ a ʋ nyʋ́, anɛ ɛ́ ʋ há có.
Ʋ ɔ́ɔ́ óŋ wuu kánʋ́ nɩɩsɔ dúníé mí.
39 Tɛŋnamɩŋsa má wuu to balá.
Nɩbííne namɩɛ kɔ́ʋ́ dʋŋɔ, pʋsɛ namɩɛ ɔ́ʋ́ dʋŋɔ, diíwiisi namɩɛ ɔ́ʋ́ dʋŋɔ, náŋwʋlɛ́ má namɩɛ ɔ́ʋ́ dʋŋɔ.
40 Bána nyúú onni nɩɩsɔ kɔ́wɔ́ dʋŋɔ, tíé nyúú onni nɩɩsɔ má ɔ́wɔ́ dʋŋɔ; nyúú rí onni tʋlɛ́ rɩ́ tíé nyúú onni tʋlɛ́ to balá.
41 Wɩpomí tʋlɛ́ kɔ́ʋ́ dʋŋɔ, cana tʋlɛ́ ɔ́ʋ́ dʋŋɔ, caŋwʋllɛ má tʋlɛ́ ɔ́wɔ́ dʋŋɔ; caŋwʋllɛ má náŋa tʋlɛ́ baa kɩ́llɛ náŋa.
42 Ʋ sɩɛ́ ká ɛ́ nɛ́ sʋsɛ bɩr'isé mí.
Tɛŋ ná ɓa há píé hu é ká oŋsʋɔrɩ́ rɛ́; amá tɛŋ ná há bɩ́rɛ́ aá lɛ sʋʋ mɛ́ é waá sʋɔrɛ.
43 Rʋʋ lɔ́rɔ́ má rɩ́wɔ́ pii hu, ʋʋ́ bɩrlɛ rɩ́ wér ní; rʋʋ ká pʋɔlá má rɩ́wɔ́ pii hu, ʋʋ́ bɩrlɛ rɩ́ dóé ní.
44 Tíé nyúú tɛŋ nɛ́ ɓaá píí hu, ká ʋʋ́ bɩrlɛ, rʋʋ ká tɛŋ ná Wɩɩsɛ Sabɩɩna há pɔ́ʋ́ nɛ́.
Rɩ tíé nyúú tɛŋ nɛ́ mɩnɛ́, Wɩɩsɛ Sabɩɩna tɛŋpáálɛ má mɩ́nɔ́ rɛ́.
45 Ɛ́ nɛ́ Wɩɩsɛ Kɛnɔ sɩɛrʋ ɓa pʋ́ŋsɛ bʋlɛ́:
«Dʋ́ŋdʋ́ʋ̃́ báálɔ,
Adaŋ bɩ́rmɛ́ oŋhiẽsí.»
Hatɩ́ŋnɛ́ Adaŋ é ká Sabɩɩna ná há kéŋ hiẽsó aá pá nɩɛ nɛ́.
46 Wɩɩsɛ Sabɩɩna tɛŋ páálɛ ná ra wɩ sɩ́ɛ́ lɛ́ɛ́, tíé nyúú tɛŋ nɛ́ lá sɩ́ɛ́, bána rɩ́ tɛŋ tʋkɛ.
47 Dʋ́ŋdʋ́ʋ̃́ báálɔ lɛ́ tíé kuŋkulo ní, a a tíé óŋ; bʋllɛ mɛ́ báálɔ é lɛ́ bána rɩ́ nɛ́.
48 Tíé nyúú nɛrɔ há nɩhɩ̃́ ɛ́, tíé nyúú nɩɛ wuu nɩhɩ̃́ ɛ́ nɛ́; bána rɩ́ nɛrɔ má há nɩhɩ̃́ ɛ́, bána rɩ́ nɩɛ má nɩhɩ̃́ ɛ́ nɛ́.
49 Ɛ́ ná á rɩ́ tíé kuŋkulo báálɔ há nɩhɩ̃́ náŋá, á rɩ́ bána rɩ́ báálɔ máá kóó nɛ náŋá ɛ́ nɛ́.
50 Maábináŋa, ʋ ná ŋ háá já rɩ́ŋ bʋl nɛ́ ká:
Namɩɛ rɩ́ cɛ́l nɩbííno wɩ Wɩɩsɛ kuótɔ́ɔ́ wuó tɩ́llɛ, ká omo ná há wuolé sʋwɛ aá sʋɔrɛ, má wɩ omo ná há waá sʋwɛ wuó tɩ́llɛ.
51,52 Ɩ́ ná wɩ́féŋsí* né ŋ háá á rɩ́ŋ bʋl pɛ́ɩ́wa:
Á wuu waá sʋsɛ, amá naasɩ́ balá, sɩ́ɩ́ kɩ́ŋsɛ balá mɛ́, hatɩ́ŋnɩ́nyɩ́la mui mí, Wɩɩsɛ sɩ́ bɩ́rsɩ́rá.
Nyɩ́la sɩ́ mu, rɩ́ sʋsɛ isi lɛ arɩ́ tɛŋ ná báá há waá sʋwɛ, ká rɩ́ Wɩɩsɛ káŋrá má bɩ́rsɛ.
53 Wɩɩsɛ sɩ́ bɩ́rsɛ tɛŋ sʋɔrɩ́, rʋ́ʋ́ báá sɩ́ sʋ́ɔ́rʋ́, a bɩ́rsɛ tɛŋ sʋwɩ́, rʋ́ʋ́ báá sɩ́ sʋ́wʋ́.
54 Rɩ tɛŋ sʋɔrɩ́ né ní, rɩ́ Wɩɩsɛ kaa bɩ́rmʋ́ ná há waá sʋɔrɛ, rɩ tɛŋ sʋwɩ́ né ní, rɩ́ Wɩɩsɛ kaa bɩ́rmʋ́ ná há waá sʋwɛ, ɛ́ mɛ́ nɛ́, rɩ́ wɩ́ɩ́ ná há pʋ́ŋsɛ Wɩɩsɛ Kɛnɔ sɩɛrʋ nʋɔ sú.
Ɓa pʋ́ŋsɔ́ bʋlɛ́:
«Dóé dí sʋʋ.»
55 «Sʋʋ, ɩ ballɩ́ ná mɩŋ nɛɛ́?
Sʋʋ, ŋ́ néí yooló hɛŋ ná?»
56 Sʋʋ yooló hɛŋ nɛ́ ká wɩ́bɔmɔ.
Wɩ́bɔmɔ má dóé sɩɛ́ lɛ́ Wɩɩsɛ kíŋse ná nɛ́.
57 Á bɩ Wɩɩsɛ mɛ́, ʋ nɛ́ tɩ́ŋrá Nyuutɩna Zeezi Kirisi mí, a a, á wólli dóé aá dí.
58 Ɛ́ wɩ́ɛ́, ŋ maábináŋa, ŋ nɩcólle tɩɩ, ɩ́ ka wérí, a sɩ́ yʋ́ɔ́rʋ́.
Ɩ́ tʋŋ Nyuutɩna tʋtʋmɛ́ arɩ́ kajáŋa, tɛ́ŋ wuu mí.
Ɩ́ zɩŋ rɩ́ tʋtʋmɩ́ ná wuu ɩ́ há tʋ́mɛ́ Nyuutɩna yɩr mɛ́, ʋ wɩ yɔ́ɔ́ tá.