Zona 3

Zona bʋ́l Wɩɩsɛ wɩ́bʋlɛ pá Ninivi tɩ́náwa, ɓa sɩɛnnɛ bɩ́rsɛ

1 Nyuutɩna Wɩɩsɛ bʋ́l Zona rɩ́ naasɩ́bʋllɛ nyúú mi bʋlɛ́: 2 «Isi mʋ́ tɔ́jɛlɔ Ninivi a buóli wɩ́ɩ́ ná ŋ há sɩ́ bʋl pɛ́ɩ́.» 3 Ɛ́ nɛ́ Zona isi, a mʋ́ Ninivi anɛ ɛ́ Nyuutɩna Wɩɩsɛ há bʋ́lʋ́ rɩ́. Ninivi ká tɔ́jɛ́lɛ́ rɛ́ Wɩɩsɛ sɩ́ɛ́ mɛ́, a mɔ tápʋlɛ botoro vaakíle. 4 Zona púl a va tápʋ́l balá tɔ́ɔ́ ná sɩɛrʋ. A buóli bʋlɛ́: «Ʋ káánɛ tápʋlɛ mɛɛ́sɛllɛ, ká rɩ́ Ninivi wuu zɔkɛ.» 5 Ninivi tɩ́náwa la Wɩɩsɛ dí; ɓa buóli nɩɛ vɔsɛ nʋʋsɛ, a pa bɔ́tɔ́wa súwó tɩɩ*, a de pɔ́wɔ́ nɩhɩɛ̃́sɛ mɛ́ a kaa tuwi yákɩ́wɔ́ heŋbiisi mí. 6 Labáárɛ ko zʋ Ninivi kuóro dɩllɛ; ʋ ísú kuóɓasa daha, a wúrkú pɔklɔ́, ká pi bɔ́tɔ́ súú tɩɩ, a zʋʋ ké tapʋmmɔ sɩɛrʋ*. 7 Kuóro ɔ́ɔ́ ɓa buóli liŋó né Ninivi sɩɛrʋ, ʋ rɩ́rʋ́ nɩpiŋe wuu sɛ́ mɛ́ a bʋlɛ́: «Rɩ́ nɩbííne arɩ́ pʋsɛ, pʋzeŋsi rɩ́ ɓɩwɩɛla oro wuu sɩ́ oŋ dí, a sɩ́ nyɔ́ɔ́ má dí, a sɩ́ nyii nyɔ́. 8 Rɩ́ nɩbííne arɩ́ pʋsɛ su bɔ́tɔ́wa, rɩ́ ɓa búŋsi hé Wɩɩsɛ mɛ́ arɩ́ doé, ká rɩ́ nɛrɔ wuu bɩrsɛ a tá wɩ́tɩɛnnɛ ɛɛ, arɩ́wɔ́ nɛ́ŋsa sahaksɩ́ wɩ́ɛ́ ɛɛ. 9 Áŋ rɩ́ né rɩ Wɩɩsɛ wɩ hár nʋkɛ ká bɩ́rsʋ́ sɩɛrʋ, rɩ́ tɔ́ʋ́ cɔwɩɩlɩ́zeno ná há mɩ́ŋ rá nyúú a makɛ rá sɩ́ sʋ́sʋ́?» 10 Wɩɩsɛ nóó rɩ ɓa á ɛ́ nɛ́, a píwó wɩ́laama ná má tá. Ɛ́ nɛ́ Wɩɩsɛ bɩ́rsɛ a tá bɔ́ŋbɔ́ŋ ná ʋ fa há á rʋ́ rɩ́rʋ́ pii tʋ́ŋwɔ́ mɛ́.