3
1 Nyuutɩna Wɩɩsɛ sɛ́: " Ŋ sɩ́ tʋ́mɩ́ŋ nɩlɩsɛ rʋ́ʋ́ ko bɩrmɛ ŋmɛ́nɔ bílíŋ mí. Nyuutɩna Wɩɩsɛ ná ɩ́ haá yɩɛlɛ́, sɩ́ bɩrko mʋ́l ná tɩɩ mɛ́ ʋ wɩ́cʋɔlɩjaa ná sɩɛrʋ; ŋ nɩ́lɩ́sɛ ná sɩ́ bʋ́lɩ́ŋ nʋtʋmɛ ná wɩ́ɛ́ á pɛɩwa. Ɛ́ wɩɛ́, ɩ́ nóú ní kué!" Nyuutɩna Wɩɩsɛ, doé wuu tɩ́na Wɩɩsɛ nɛ́ bʋ́l ɛ́.2 Rʋ́ʋ́ nɛ́ sɩɛ́ kué, nɛ́ŋ sɩ́ wóllí lú a lɛ>> Ʋ koé mí, nɛ́ŋ sɩ́ wólli cɛ́ dahá>> Bee wɩ́ɛ́, ʋ koé sɩ́ lʋŋ anɛ níŋ lʋmɔ háá mɩ́ɛ́rɛ kɔmɔ ɛ́, anɛ cáŋfanɛ ɓa háá pii sɛsɛ gɛnnɛ ʋ mɩ́ɛ́rɛ kɩ́kɛ́lɛ́ ɛ́.3 Ʋ sɩ́ nɛ̃ wárɛ ɓa háá pii hé níŋ mí, a cʋɔrɛ lɩ́sʋ́ busunnu ɛ́. Ʋ sɩɛ́ sɩ́ mʋ́ʋ́rɛ Levi jaa vʋ́k'ɔɔsa busunnu, a nɛ́ ɓa há kéŋ níŋ cʋɔrɛ́ lɩ́sɛ salmɛ rɩ́ wárɛ busunnu ɛ́. Ká rɩ́wɔ́ wóllí ɔsɛ vʋka aá pá Nyuutɩna Wɩɩsɛ, anɛ ɛ́ há makɛ.4 Nyuutɩna Wɩɩsɛ sɩ́ collí Ziida, rɩ́ Zerizalɛmɛ nɩɛ satɔ́rɩ́pállɛ anɛ tésíé mí ʋ fa há cówó ɛ́.5 Nyuutɩna Wɩɩsɛ sɛ: “Ɩ́ nɩɛ ná háá tʋŋ hɩlɩ́, rɩ́ nɩɛ ná háá tʋŋ cɔ́rmʋ́, rɩ́ nɩɛ ná háá tá nʋɔ ká wɩ cɩ́nɛ́ áá tɩkɛ ɛ́ nʋɔ, rɩ́ nɩɛ ná háá vɩ́rwɔ́ tʋtʋnna, rɩ́ nɩɛ ná háá bɛŋsɛ bisíŋsi rɩ́ yúháála, rɩ́ nɩɛ ná háá bɛŋsɛ nɩhʋɔra, arɩ́ nɩɛ ná há wɩ zilé mʋɔ wuu kené cáásɩ́ŋ é Nyuutɩna Wɩɩsɛ, ŋ sɩ́ ko dííwa sarya.”» Nyuutɩna Wɩɩsɛ doé wuu tɩna Wɩɩsɛ nɛ́ bʋ́l ɛ́.
Wɩɩsɛ yɩrʋ́ nɩɛ rɩ́wɔ́ bɩrko dɩhɩ̃́
6 «Ná, ŋ é Nyuutɩna Wɩɩsɛ wɩ bɩ́rsɛ́, ŋ nána nɛ́ wuu. Ɩ́ má nɛ́ ka Zakɔbɛ duo nɩɛ a kaa mʋ́ wuu. 7 A pɔ́ɩ́wa naábalwa tɛ́ŋ wuu mí, ɩ́ vɛ́ŋ wɩ́bʋlɛ tɩŋɛ́. Ɛ́ nɛ́, ŋ yɩ́rɩ́wa, rɩ́ɩ́wa bɩrkóŋ rí, ká rɩ́ŋ má bɩrkóíwa rɩ́. Ŋ é Nyuutɩna Wɩɩsɛ doé wuu tɩ́na Wɩɩsɛ nɛ́ bʋ́l ɛ́. Amá, ɩ́ sɛ:“Béé mí rí, ɩ sɩ ráá bɩrkóí rí>>” (“Ɛrɛ́wa rɛ́ ɩ sɩ rá bɩrkóé rí>>”) 8 Ŋ sɩ́ɛ́ có rɩ́ŋ bɔ́sɩ́wa a ná: Nɩbiino sɩ́ wólli gɩrmɛ Wɩɩsɛ>> Ká ɩ́ é gɩ́gɩrmɩ́ŋ! Ká sɩ́ɛ́ sáŋ aá bɔsɩ́ŋ a bʋlɛ: “Bee mí rí á gɩ́rmɩ́>> Ɩ́ onni fí nyúú kere, arɩ́rɩ́wa satɔɔrɩ́pállɛ mɛ́ nɛ́, ɩ́ gɩ́gɩrmɩŋ. 9 Ɛ wɩ́ɛ́, ɩ́ nɩɛ ná wuu háá gɩrmɩŋ, bʋra sɩ́ dííwa tɔ́ɔ́ ná nɩɛ wuu duó 10 Ɩ́ lɩ́sɩ́wa onni fí nyúú kere, ʋ sɩ́ɩ́ mɛ́, a kaa ko wɩcʋɔlɩ́jaa, rɩ́ ɓɩdííle mɩŋ róŋ tɛ́ŋ wuu mí. Ɩ́ sáánɩ́ŋ é Wɩɩsɛ, a tʋŋ ɛ́, ká ná, ŋ há sɩ́ wúrí bána ká rɩ́ barkawa ɓɩkana tuwíwa nyúú. Ŋ é Nyuutɩna Wɩɩsɛ, doé wuu tɩ́na Wɩɩsɛ nɛ́ bʋl ɛ́. 11 Ŋ sɩ kiri hʋɔ̃́yórówa rɩ́wɔ́ sɩ́ɩ́wa baksɛ óŋpárɛ zɔ́kʋ́, ká rɩ́wa baksɛ viinyiwa nɔŋ kɩ́ŋkáŋ. Ŋ é Nyuutɩna Wɩɩsɛ, doé wuu tɩ́na Wɩɩsɛ nɛ́ bʋlɛ. 12 Ŋ sɩ́ a rɩ́ɩ́wa tɔ́ɔ́ ná mɩŋ tɛ́ŋfɩɛ́l mɛ́, rɩ́ duhʋɔra ná há kílíwa wuu ná, a bʋ́bʋlɩ́wa barkawa wɩ́ɛ́. Ŋ é Nyuutɩna Wɩɩsɛ, doé wuu tɩ́na Wɩɩsɛ nɛ́ bʋ́lɛ́.»
Kal ná Wɩɩsɛ háá a rʋ́ʋ́ díú sariya wɩ́ɛ́
13 Ná, Nyuutɩna Wɩɩsɛ há sʋ́ʋ́ na: «Ɩ́ bʋ́l wɩ́ɛ́ ná há duókó ní a caasɩ́ŋ é Nyuutɩna Wɩɩsɛ, ká bʋlɛ: “Bee wɩ́tɩɛ́nnɛ rɛ́ á vʋʋrɛ bʋl, a caasɩ́ >> ” 14 Ɩ́ noú ná ɩ́ há bʋ́lɛ́ caasɩ́ŋ: “Ɩ́ sɛ, Wɩɩsɛ tʋŋ pɛ́ɛ́ wɩ nyʋɔrɛ́ mʋɔ́ wuu kene.” Bee wɩ́ɛ́, á saŋɔ́ tɩŋʋ́ kɩ́ŋse ná wuu, a su sazɔkɔ́ gɛnnɛ, a pɛ́ billi Nyuutɩna Wɩɩsɛ, doé wuu tɩ́na Wɩɩsɛ sɩ́ɛ́, ká ɓa ɛ́ wuu a wɩyɔɔwa. 15 Ɩ́ báá há sɛ: Rɩ́ nyʋ́ktɩɩna rɩ́ wɩ́tɛ'aara nɛ ká wernaara. Ɓáá tʋŋ bɔŋbɔŋ a kɩ́ɛ́rɛ Wɩɩsɛ nʋɔ mɛ́, kɔ́ʋ́ táŋŋʋ́ nʋ́ɔ́ aá bélwó!”»
16 Nɩɛ ná Wɩɩsɛ héwífɔ́ ha mɩ́ŋwɔ́ baŋcɩla mɛ́ sɩ́ɛ́ culli vʋʋrɛ. Ɛ́ nɛ́, Nyuutɩna Wɩɩsɛ zesi nɩ́wɔ́ wɩ́bʋlɛ́. Ɛ́ har mɛ́, ɓa pʋ́ŋsɛ nɩɛ ná wuu, há cɩ́nɛ tɩkʋ́ aá zilú yɩra. 17 Ɛ har mɛ́, Nyuutɩna Wɩɩsɛ, doé wuu tɩ́na Wɩɩsɛ sɛ: «Tapʋ́l rɩ́ kué, ŋ há sɩ́ makɩ́ŋ doé. Ɛ́ tápʋl ŋ sɩ́ kɛ́sɩ́ŋ nɩɛ kóŋ rí, rɩ́wɔ́ áŋ dʋ́ŋɔ́ tɩ́llɛ. Ŋ sɩ́ makɩŋ sawer a pɔ́wɔ́, anɛ bio áná háá tʋŋ sawer aá pɔ́ʋ́ bicollí ɛ́. 18 Ɛ́ tápʋl, ɩ́ báá sɩ́ ná rɩ́ cakɔ́ mɩŋ nɩwere, rɩ́ nɩbɔma pɛ́kɛ. Cakɔ́ sɩ́ mɩŋ nɩɛ ná há tʋmɛ́ aá pá Wɩɩsɛ, rɩ́ nɩɛ ná há vɛ́ɛ́ rɩ́wɔ́ tʋŋ pá Wɩɩsɛ pɛ́kɛ. 19 Ná, kál rɩ́ kué: Ɛ́ tapʋ́l sɩ́ nɛ̃ níŋtʋla, a dí nyʋktɩɩna rɩ́ wɩ́tɛ'aara wuu mʋ́ɔ́lɛ anɛ nyɔ́míŋ; rɩ́wɔ́ óŋ wuu báá sɩ́ káánʋ́. Ŋ é Nyuutɩna Wɩɩsɛ, doé wuu tɩ́na Wɩɩsɛ nɛ́ sɛ. 20 Amá, ɩ́ é nɩ́ɛ́ ná há saŋɛ́ aá zílíŋ, ɛ́ tapʋ́l, tɛŋfɩɛ́l wɩɩsɛ sɩ́ póŋ, rʋ́ wɩcuoló ka tɛŋfɩɛ́l ko pɛ́ɩ́wa. Ɩ́ sɩ lɩ́ɩ́ ɓenni, aá jʋɔsɛ anɛ nɔbɛlɛ ɓa há píí ɓɩdíwere dɩ́ɛ́sɩ́wɔ́ ɓa mɩ́ŋ tɛ́ŋfɩ́ɛ́l mɛ́ ɛ́. 21 Kal ná ŋ há sɩ́ makɩ́ŋ doé, Ɩ́ sɩ́ dí doé ɩ́ dɩŋdɔma nyúú, a nʋɔsɩ́wɔ́ aá va anɛ ŋmɛnɔ nyúú kuŋkulo. Ŋ é Nyuutɩna Wɩɩsɛ, há ká doé wuu tɩ́na Wɩɩsɛ nɛ́ sɛ.»
Wɩɩsɛ wɩ́laabʋllɔ Eli bɩrkóé wɩ́ɛ́
22 «Ɩ́ líísíwa tɩɩ, rɩ́ɩ́ kíŋse ná wɩ́ɛ́ ŋ tʋtʋnnɔ Moyizi há pié kármɩ́wa; Ɔrɛbɛ paalɔ nyúú ní, ŋ cɛ́ ká makɛ kíŋse rɩ́ wɩ́makɛ ná a pɔ́ʋ́, Ɩzɩrayɛl nɩɛ wuu yɩr mɛ́.