Kirisi nɩtʋmɛ́ nɩɩsɔ
4
1 Ɛ́ wɩ́ɛ́, ɩ́ bélrá anɛ Kirisi tʋtʋnna.
Á ká Wɩɩsɛ wɩ́féŋse* laabʋlpáára nɛ́.
2 Ʋ ná sɩɛ́ há cɛ́rɛ́ rɩ́ laabʋlpáára nɛ́ ká, rɩ́ oro wuu a tékétéké.
3 Rɩɩ́wa nɩ́ɩ́ díŋ sarɩ́ya, rɩ dúníé nɩɛ nɛ́, ʋ ɛ́ wɩ́ŋ wálmɛ.
Ŋ má tɩɩ wɩ́ŋ tɩɩ sarɩ́ya dí, ŋ ɩ́ɔ̃́ rɩ́ŋ wɩ wɩ́ɩ́ zɔ́kɛ́.
4 Ɛ́ rá taŋa wɩ́ŋ taŋá pá.
Nɛrɔ ná háá díŋ sarɩ́ya nɛ́ ká Nyuutɩna.
5 Ɛ́ wɩ́ɛ́, ɩ́ sɩ́ nɛ́ŋ sarɩ́ya dí, rɩ kal ha wɩ péré.
Ɩ́ dɛllɛ Nyuutɩna rʋ́ʋ́ ko.
Ʋ nɩ́ɩ́ kué, rɩ́ɩ́ a rɩ́ bíno sɩɛrʋ wɩ́féŋse nyɩɩsɛ pʋmmɔ mɛ́, rɩ́ nɩbííne sɩɛrʋ wɩ́bilé má lɛ pʋmmɔ.
Ɛ́ nɛ́ sɩɛ́, rɩ́ Wɩɩsɛ bɩ nɛ́ŋ wuu mí, a cɛ́rɛ ɛ́ há mɔhɛ̃́.
6 Ŋ maábináŋa, ŋ bʋ́l wɩ́ɛ́ nyáŋ ko tɩ́ɩ́nɩ́ŋ rɩ́ Apolosi* mí, ráá wɩ́ɛ́ a cáánɛ́ rɛ́ a pɛ́ɩ́wa.
Ɩ́ bélrá háá a ɛ́, a makɛ rɩ́ɩ́wa nɛ wɩ́ɩ́ né mʋ́l há sɛ́:
Ɩ́ sɩ́ áá daarɛ ɛ́ há pʋ́ŋsɛ Wɩɩsɛ Kɛnɔ sɩɛrʋ.
Ɩ́ sɩ́ nyʋ́kɩ́ tɩŋ nɩɛ náŋa mɛ́, káá cɩ́ náŋa mɛ́.
7 Áŋ rɩ́ tɛ ɩ kɩ́llɩ́ nɔ́ŋɔ?
Beé ɩ ka, rɩ Wɩɩsɛ ra wɩ́ɩ́ pɛ́ɛ́?
Ɛ́ wɩ́ɛ́ sɩɛ́, beé rí tɛ ɩ mɩ́mákɩ́ tɩɩ, anɛ óŋ ná ɩ há kené, rɩ Wɩɩsɛ ra wɩ píé pɛ́ɩ́?
8 Ɩ́ záŋɔ́ ná onni ná wuu ɩ́ háá jɛɛ́ nɛ́, a ka ɓɩɛ.
Ɩ́ bɩ́rmɛ́ kuóré, ká á é ha to kuóré.
Ŋ có rɩ́ɩ́wa ɓɩɛ́na a kuóré tɩɩ, ráá má dí kuorí arɩ́rɩ́wa.
9 Á é Zeezi nɩtʋmɛ́, ʋ nɩhɩ̃́ anɛ Wɩɩsɛ ɔ́ɔ́, á nɛ́ a nɩbííne wuu hatɩŋna.
Á dé nɛ nɩɛ ɓa há lɩ́sɛ́ tá, rɩ́wɔ́ ɓʋ́ʋ́sɛ nɛ́.
Á ká nɩbelé rí dúníé sɩɛrʋ, malɩ́kawa rɩ́ nɩbííne wuu sɩ́ɛ́ mɛ́.
10 Á tɩ́ŋ Kirisi wɩ́ɛ́, a de nɛ gɩŋgátɩɩna nɛ́, ká ɩ́ é a wɩ́zɩ́nná, Kirisi sɩɛrʋ.
Á ká pʋ́ɔ́llɛ́, ká ɩ́ a bɩbárá; ɓaá zílíwa, káá lɔ́rɩ́rá.
11 Arɩ́ zaa, losu rɩ́ nyinyʋɔ́sɛ wɩɩlá wɩ́rá mɛ́.
Áá laalɛ gɛkɔŋsa nɛ́.
Ɓaá ŋmásɩ́rá, á a nɩgʋɔrbaarɛ́.
12 Áá tʋŋ bɔl nɛ́, aá járá nʋɔ ɓɩdííli.
Rɩ ɓaá tʋ́ksɩ́rá, á bárkɛ; rɩ ɓaá wálmɩ́rá, á nyammɛ.
13 Rɩ ɓa bʋ́l bɔ́ŋbɔ́ŋ párá, á bʋl wérí pɔ́wɔ́.
Arɩ́ zaa, dúníé nɩɛ wɩ́rá bú; á nɩhɩ̃́ pupul kʋɔra nɛ́ ɓa sɩ́ɛ́ mɛ́, a ɔ́wɔ́ nɩkaagbésitáálɛ́.
14 Ŋ wɩ wɩ́ɛ́ nyáŋ pʋ́ŋsɛ́ aá jɛ́ɩ́wa hɩɩ̃sɛ́ nɛ́, amá ŋ pʋ́ŋsɔ́ aá ja rɩ́ŋ cáánɩ́wa nɛ́, bee wɩ́ɛ́ ɩ́ káŋ bicólle ní.
15 Rɩ sɩ́dííre có rɩ́wɔ́ a bʋ́ɩ́ fí má, a máŋsɛ Kirisi wɩ́ɛ́ aá pɛ́ɩ́wa, ɩ́ áná é ní balá.
Ŋ nɛ́ kɛ́ɩ́wa áná, Kirisi ŋmɛ́nɔ mɛ́.
Ŋ nɛ́ bʋ́l Labaarɩwero wɩ́ɛ́ pɛ́ɩ́wa, ɩ́ laa dí.
16 Ɛ́ wɩ́ɛ́ sɩɛ́, ŋŋ́ sʋ́lɩ́wa rɛ́, ɩ́ nɩ́ŋ, aá válɩ́ŋ nabulle mí.
17 Ɛ́ nɛ́ tɛ, ŋ tʋ́mɩ́ŋ bicólli Timote* ɩ́ rɩ́.
Timote ká tékétéké Nyuutɩna wɩ́ɛ́ sɩɛrʋ.
Ŋ háá va ɛ́ Kirisi ŋmɛ́nɔ mɛ́, arɩ́ wɩ́ɛ́ ná ŋ há gʋ́ɔ́rɛ́ aá bʋl wɩcʋɔla púlli* wuu mí, Timote sɩ́ ko ɔsɛ máŋsɩ́wɔ́ wuu pɛ́ɩ́wa.
18 Ɩ́ náŋá nyʋ́kʋ́, a bɩɩnɛ rɩŋ báá waá kóó néíwa rɛ́.
19 Rɩ Nyuutɩna nɛ́ sɩɛ́ sáŋɛ́, ŋ waá dáánɛ káá kóíwa rɩ́.
Ɛ́ nɛ́ sɩɛ́, rɩ́ŋ ko ná nyʋktɩɩna ná wɩ́bʋlɛ́ rɩ́wɔ́ dóé mʋɔsɔ.
20 Wɩɩsɛ kuótɔ́ɔ́ ná sɩɛ́ to wɩ́bʋlkáná óŋ, amá ʋ ká dóé wɩ́ɩ́ rɛ́.
21 Ɩ́ sɩɛ́ có beé rí?
Ŋ́ pɛ́ pi daa nɛ́ aá ko yáá, ŋ́ ka cólle rɩ́ líŋpɔrɩ́ nɛ́ ko?