Amɔsɛ kɛnɔ
Amɔsɛ wɩ́bʋlɛ́
1
1 Tekua tɩ́náwa pʋdɔɔrɔ oro ɓaá yɩ́rɛ Amɔsɛ, ʋ wɩ́bʋlɛ́ nɛ́ mɩŋ kɛnɔ́ né sɩɛrʋ. Nyuutɩna Wɩɩsɛ nɛ́ mákɛ Ɩzɩrayɛl dɩ́tɩllɛ nɩɛ nyúú wɩ́ɛ́ pɔ́ʋ́, ʋ muuli nówó. Ʋ nówó bɩŋsɛ bɛllɛ há daarɛ́ nɛ́, ká tíé zíklé kɩ́ŋkáŋ ná zɩŋ peri; ɛ́ tɛ́ŋ mɛ́, rɩ Ozɩasɛ nɛ́ fa ká Ziida kuóro, ká Zʋwasɛ bio Zerobowamɛ má fa a Ɩzɩrayɛl kuóro. 2 Amɔsɛ sɛ́: «Nyuutɩna Wɩɩsɛ cɛ́ Sɩyɔŋ mɛ́ nɛ́, ká ú'uuri anɛ kɩ́ŋkána,
ʋ cɛ́ Zerizalɛmɛ mɛ́ nɛ́, kɔ́ʋ́ liŋó lɩ́lɛ.
Pʋsɛ nyɔ́dííle yʋɔɔrɔ́,
Karmɛl paalɔ nyúú nyɔ́ɔ́ hɩl.
Nyuutɩna Wɩɩsɛ gáásɛ wɩ́ɛ́ Damasɛ nyúú
3 Nyuutɩna Wɩɩsɛ sɛ́:
«Damasɛ tɔ́ɔ́ nɩɛ nɩɓʋ́ʋ́rɩwɩ́ɛ́ dúkí nɛ́sɛ.
Ɓa sɩɛrʋ ɓɩ́bɔmɔ nɛ́ ká:
Ɓa pá hɔrʋ nɛ́, a gɛrɛ Galadɛ dɩ́tɩllɛ nɩɛ.
Ɛ́ wɩ́ɛ́, ŋ há bɩ́ɩ́nɛ́ rɩ́ŋ tʋ́mʋ́ ná ɓa mɛ́, ʋ waá giri.
4 Ŋ sɩɛ́ sɩ́ tɔkɛ níŋ hé Siiri kuóre jɩɩsɛ mɛ́: rʋ́ʋ́ dí Hazayɛl kuójaa,
a dí Bɛŋhadadɛ kuójɩɩsɛ má.
5 Ŋ sɩ́ bónni Damasɛ zekɛ́rɛ dánʋtɔ́llɛ;
ŋ sɩ́ ɓʋ́ kuóro ná há ké nɩɓʋ́ʋ́rɛ polo mí,
a ka kuódeŋtuke ké, satɔ́ɔ́rɩ́wɩ́ɛ́ tɔ́ɔ́ sɩɛrʋ.
Ŋ sɩ́ lo rɩ́wɔ́ kɛsɛ Siiri nɩɛ wuu mʋ́ Kiiri.»
Nyuutɩna Wɩɩsɛ nɛ́ bʋ́l ɛ́.
Nyuutɩna Wɩɩsɛ gáasɛ wɩ́ɛ, Gaza rɩ́ Filisiti nɩɛ nyúú
6 Nyuutɩna Wɩɩsɛ sɛ́:
«Gaza nɩɛ nɩɓʋ́ʋ́rɩwɩ́ɛ́ dúkí nɛ́sɛ.
Ɓa sɩɛrʋ ɓɩ́bɔmɔ nɛ́ ká:
Ɓa kɛ́sɩ́ tɔ́pírmé nɩɛ
a kaa mʋ́ yɛ́llɛ, a pá Edɔŋ tɩ́náwa.
Ɛ́ wɩ́ɛ́, ŋ há bɩ́ɩ́nɛ́ rɩ́ŋ tʋ́mʋ́ ná ɓa mɛ́, ʋ waá giri.
7 Ŋ sɩ́ tɔkɛ níŋ hé Gaza zekɛ́rɛ mɛ́;
rʋ́ʋ́ dúú kuójɩɩsɛ má.
8 Ŋ sɩ́ ɓʋ́ Asɩdɔɔdɛ nɩɛ wuu,
a ɓʋ kuóro ná há kéŋ kuódeŋtuke ké Asɩkalɔŋ mɛ́;
ŋ sɩ́ tɛ́rɩ́ŋ nɛ́sɛ, a cɛ́ Ekrɔŋ nɩɛ mɛ́,
ká a rɩ́ Filisiti nɩɛ ná há káánɛ sʋsɛ.
Nyuutɩna Wɩɩsɛ bʋ́l ɛ́ nɛ́.
Nyuutɩna Wɩɩsɛ gáásɛ wɩ́ɛ́ Tiiri nyúú
9 Nyuutɩna Wɩɩsɛ sɛ́:
Tiiri tɩ́náwa nɩɓʋ́ʋ́rɛwɩ́ɛ́ dúkí nɛ́sɛ.
Ɓa sɩɛrʋ ɓɩ́bɔmɔ nɛ́ ká:
«Ɓa la lal yósi ɓɩkana, a yɛllɛ pá Edɔŋ tɩ́náwa,
ká wɩ nʋtʋmɛ ná
há mɩŋwɔ́ rɩ́ Ɩzɩrayɛl nɩɛ pɛ́kɛ wɩ́ɛ́ bɩ́ɩ́nɛ́.
Ɛ́ wɩ́ɛ́, ŋ há bɩ́ɩ́nɛ́ rɩ́ŋ tʋ́mʋ́ ná ɓa mɛ́, ʋ waá giri.
10 Ŋ sɩ́ tɔkɛ níŋ hé Tiiri zekɛ́rɛ mɛ́,
rʋ́ʋ́ díwó kuójɩɩsɛ.»
Nyuutɩna Wɩɩsɛ gáásɛ wɩ́ɛ́ Edoŋ nɩɛ nyúú
11 Nyuutɩna Wɩɩsɛ sɛ́:
«Edoŋ tɩ́náwa nɩɓʋ́ʋrɛ wɩ́ɛ́ dúkí nɛ́sɛ.
Ɓa sɩɛrʋ ɓɩ́bɔmɔ nɛ́ ká:
Bee wɩ́ɛ́, ɓa pá tókowíé kiri tɩŋ Ɩzɩrayɛl nɩɛ mɛ́, ɓa maábináŋa,
ká wʋ́ɔ́ susu mʋɔ́ wuu fɛ́ɛ́;
ɓa cɔwɩɩlɔ́ wɩ pɔ́rɛ́ mʋɔ́ má,
ká ka sagʋʋmɔ́ dɩŋderé cáásɩ́wɔ́.
Ɛ́ wɩ́ɛ́ ŋ há bɩ́ɩ́nɛ́ rɩ́ŋ tʋ́mʋ́ ná ɓa mɛ́, ʋ waá giri.
12 Ŋ sɩ́ tɔkɛ níŋ héwó tɔ́ɔ́ Temaŋ mɛ́,
ká rʋ́ʋ́ dí kuójɩɩsɛ há mɩŋ Bɔsɩra mɛ́.»
Nyuutɩna Wɩɩsɛ gáásɛ wɩ́ɛ́ Amɔŋ nɩɛ nyúú
13 Nyuutɩna Wɩɩsɛ sɛ́:
«Amɔŋ tɩ́náwa nɩɓʋ́ʋ́rɩwɩ́ɛ́ dúkí nɛ́sɛ.
Ɓa sɩɛrʋ ɓɩ́bɔmɔ nɛ́ ká:
Ɓa kɩ́ɛ́sɛ Galadɛ tɩ́náwa hápuuke,
ká makɛ rɩ́wɔ́ káŋwɔ́ tíé jɛ́llɛ, a mʋ́ zʋ Galadɛ.
Ɛ́ wɩ́ɛ́, ŋ há bɩ́ɩ́nɛ́ rɩ́ŋ tʋ́mʋ́ ná ɓa mɛ́, ʋ waá giri.
14 Ŋ sɩ́ tɔkɛ níŋ hé Raaba zekɛ́rɛ mɛ́,
rʋ́ʋ́ díwó kuójɩɩsɛ,
lal tápʋl,
lal nɩɛ cááse tápʋl,
kal ná poo há zénó.
15 Ɓa dɩŋdɔma sɩ́ yoo díwó kuóro a kánʋ́ col,
a pɛ́ kɛ́sʋ́ kuówɩɛla má col.»
Nyuutɩna Wɩɩsɛ bʋ́l ɛ́ nɛ́.