Zerizalɛmɛ laatɛ́ɛ́ rɩ́rʋ́ píŋ wɩ́ɛ́
12
1 Búóle.Ná Nyuutɩna Wɩɩsɛ há bʋlʋ́ ná a pá Ɩzɩrayɛl.
Nyuutɩna Wɩɩsɛ ná há á bána,
a nɛ́ a tíé má,
ká nɛ́ pi hiẽso hé nɩbííno mí nɛ́ bʋlɛ́, a bʋlɛ́:
2 «Ná, ŋ sɩ́ a rɩ́ duowa ná wuu há kíl Zerizalɛmɛ nɩɛ, sɩ́ɛ́ bíri ʋ wɩ́ɛ́. Tɛ́ŋ ná ɓa há sɩ́ yo Zerizalɛmɛ, Ziida má nɩɛ sɩ́ɛ́ sɩ́ bíri. 3 Óó, ɛ́ kal, ŋ sɩ́ a rɩ́ Zerizalɛmɛ nɛ dɔ́wɩ́ zimo, duowa ná wuu sɩ́ɛ́, ɓa há wʋ́ʋ́ wo kaá ɓɔ́. Nɛ́ŋ ná wuu há sɩ́ bɩ́ɩ́nʋ́ kaa ɓɔ́ɛ́, sɩ́ pɩ́rʋ́ tɩɩ. Dúníé nɩɛ wuu sɩ́ hé náŋá mɛ́ a cɩ́nʋ́ mɛ́. 4 Nyuutɩna Wɩɩsɛ sɛ́, ɛ́ kal, ŋ sɩ́ a rɩ́ héwíŋ fúkli záksɛ wuu ká rɩ́wɔ́ zɩ́zɩ́nna ná vɩ́váklɛ héwíŋ. Amá ŋ sɩɛ́ sɩ́ púl aá bel Ziida jaa mɛ́, ká rɩ́ŋ a rɩ́ duowa ná náŋa záksɛ wuu nyʋmmɛ. 5 Ziida nɩhɩ́ɛ̃́sɛ sɩ́ bʋ́lwɔ́ tɩɩ rɩ́ a bʋlɛ́: «Zerizalɛmɛ nɩɛ dóé lɛ́ Nyuutɩna Wɩɩsɛ ná há ká doe wuu tɩna, ɓa Wɩɩsɛ nɛ́.» 6 Ɛ́ kal, ŋ sɩ́ a rɩ́ Ziida nɩhɩ́ɛ̃́sɛ nɛ níŋhala há mɩŋ daasɛ mʋ́l, anɛ nyɔdúí níŋ há mɩŋ mɩ́záksɛ mʋ́l. Néduu arɩ́ nɛ́gʋɔ wuu, ɓa sɩ́ zɔkɛ duowa ná wuu há mɩ́ŋwɔ́ kíle. Amá Zerizalɛmɛ nɩɛ ha sɩ́ mɩ́ŋwɔ́ dɩkéni ná tɩɩ mɛ́.
7 Nyuutɩna Wɩɩsɛ sɩ́ la sɩ́ɛ́, a lá Ziida jaa nɩɛ a tá, a makɛ rɩ́ Davidi jaa nɩɛ wér arɩ́ Zerizalɛmɛ nɩɛ wér sɩ́ Ziida jaa nɩɛ ná náŋa kɩ́llʋ́. 8 Ɛ́ kal, Nyuutɩna Wɩɩsɛ sɩ́ cú a tɔ́ Zerizalɛmɛ nɩɛ mɛ́: ɓa sɩɛrʋ pʋ́ɔ́la sɩ́ bɩrmɛ bɩbár anɛ Davidi, ká rɩ́ Davidi duo nɩɛ nɩɛsɛ Wɩɩsɛ Zerizalɛmɛ nɩɛ rɩ́, a mɩ́ŋwɔ́ sɩ́ɛ́ anɛ Nyuutɩna Wɩɩsɛ málɩ́ka.
Tɔ́ɔ́ ná wuu sɩ́ wi yúó
9 Ɛ́ kal é, ŋ sɩ́ héŋ taŋá, a ɓʋ́ duowa ná wuu há kúé aá yo Zerizalɛmɛ. 10 Ká pi sabɩŋwero arɩ́ jɛnnɛ́ sabɩɩna a hé Davidi jaa nɩɛ arɩ́ Zerizalɛmɛ nɩɛ mɛ́. Ɓa sɩ́ bɩ́rwɔ́ sɩ́ɛ́ cɔ́ŋ mɛ́, nɛ́ŋ ná ɓa há cɔ́kɛ a kɩɛsɛ wɩ́ɛ́. Ɓa sɩ́ wíú yúó, anɛ bibalá yúó. Ɓa sɩ́ wíú yúó a híĩ́ni, anɛ ɛ́ ɓa háá wí bihɔ̃́ yúó. 11 Ɛ́ kal, yúó sɩ́ zuki Zerizalɛmɛ mɛ́, anɛ ɛ́ veno Hadadɩrɩmɔŋa yúó há zúke Megido típaŋtaŋɩ́ mɛ́. 12 Tɔ́ɔ́ ná sɩɛrʋ duó wuu má sɩ́ wi yúó ná, ʋ cɔɔ rɩ́: Davidi duo nɩɛ wíwíwó cɔɔ rɩ́, báála ɓa dʋŋɔ, háála má ɓa dʋŋɔ; Nataŋ duo nɩɛ ɓa cɔɔ rɩ́, báála ɓa dʋŋɔ, háála má ɓa dʋŋɔ;
13 Levi duo nɩɛ ɓa cɔɔ rɩ́, báála ɓa dʋŋɔ, háála má ɓa dʋŋɔ;
Simeyi duo nɩɛ ɓa cɔɔ rɩ́, báála ɓa dʋŋɔ, háála má ɓa dʋŋɔ;
14 duowa ná naŋá má wuu, oro wuu ʋ cɔɔ rɩ́, báála ɓa dʋŋɔ, háála ɓa dʋŋɔ.