Ɩ́ sʋl Nyuutɩna Wɩɩsɛ rɩ́, ká sɩ́ venni rɩ́ sʋlʋ́
10
1 Ɩ́ sʋl Nyuutɩna Wɩɩsɛ rɩ́,rʋ́ʋ́ pɛ́ɩ́wa yɩbɩ́ŋ duóŋ:
ʋ nɩ́ɩ́ a duó pozeŋsi isí;
Ʋ sɩ́ pɛ́ɩ́wa duózeŋsi
ká a rɩ nɛ́ŋ wuu baka oŋnyɩ́sɛ́ bíri.
2 Beé wɩ́ɛ́, venni wɩ́bʋlɛ́ ká wɩ́yɔ́ɔ́wa,
ká vʋra má wɩ́náálɛ a nyɩ́ɛ́nnɛ́,
ɓa duosewa wɩ mʋ́l kené
ká ɓa nɩbʋɔlɔ́ má a nyɩsɛ́.
Ɛ́ nɛ́ tɛ nɩɛ bɩ́baarɛ
a ka susu anɛ pieŋse há wɩ penʋɔlɔ kené.
Laatɛ́ɛ́ nʋtállɛ wɩ́ɛ́
3 Pʋnʋɔlɩ́bɔma nyúú ní, ŋ cɔ́ɛ́ pusi,
ŋ sɩ́ cɛ́ ɛ́ bʋŋgboksi mí.
Óó, ŋ é Nyuutɩna Wɩɩsɛ ná há ká dóé wuu tɩ́na,
ŋ sɩ́ bél Ziida duó nɩɛ mɛ́,
anɛ ɛ́ pʋnʋɔlɔ́ haá bélú pʋsɛ mɛ́.
Ŋ sɩ́ káŋwɔ́ anɛ záka ná há kéŋ yɩr,
a mʋ́ lal.
4 Kuóre duó wuu sɩ́ lɛ́ Ziida duó sɩɛrʋ nɛ́
ɓa sɩ́ ká dóé anɛ nagbáŋjɛ́ dɔ́wɩ́,
ɓa sɩ́ ká dóé anɛ táŋtɛ dápe,
ɓa sɩ́ ká dóé anɛ lalyóórí túó.
5 Ɓa sɩ́ nɛ́ lalyóóríbɩbara,
aá táákɛ nɩɛ lal mɛ́ anɛ ŋmɛ́ŋsɛ pɩpɛrɛ́.
Ɓa sɩ́ yo ɛ́,
beé wɩ́ɛ́, Nyuutɩna Wɩɩsɛ mɩ́ŋwɔ́ har,
ká rɩ́wɔ́ dɩŋdɔma ná há zɛ́ záksɛ dí hɩ́ɩ̃́sɛ.
6 Ŋ sɩ́ dúóri Ziida nɩɛ naasɛ,
ká la Zɔzɛfɛ jaa nɩɛ a tá.
Ŋ sɩ́ fáwɔ́ susu, a bɩr káŋwɔ́ kówó dɩmɩnɩ́,
anɩ́ŋ rá fa wʋ́ɔ́ vɛ́ɛ́ tá.
Beé wɩ́ɛ́, ŋ nɛ́ ká Nyuutɩna Wɩɩsɛ, ɓa Wɩɩsɛ,
ŋ sɩ́ sáŋwɔ́ sʋlɛ́ má.
7 Ɩfɩrayɩŋ nɩɛ sɩ́ dí ballɩ́, anɛ lalyóóribɩbara,
ɓa sɩ́ ká satɔrɔ́ anɛ ɓa há nyɔ dɩvɛ́ŋ.
Ɓa bɛlɛ sɩ́ ná ɛ́, a jʋɔsɛ,
rɩ́wɔ́ sɩɛnnɛ sú rɩ́ satɔrɔ́ Nyuutɩna Wɩɩsɛ yɩr mɛ́.
8 Ŋ sɩ́ yɩ́rwɔ́, a hé náŋá mɛ́,
beé wɩ́ɛ́, ŋ sɩ́ yɔ́wɛ́ a láwɔ́,
ɓa sɩ́ pul kɩ́ŋkáŋ má, anɛ dʋ́ŋdʋʋ̃́ mɛ́.
9 Ŋ pɩ́sɩ́wɔ́ hé duowa náŋa sɩɛrʋ,
amá, dɩbole má tɩɩ mɛ́, ɓa sɩ́ bɩ́ɩ́nɩ́ŋ wɩ́ɛ́,
ɓa rɩ́wɔ́ bɛlɛ sɩ́ ná waaná,
ká bɩrko má.
10 Ŋ sɩ́ lɩ́sɩ́wɔ́ Ezipiti tɔ́ɔ́ mɛ́,
arɩ́ Asiri tɔ́ɔ́ mɛ́, a káŋwɔ́ bɩrko hé náŋá mɛ́.
Ŋ sɩ́ káŋwɔ́ a ko Galaadɛ arɩ́ Liibaŋ tɔ́nɛ sɩɛrʋ,
ká ɛ́ má tɩɩ, rɩ dɩhɩ̃́ sɩ́wɔ́ pérú.
11 Ɓa sɩ́ daarɛ sazɔkɔ mʋʋ mɛ́,
ŋ é Nyuutɩna Wɩɩsɛ sɩ́ ŋmɔwɛ mʋʋ nyihíkle.
Níl fuo ná má tɩɩ rɩ́rʋ́ lúŋ ná wuu, mʋ́l sɩ́ nyɩɩsɛ.
Asiiri tɔ́ɔ́ nyʋkɔ sɩ́ nyɔ ráŋ
ká rɩ́ Ezipiti tɩ́ŋ tenni.
12 Ŋ sɩ́ páŋ nɩɛ dóé,
ká rɩ́wɔ́ vɩválɩ́ŋ yɩr mɛ́
Ŋ é Nyuutɩna Wɩɩsɛ nɛ́ sɛ́.