ƖZƖRAYƐL ARƖ́ DUOWA NÁ NÁŊA WƖ́Ɛ́
Nyuutɩna Wɩɩsɛ sɩ́ dí Ɩzɩrayɛl kénnináŋa sarɩ́ya
9
1 Búóle.Nyuutɩna Wɩɩsɛ wɩ́bʋlɛ́ pérí Hadɩrakɛ dɩtɩ́llɛ,
ká mʋ́ yakɛ Damaasɛ tɔ́ɔ́ mɛ́.
Beé wɩ́ɛ́, Nyuutɩna Wɩɩsɛ sɩ́ɛ́ cɔ́ nɩbííno é wuu mí,
anɛ ɛ́ ɓa há cɔ́ Ɩzɩrayɛl jɩmʋ́ʋ́la ná wuu mí.
2 Ʋ bʋlɛ́ ná peri Hamatɛ má há mɩŋ Damaasɛ laka,
arɩ́ Tiiri rɩ́ Siidoŋ tɔ́nɛ ná há kéŋ zɩ́mɛ́ kɩ́ŋkáŋ.
3 Tiiri nɩɛ sɔ́ zeŋe a kɛ́rwɔ́ tɩɩ mɛ́,
ɓa pu warɛ kɩ́ŋkáŋ, ɓa isi anɛ kuŋkulo,
ká pú salmɛ má, anɛ ŋmɛ́nɔ pɩpɛrɛ́.
4 Amá Nyuutɩna sɩ́ láwɔ́ tɔ́ɔ́ a tɩ́llʋ́,
ʋ sɩ́ yíkú zekɛ́rɛ ná yo mʋʋ sɩɛrʋ,
ká rɩ́ níŋ dí Tiiri tɩɩ wuu.
5 Asɩ́kalɔŋ nɩɛ há sɩ́ ná ɛ́, héwíŋ sɩ́ káŋwɔ́
Gaaza nɩɛ sɩ́ váklɛ kɩ́ŋkáŋ,
Ɩkɩrɔŋ nɩɛ má ɛ́ tɩɩ,
beé wɩ́ɛ́, ɓa dɩtɩ́ɛ́kɩ́ ná ɓa fa háá yɩɛlɛ́ hɩ́ɩ̃́sɩ́wɔ́.
Gaza kuóro sɩ́ nyɩ́ɩ́kɛ,
ká rɩ́ Asɩ́kalɔŋ tɔ́ɔ́ báá sɩ́ nɩɛ kánʋ́.
6 Nɩgúóléwa nɛ́ sɩ́ ké Asɩ́dɔɔdɛ mɛ́.
Nyɛ nɛ́ ŋ sɩ́ a rɩ Filisiti nɩɛ nyʋkɔ nyɔ ráŋ.
7 Ŋ sɩ́ lɩ́sɛ pʋsɛ ná ɓa há wɩ ɓʋʋsɛ
rɩ́ cɛ́l bɩsɛ namɩŋsa, ɓa nyɩla pɛ́ksɛ,
arɩ́ venni ɓɩdííle ɓa nʋʋsɛ mɛ́ a.
Ɓa nɩkáánɛ ná má sɩ́ áŋ nɩɛ,
anɛ Ziida duo nɩɛ.
Ɩkɩrɔŋ nɩɛ sɩ́ zʋ́ŋ nɩɛ sɩɛrʋ
anɛ ɛ́ Zebusitiwa há zʋ́ɛ́.
8 Ŋ nɛ́ sɩ́ cú a tɔ́ŋ tɔ́ɔ́ mɛ́, a kɛ́rʋ́ nɩɛ mɛ́
rɩ́ dɩŋdɔma ná haá jáwɔ́ yóé,
oro báá sɩ́ kó bɛ́ŋsɩ́wɔ́,
beé wɩ́ɛ́, mʋ́l né mí ŋ sɩ́ɛ́ cɔ́wɔ́ mɛ́.»
Kuóro ná há múúrú tɩɩ, a ka tɛŋfɩ́ɛ́l aá ko
9 Ɩ́ jʋɔsɛ satɔrɔ́ kɩ́ŋkáŋ, Sɩɔŋ nɩɛ.
Ɩ́ hé satɔrɔ́ kulí, Zerizalɛmɛ nɩɛ! b
Ɩ́ ná, ɩ́ kuóro níí kóíwa rí,
ʋ nɛ́ ká taŋá, a a bɩbár,
ʋ múúrú tɩɩ, a zɛ́ kokúme,
a ké kokúwie daha, kokúmáá bio.
10 Ʋ sɩ́ a rɩ́ lalyóórítórkowa nyɩ́ɩ́kɛ Ɩfɩrayɩŋ mɛ́,
ká Zerizalɛmɛ mɛ́, rʋ́ʋ́ a rɩ́ záksɛ nyɩ́ɩ́kɛ.
Ʋ sɩ́ bónni lalyóórítoni,
ká pá duowa tɛŋfɩ́ɛ́l.
Ʋ dɩtɩ́llɛ sɩ́ pɔ́ mʋʋ nɔ́ŋɔ mɛ́ ká mʋ́ yakɛ nɔ́ŋɔ mɛ́ c,
a pɔ́ Ɩfɩratɛ fuo mí ká mʋ́ yakɛ dúníé tókó mí.
Nɩkɛsɛ́ laatɛ́ɛ́ wɩ́ɛ́
11 Nyuutɩna Wɩɩsɛ sɛ́:
«A tɩ́ŋɩ́ŋ nʋtʋmɛ ná ŋ há pi vʋk'ɔsɔ́ cɛ́l mallɛd,
a bílíŋ rɩ́rɩ́ɩ́wa pɛ́kɛ,
ŋ sɩ́ lɩ́sɩ́wa lal yósi,
vilɓoo ná há wɩ nyii kené sɩɛrʋ.
12 Ɩ́ é lalyósi, ɩ́ kéŋ yɩɛla kɩ́ŋkáŋ,
ɩ́ bɩrmʋ́ɩ́wa tɔ́sɔɔkɛ́rɛ ná.
Ŋ nɛ́ bʋlɛ́ a pɛ́ɩ́wa zaa tɩɩ:
Ŋ sɩ́ tʋ́ŋ wérí a túmíwa naasɩ́ bʋllɛ.
13 Ŋ sɩ́ pi Ziida a bɩrmɩ́ŋ tuó,
Ɩfɩrayɩŋ nɩ́ ká túhɛŋ.
Sɩɔŋ, ɩ bɛlɛ nɛ́ ŋ sɩ́ tʋŋ
rɩ́wɔ́ mʋ́ yo Yaavaŋ bɛlɛ, e
ɓa nɛ́ ŋ sɩ́ pi a pɔ́, anɛ lalyooro tókowí.»
14 Nyuutɩna sɩ́ nyɩ́ɩ́sʋ́ tɩɩ ʋ nɩɛ nyúú rí,
ká rʋ́ʋ́ hɛŋ lɛ anɛ duófɩ́llɔ.
Nyuutɩna Wɩɩsɛ sɩ́ mu nyɩ́la,
ʋ sɩ́ tɩŋ wɩɩsɛ dɩpomí néduu duópoowa mɛ́ a va.
15 Nyuutɩna Wɩɩsɛ ná há ká dóé wuu tɩ́na sɩ́ pɔ́ʋ́ nɩɛ mɛ́,
ɓa dɔ́wɩ́yooló dɔ́wʋ́ɔ́ sɩ zɔ́kwɔ́ dɩŋdɔma, a búksíwó;
ɛ́ dɔ́wʋ́ɔ́ sɩ́ nyɔ cɛ́l anɛ dɩvɛ́ŋ,
ɓa sɩ́ líwí cɛ́l sɩɛrʋ anɛ cɛ́l loŋŋo,
ɓa sɩ líwí cɛ́l sɩɛrʋ anɛ koro nyɩ́sɛ.
16 Ɛ́ tɛ́ŋ mɛ́, Nyuutɩna Wɩɩsɛ sɩ́ lɔ́ʋ́ nɩɛ a tá
anɛ pʋnʋɔlɔ há lɔ́ʋ́ pʋsɛ aá tá ɛ́.
Ɓa sɩ́ tʋlʋ́ tíé nyúú
anɛ dɔ́wɩ́were ná há mɩŋ kuónéŋcú mí.
17 Nówó haá kóó ná wér ɛ́!
Nówó haá kóó hé bɛ́llɛ́ mɛ́ ɛ́!
Bíle arɩ́ dɩvɛ́ŋfɛlɛ sɩ́ pá
bápʋɔsɛ́ arɩ́ hápʋɔsɛ́ dóé.