Zona sɩɛrʋ zɔ́kɔ́ ɛ́ nɛ́ Nyuutɩna Wɩɩsɛ sɩ́ ɛ́ wɩ mɔhɛ̃́
4
1 Ɛ́ wɩ́ɩ́ wɛ Zona mɛ́ kɩ́ŋkáŋ ʋ cɔ́ɛ́ wɛ. 2 Ʋ cʋɔlɛ Nyuutɩna Wɩɩsɛ a bʋlɛ́: «Ah, Nyuutɩna Wɩɩsɛ, wɩ́ɩ́ ná ŋ há bʋlɛ́, cɛ́rɛ ná mɛ́ ŋ fa há mɩ́nɩ́ŋ tɔ́ɔ́ mɛ́ rá rɛ́? Ɛ́ nɛ́ tɛ ŋ fá mʋ́ Tarsisi. Ŋ ɩ́ɔ̃́ rɩ́ ká Wɩɩsɛ ná há kéŋ zile, a fɩ́fá nɩbííno susu, ɩ cɔ́ɛ́ wɩ lʋŋ, kɛ́ɩ́ sawér má a ɓɩzéní ɩ wɩ bɔ́ŋbɔ́ŋ ja. 3 Mʋ́l né mí Nyuutɩna Wɩɩsɛ láŋ mɩɩsɛ, bee wɩ́ɛ́ ŋ có sʋʋ nɛ́ kɩ́llɛ hiẽso.» 4 Nyuutɩna Wɩɩsɛ sɛ́: «Ɩ há lóé ɩ cɔ́ɛ́ wɛ ɩ a wérí rí?» 5 Zona lɛ tɔ́ɔ́ ná sɩɛrʋ a lɩɩké tɔ́ɔ́ mʋ́l; a sɔ lɔk a zʋʋ kénú fɩ́ɛ́l mʋ́l, a makɛ rʋ́ ná wɩɩ ná há á rʋ́ tʋŋ tɔ́ɔ́ ná mɛ́. 6 Ɛ́ nɛ́ Nyuutɩna Wɩɩsɛ a, tupúke* nyʋ́ a isi culli Zona mɛ́, a makɛ rʋ́ʋ́ hé fɩ́ɛ́l pɔ́ʋ́, ká rʋ́ cɔwɩɩlɔ́ má pɔrɛ. Zona sɩɛrʋ tɔrɛ kɩ́ŋkáŋ tupúke ná wɩ́ɛ́. 7 Amá tɔ́ɔ́ há pʋ́lɛ́ cɩ́cʋɔ fól, Wɩɩsɛ ɔ́ɔ́ deŋdul ko dí tupúke ná; ɛ́ nɛ́ tupúke ná sʋwɛ a hɩl. 8 Cɩ́cʋɔ wɩpomí mí, Wɩɩsɛ ɔ́ɔ́ polʋmɔ lɛ tɔ́ɔ́ mʋ́l ko, wɩɩsɛ má háksɛ a ŋmɔwɛ Zona nyúú mí, ʋ wuu bɛklɛ a pɛ́. Ɛ́ nɛ́ ʋ sɛ́: «Ŋ có sʋʋ nɛ́ kɩ́llɛ hiẽsó.» 9 Wɩɩsɛ bʋl Zona rɩ́ bʋlɛ́: «Ɩ há lóé ɩ cɔ́ɛ́ wɛ tupúke ná wɩ́ɛ́ ɩ á wérí rí?» Ɛ́ nʋ́ʋ́ sɛ́: «Oo, ŋ á wérí ŋ cɔ́ɛ́ há wɩ́ɛ́ ŋ cólli sʋʋ.» 10 Ɛ́ nɛ́ Nyuutɩna Wɩɩsɛ sɛ́: «Ɩ é fá tupúke ná susu, ká wɩ wɩɩla oro wuu né ʋ wɩ́ɛ́ kɔ́ʋ́ barɛ. Ʋ nɛ́ nyʋ́ʋ́ tɩɩ mɛ́ tɩ́taŋ balá, ká baa sʋwɛ tɩ́taŋ balá. 11 Ká rɩ́ŋ é sɩɛ́ sɩ́ Ninivi susu fá, tɔjɛlɔ ná nɩbííne há kɛ bʋ́ɩ́ zɔlɔ rɩ́ mɛrɛ́, a wʋ́ɔ́ néduu rɩ́wɔ́ nágʋɔ wuó caksɛ náŋá mɛ́, pʋsɛ ɓɩkana má mɩŋ ráŋ.»