<<    <     AMƆSƐ     2     >    >> 
Nyuutɩna Wɩɩsɛ gáásɛ wɩ́ɛ́ Mʋwabɛ nɩɛ nyúú
2
1 Nyuutɩna Wɩɩsɛ sɛ́:
Mʋwabɛ nɩɛ nɩɓʋ́ʋ́rɩwɩ́ɛ́ dúkí nɛ́sɛ.
Ɓa sɩɛrʋ ɓɩ́bɔmɔ nɛ́ ká:
Ɓa físi Edoŋ kuóro heŋgbele, ɓa bɩrmɛ tapʋmmɔ.
Ɛ́ wɩ́ɛ́, ŋ há bɩ́ɩ́nɛ́ rɩ́ŋ tʋ́mʋ́ ná ɓa mɛ́, ʋ waá giri:
2 Ŋ sɩ́ tɔkɛ níŋ hé Mʋwabɛ tɔ́ɔ́ mɛ́,
rʋ́ʋ́ dí kuójɩɩsɛ ná há mɩŋ Keriyɔtɛ mɛ́.
Mʋwabɛ nɩɛ sɩ́ sʋsɛ vúkme sɩɛrʋ,
arɩ́ lal kʋɔlɛ sɩɛrʋ, arɩ́ lal nyɩ́la mui dɔ́mɛ sɩɛrʋ.
3 Ŋ sɩ́ ɓʋ́ sɩ́dííro ná há kéŋwó ké,
a zɔ́kʋ́ rɩ́rʋ́ kuówɩɛla wuu hé náŋá mɛ́.
Nyuutɩna Wɩɩsɛ nɛ́ bʋ́l ɛ́.
Nyuutɩna Wɩɩsɛ gáásɛ wɩ́ɛ́ Ziida dɩ́tɩllɛ nɩɛ nyúú
4 Nyuutɩna Wɩɩsɛ sɛ́:
«Ziida nɩɛ nɩɓʋ́ʋ́rɩwɩ́ɛ́ dúki nɛ́sɛ.
Ɓa sɩɛrʋ ɓɩ́bɔmɔ nɛ́ ká:
Ɓa vɛ́ŋ é Nyuutɩna Wɩɩsɛ nʋɔ wɩ́ɛ́,
ɓa wɩ́ŋ kíŋse sáŋɛ́;
beé wɩ́ɛ́ ɓa lóó, venni ná, ɓa ánáwa die há tɩ́ŋwɔ́ mɛ́, yéŋŋíwó.
Ɛ́ wɩ́ɛ́, ŋ há bɩ́ɩ́nɛ́ rɩ́ŋ tʋ́mʋ́ ná ɓa mɛ́, ʋ waá giri.
5 Ŋ sɩ́ tɔkɛ níŋ hé Ziida dɩtɩ́llɛ mɛ́, rʋ́ʋ́ dí kuójɩɩsɛ ná há mɩŋ Zerizalɛmɛ mɛ́.»
Nyuutɩna Wɩɩsɛ gáásɛ wɩ́ɛ́ Ɩzɩrayɛl dɩ́tɩllɛ nɩɛ nyúú
6 Nyuutɩna Wɩɩsɛ sɛ́:
«Ɩzɩrayɛl nɩɛ nɩɓʋ́ʋ́rɩ́wɩ́ɛ́ dúki nɛ́sɛ.
Ɓa kéŋ nɩtaŋá yɛ́llɛ a la meéwíé dí,
ʋ há wʋ́ʋ́ kɩŋ wúó túŋ wɩ́ɛ́.
a yɛ́llɛ summo, natɔwɔ yɛlɩ́ mɛ́.
Ɛ́ wɩ́ɛ́, ŋ há bɩ́ɩ́nɛ́ rɩ́ŋ tʋ́mʋ́ ná ɓa mɛ́, ʋ waá giri.
7 Ɓa hɩ́ɛ̃́ŋ nɩ́ ká rɩ́wɔ́ nʋ́ɔ́sɛ nɩyaara aá va, anɛ tíé;
rɩ pʋɔla kéŋ taŋá má sarɩya mɛ́, ɓa wɩ taŋá píé aá pɔ́ʋ́;
bio rɩ́rʋ́ áná má tɩɩ suki aá pɛ́ toló balá, a zɔ́kɩ́ŋ é Nyuutɩna Wɩɩsɛ yɩr ná há wɩ busunnu kené. 8 Gɛnnɛ ná nɩɛ há kené ko bil ká kɩ́ŋ ɓɩɛ ɓa rɩ́,
ɓa daha nɛ́ ɓa zɛ́ aá pɛ́, ɓa wɩŋsa dɩɓaarɛ́ wuu mí;
ɓa venni jɩɩsɛ mɛ́,
ɓaá nyɔ dɩvɛ́ŋ ná ɓa há la nɩɛ rɩ́, ɓa kɩma mʋ́ʋ́la mɛ́. 9 Ká ɓa sɩ́ɛ́ mɛ́ nɛ́,
ŋ zɔkɛ Amoritiwa ná,
gbési há pérí tuuni ná ɓa háá yɩ́rɛ sɛɛdɩrɛwa,
ká ka dóé anɛ tuuni ná ɓa háá yɩ́rɛ sɛɛnɛwa;
ŋ zɔ́kwɔ́ ɓɔ́ŋ anɛ tuuni, a pɔ́wɔ́ nɔnɔ mɛ́ kaa tuwi yákwɔ́ nalursi mí. 10 Ŋ nɛ́ lá sɩ́ɛ́
kánɩ́wa lɩ Ezipiti mí,
a bélíwa mɛ́ bɩŋsɛ mɛɛ́sɛllɛ, gɩrbétéke sɩɛrʋ,
a kánɩ́wa ko, a kiri Amoritiwa ká lɔ́wɔ́ tíé pɛ́ɩ́wa. 11 Ɛ́ har mɛ́, ŋ báá kúó bélíwa bɛlɛ sɩɛrʋ,
a tʋɔ́sɩ́wɔ́ náŋa, ɓa láŋ nʋɔ wɩ́ɛ́ bʋl aá pɛ́ɩ́wa,
ká tʋ́ɔ́sɩ́wa heŋbiwafɛlɛ náŋa, ɓa lɩ́sɩ́wɔ́ tɩɩ, a áŋ dʋŋɔ tɩ́llɛ.
Ɩzɩrayɛl nɩɛ, ɛ́ raá? Nyuutɩna Wɩɩsɛ nɩ́ bɔ́sɛ́ ɛ́.
12 Ɩ́ bɛlɛ ná ŋ há tʋ́ɔ́sɛ́ ɓa áŋ dʋŋɔ tɩ́llɛ, ɩ́ pí dɩvɛ́ŋ pɔ́wɔ́ ɓa nyɔ,
ká ɓa wɩ mɔhɛ̃́ rɩ́wɔ́ nyɔ́wɔ́;
a bʋ́lɩ́ŋ wɩ́laabʋlla ná má rɩ́, rɩ́wɔ́ báá sɩ́ŋ nʋɔ wɩ́ɛ́ láá bʋ́l pá nɩɛ.
 
13 Ɛ́ wɩ́ɛ́ sɩ́ɛ́, ŋ sɩ́ gɛ́rɩ́wa,
anɛ tórko há cɩ́ɩ́nɛ cɩka,
a gɛrɛ oŋwómme, aá va ɛ́.
14 Nɛrɔ ná há wo fɛ́ɛ́ kɩ́ŋkáŋ,
wɩ sɩ́ wólli fá yʋ́ksɛ,
bɩbar wɩ sɩ́ wóllú ballɩ́ dí,
lalyooribɩbar wɩ sɩ́ wóllú mɩɩsɛ yoo la.
15 Túyooro wɩ sɩ́ wólli cɛ́ tɩkɛ,
fɩ́fáárɔ bɩbar wɩ sɩ́ wólli lú,
zákzɩ́nnɔ má wɩ sɩ́ wólli kánʋ́ mɩɩsɛ fá yʋ́ksɛ.
16 Ɛ́ kal, lalyoore sɩɛrʋ bɩbar sɩ́ fá,
ká tɔ́ʋ́ laala.» Nyuutɩna Wɩɩsɛ nɛ́ bʋ́l ɛ́.