Tɔ́bɩbara bɩ́rmɛ́ pʋɔllɛ
11
1 Liibaŋ dɩtɩ́llɛ, wúrí dánnʋʋsɛ,ká rɩ́ níŋ díí sɛɛdɩrɛ tuuni.
2 Siipɩrɛ tuuni, ɩ́ hiĩni,
beé wɩ́ɛ́, sɛɛdɩrɛwa ɓállɔ́,
beé wɩ́ɛ́, tuzeŋsi ɓállɔ́.
Basaŋ dɩtɩ́llɛ tuuni ná há ka sɛ́nɛwa, ɩ́ hiĩni,
beé wɩ́ɛ́, ɩ́ kʋkɔrɔ ná há wɩ wúó zʋ, ʋ ténnó.
3 Ɩ́ zesi penʋɔla hiĩné,
beé wɩ́ɛ́, omo ná há tɩ́wɔ́ wér ténnó, ɓa wér ténnó.
Ɩ́ zesi kɩ́ŋkaŋbɛlɛ uuré,
beé wɩ́ɛ́ Zʋrdɛŋ fuo nʋɔ nyʋkɔ́ ténnó.
Penʋɔla bɛllɛ wɩ́ɛ́
4 Ná Nyuutɩna Wɩɩsɛ, ŋ Wɩɩsɛ há sʋ́ʋ́ ná: «Nʋɔlɛ piẽŋse ná ɓa haá já rɩ́wɔ́ kaa mʋ́ ɓʋ́. 5 Nɩɛ ná há yɔ́wɩ́wɔ́, kaa mʋ́ aá ɓʋ́ nɛ́, ká bɩɩnɛ rɩ ɛ́ to wɩ́bɔ́ŋ, nɩɛ ná haá yɛ́llɛ má sɛ́: “Nyuutɩna Wɩɩsɛ bárká, á ká kuóré!” Ká ɓa penʋɔla má tɩɩ wʋ́ɔ́ susú fa. 6 Ɛ́ wɩ́ɛ́, ŋ báá waá a rɩ́ŋ fa tíé nyúú nɩbííne susu, Nyuutɩna Wɩɩsɛ nɛ́ sɛ́. Ŋ sɩ́ a rɩ́ nɩbííne gɩrɛ dí bɩbarɩ́ náŋá rɩ́, ká rɩ́wɔ́ kuóre má dí bɩbarɩ́ ɓa nyúú. Kuóre sɩ́ zɔkɛ tɔ́ɔ́, amá ŋ wɩ nɩɛ láá tá ɓa nɛ́ŋsa mɛ́.» 7 Ɛ́ nɛ́ ŋ bɩrmɛ piẽŋse ná, báyɛlɛ́ fa háá já rɩ́wɔ́ ɓʋ́ʋ́sɛ penʋɔlɔ. Ŋ já penʋɔlɛ́daasɛ bɛllɛ. Ŋ hé dʋ́ŋdʋ́ʋ̃́ ɓɩnɔ́ yɩr « Naŋnɔ́ŋnɩ́”, ká hé bʋllɛ ɓɩnɔ yɩr “Nʋtʋmɛ”, káŋ sɩɛ́ nʋnʋɔlɛ pʋsɛ ná. 8 Káŋ kiri penʋɔla ná botoro cana balá mɛ́. Ŋ wɩ wóllé dí nyamma piẽŋe ná nyúú, ká ɓa má sɩɛrʋ lɩ́ŋ. 9 Ɛ́ nɛ́ ŋ sɛ́: «Ŋ báá wɩ́ɩ́wa nʋɔlɛ! Ɓa ná há sɩ́ sʋsɛ, rɩ́ ɓá sʋsɛ! Ɓa ná há sɩ́ yʋ́ksɛ, rɩ́ ɓá yʋ́ksɛ! Ɓa ná há sɩ́ káánɛ, rɩ́wɔ́ gɩrɛ dí náŋá!» 10 Ká píŋ penʋɔlɛ́daa ná yɩr há ká “Nanɔŋnɩ́”, a bónni, a zɔkɛ nʋtʋŋ ná ŋ fa há bílíŋ rɩ́ nɩɛ wuu pɛ́kɛ. 11 Ɛ́ tápʋl nɛ́, nʋtʋmɛ ná zɔkɛ, ká pebáyɛ́lgɩ́ŋgɩ́rtɩɩna ná fa haá kɩ́ɛ́lɩ́ŋ, sɩɛ́ zɩŋ rɩ́ Nyuutɩna Wɩɩsɛ wɩ́bʋlɛ nɛ́. 12 Ɛ́ nɛ́ ŋ bʋlwɔ́ rɩ́ a bʋlɛ́: «Rɩ́ɩ́wa có, ɩ́ túmíŋ túme páŋ, rɩ́ɩ́wa wɩ có, ɩ́ lo.» Ɛ́ nɛ́ ɓa túmíŋ túme a páŋ, wárɛ mɛrɛ́ arɩ́ fí. 13 Nyuutɩna Wɩɩsɛ bʋlɩ́ŋ rɩ́ a bʋlɛ́: «Pi túme ɓɩwero né a pá lukro, ɓa kérsíŋ, rɩŋ mɔhɛ̃́ ɛ́ nɛ́.» Ɛ́ nɛ́ ŋ pi wárɛ ná mɛrɛ́ arɩ́ fí ná a yo pa lukro, Nyuutɩna Wɩɩsɛ Jɩzeno sɩɛrʋ. 14 Káŋ píŋ bʋllɛ penʋɔlɛ́daa ná yɩr há ká “Nʋtʋmɛ” ná a bónni a zɔkɛ nʋtʋmɛ ná há mɩŋ Ziida arɩ́ Ɩzɩrayɛl pɛ́kɛ. 15 Nyuutɩna Wɩɩsɛ baa bʋlɩ́ŋ rɩ́ a bʋlɛ́: «Mʋ́l né mí, tʋ́ŋ penʋɔlɩcʋʋlɛ́ tʋ́tʋ́mɛ́. 16 Beé wɩ́ɛ́, ŋŋ́ já rɩ́ŋ tʋŋ penʋɔlɔ nɔ́ŋɔ nɛ́ tɔ́ɔ́ né sɩɛrʋ: ʋ waá a rʋ́ʋ́ bɩɩnɛ piẽŋso ná há cɛ́ sʋʋ mɛ́ wɩ́ɛ́; ʋ ná há yʋ́ksɛ́, ʋ waá a rʋ́ʋ́ jɔ́ʋ́; ʋ ná há pɩ́rɛ́, ʋ waá a rʋ́ʋ́ váárʋ́; ʋ ná tɛŋ há fɩ́ɛ́lɔ́, ʋ waá a rʋ́ʋ́ dɩ́ɛ́sʋ́. Amá ʋ sɩ́ dí pʋsɛ ná há vʋ́ɛ́, a tuwi a yákwɔ́ nacɩ́ksɛ má tɩɩ mɛ́.»
17 Nyúbɔ́ŋ sɩ́ pérí penʋɔlɩcʋʋlɛ́ ná
há pí pʋsɛ ná a tá!
Rɩ́ tókowí zɔ́kʋ́ nɛ́sɛ
ká tókú néduu sɩ́ɩ́!
Rʋ́ʋ́ vaamɔ sʋwɛ,
a sʋwɛ ɓóŋ,
rʋ́ʋ́ néduu sɩ́ɩ́ toki!
a toki ɓóŋ.