Wɩɩsɛ nɩɛ sɩ́ bil nʋɔ
3
1 Ɩzɩrayɛl nɩɛ, duo ná Nyuutɩna Wɩɩsɛ há lɩ́sɛ́ Ezipiti mí, ɩ́ zesi wɩ́ɩ́ ná ʋ há bʋlɛ́ aá pɛ́ɩ́wa, ʋ sɛ́: 2 «Ŋ bɛ́llɔ́ lɩ́sɩ́wa nɛ́ dúníé duowa wuu sɩɛrʋ. Ɛ́ nɩ́ɩ́ tɩ́llɛ́
rɩ́ŋ a rɩ́ɩ́wa bílíwa nɩɓʋ́ʋ́rɩwɩ́ɛ́ ná wuu nʋbili páŋ.»
Wɩɩsɛ há sʋ́ʋ́ ná, ʋ nʋ́ʋ́ wɩ́laabʋllɔ bʋ́bʋl
3 Nɩɛ bɛllɛ sɩ́ wólli hé náŋá pi ŋmɛ́nɔ́,
rɩ ɓa nɛ́ wɩ lá sɩ́ɛ́ vʋʋrɛ?
4 Kɩ́ŋkáná sɩ́ ú'uuri kʋkɔrɔ sɩɛrʋ,
rʋʋ nɛ́ wɩ namɩ́ɛ́ kené?
Kɩ́ŋkaŋbio sɩ́ wúú dɩpɩnɛ́ mɛ́,
rɩ namɩ́ɛ́ to nʋɔ mɛ́?
5 Diíwie sɩ́ tuwi tíé a zʋ bárá sɩɛrʋ,
rɩ ɓɩdííli wɩ́ɛ́ raá?
Yubárá sɩ́ yo,
rɩ óŋ raá ʋ ka?
6 Ɓa sɩ́ mú lal muule tɔ́ɔ́ sɩ́sɩ́ɛ́nʋ́wa,
ká rɩ́ héwíŋ sɩ́ nɩɛ kánʋ́?
Wɩ́ɩ́la sɩ́ zʋ tɔ́ɔ́,
rɩ Nyuutɩna Wɩɩsɛ raá wɩ ɛ́ wɩɩla héé?
7 Ɛ́ wɩ́ɛ́, Nyuutɩna há ká Nyuutɩna Wɩɩsɛ wɩ wɩ́ɩ́ a, rʋʋ wɩ lá sɩ́ɛ́ makɛ ɛ́ wɩ́ɩ́ pɔ́ʋ́ tʋtʋnna ná há kɔ́ʋ́ wɩ́laabʋlla.
8 Rɩ kɩ́ŋkáná nɩ́ɩ́ uuré,
áŋ rɛ́ héwíŋ waá ka?
Rɩ Nyuutɩna há ká Nyutɩna Wɩɩsɛ nɩ́ɩ́ bʋl wɩ́ɩ́,
áŋ rɛ́ wʋ́ʋ́ láá bʋ́l pá nɩɛ?
Nyuutɩna Wɩɩsɛ dí sarɩ́ya cɛ́ Samari nɩɛ mɛ́
9 Ɩ́ cɛ́ Asɩdɔɔdɛ nɩɛ kuójɩɩsɛ
arɩ́ Ezipiti nɩɛ kuójɩɩsɛ luŋse daha,
ká búóli a pɔ́wɔ́ nɩɛ, a bʋlɛ́:
«Ɩ́ ko hé náŋá mɛ́ Samari pallɛ daha,
a ná vúkme há zeno ɛ́, a zʋ Samari sɩɛrʋ,
bɛŋsɛ́ duo há mɩ́nʋ́ nɩɛ sɩɛrʋ!»
10 «Ɓa wɩ taŋá ɛɛ ɛ̃.
Bɩbarɩ́ arɩ́ nɩvɩrɔ́ nɛ́
súwó kuójɩɩsɛ.»
Nyuutɩna Wɩɩsɛ nɛ́ bʋl ɛ́.
11 Ɛ́ nɛ́ tɛ Nyuutɩna Wɩɩsɛ sɛ́:
«Ná dɩŋdɔma ní kílí tɔ́ɔ́!
Ɓa sɩ́ zɔ́kɛ zeŋe ná há kɛ́rɩ́ mɛ́,
Ká díí kuójɩɩsɛ lɛ.
12 Nyuutɩna Wɩɩsɛ sɛ́:
Penʋɔlɔ háá lokri la
pʋna naŋdakuléwa bɛllɛ ɛ́ ráá má dɩlkul kɩ́ŋkáná nʋɔ mɛ́ ɛ́,
ɓaá á rɩ́wɔ́ lokri la Ɩzɩrayɛl nɩɛ ná má há mɩ́ŋ Samari mí ɛ́ nɛ́.
Ɓa mɩ́ŋ Samari mí, a yéllíwó dacakgbóru daha,
a tɩ́ɛ́nɩ́wɔ́ tɩɩ gódówa daha.
13 «Ɩ́ zesi,
ká cesi wɩ́ɩ́ ná ŋ há kené cɛ́ Zakɔbɛ duo nɩɛ mɛ́,
a pɔ́wɔ́.
Ŋ é Nyuutɩna Wɩɩsɛ,
Wɩɩsɛ ná há ká dóé wuu tɩ́na nɛ́ bʋlɛ́:
14 Kal ná ŋ há sɩ́ cɩ Ɩzɩrayɛl nɩɛ mɛ́,
ɓa nɩɓʋ́ʋ́rɩwɩ́ɛ́ ná yɩr mɛ́,
ŋ sɩ́ zɔkɛ vʋk'ɔ́ɔ́sɩkorsi ná
há mɩŋ Bɩtɛl mɛ́;
ɓa nyɩ́sɛ sɩ́ bónni, a ɓallɛ tíé.
15 Ŋ sɩ́ zɔ́kwɔ́ waarʋ tɛ́ŋ mɛ́ jɩɩsɛ rɩ́ lʋmɔ tɛ́ŋ mɛ́ jɩɩsɛ.
Kuójɩɩsɛ ná ɓa há ɓɩ́ɛ́rɛ́ rɩ́ betúnyɩla,
ɓa sɩ́ yɛ́rkɛ.
Jɩzeŋsi sɩ́ nyɩ́ɩ́kɛ.
Nyuutɩna Wɩɩsɛ nɛ́ bʋ́l ɛ́.