Zɔ́krʋ ná há sɩ́ peri Ɩzɩrayɛl nɩɛ wɩ́ɛ́
13
1 Rɩ Ɩfɩrayɩŋ nɛ́ faá bʋl wɩ́ɛ́,nɩɛ de cícel ní:
Ʋ dóé nɛ́ fa zéné kɩ́ŋkáŋ Ɩzɩrayɛl mɛ́.
Amá ʋ tʋ́ŋ bɔ́ŋbɔ́ŋ a tɩŋ Baalwa ɓáárɛ́ mɛ́, a sʋwɛ.
2 Ká arɩ́ zaa wuu, ɓa ha dé mɩŋ bɔ́ŋbɔ́ŋ ɛ́ɛ́ mɛ́ nɛ́,
ɓaá píwó wárɛ cʋɔrɛ ommáálɛ,
a káŋwɔ́ sabɩɩna luki veŋgúlli;
ɓa nyáŋ wuu ká lukre nɛ́sɛ ommáálɛ nɛ́.
Ɓa bʋ́lwɔ́ wɩ́ɛ́ a bʋlɛ́: «Nɩɛ ná há kéŋ nɩbííne aá ɔsɛ vʋka,
ɓa wo nɔwiisi aá ɓáárɛ.»
3 Ɛ́ nɛ́ tɛ, ɓa sɩ́ nɩɛsɛ cɩ́cʋɔ duóbána,
ɓa sɩ́ nyɩ́ɩ́kɛ anɛ cɩ́cʋɔ fól nyɛlɔ,
ɓa sɩ́ yʋ́ksɛ anɛ mɩ́kɔlɔ há lɛ́ tʋ́ɔ́ sɩɛrʋ,
ɓa sɩ́ nyɩ́ɩ́kɛ anɛ nyʋɔsɛ há tɩ́ŋ fúŋfúrkú aá lɛ́.
4 Ŋ nɛ́ ká Nyuutɩna Wɩɩsɛ, ɩ Wɩɩsɛ,
a pɔ́ Ezipiti wuu mí.
Ɩ wɩ Wɩɩsɛ nɔ́ŋ ɛ̃, rɩŋ dʋŋɔ raá,
laataarɔ nɔ́ŋ toó rɩŋ dʋŋɔ raá.
5 Gɩrbétéke sɩɛrʋ nɛ́ ŋ zɩ́mɩ́,
tɔ́ɔ́ ná há hɩ́lɛ́ sɩɛrʋ.
6 Ɓa há lɛ́ gɩrbétéke mí, a mʋ́ ná ɓɩdííle,
ɓa díó vɔksɛ;
ɓa há vɔ́ksɛ́, nyʋkɔ kéŋwó;
ɛ́ nɛ́ tɛ ɓa sʋ́llɩ́ŋ wɩ́ɛ́.
7 Ŋ sɩ́ nɩɛsɛ kɩ́ŋkána a cɩ́ŋwɔ́ mɛ́;
ŋ sɩ́ nɩɛsɛ ɓee a cɛ́ ŋmɛ́nɔ mɛ́,
ŋ sɩ́ bɩbɛ́llɩ́wɔ́.
8 Ŋ sɩ́ nɛ̃ ursi ná ɓa há kɛ́sʋ́ bɛlɛ, a cɩ́ŋwɔ́ mɛ́,
ŋ sɩ́ cɔ́nnɩ́wɔ́ baŋcɩllɛ;
ráŋ nɛ́ ŋ sɩ́ díwó anɛ kɩ́ŋkaŋháálɔ:
balla sɩ́ múŋsíwó.
9 Ɩzɩrayɛl, wɩ́ɩ́ ná háá zɔ́kɩ́ nɛ́ ká,
ɩ há cɩ́nɩ́ŋ mɛ́,
ɩ há cɛ́ nɛrɔ ná fa há wóí la aá tá mɛ́.
10 Ɩ kuóro ná mɩŋ nɛ́ɛ́?
Rʋ́ʋ́ lɛ́ɩ́ tá, ɩ tɔ́nɛ ná wuu sɩɛrʋ!
Ɩ sɩ́dííre ná é sɩɛ́ mɩŋ nɛɛ́, ɩ fa há bélwó ká bʋlɛ́:
Lɩ́sɛ kuóro arɩ́ nyúútɩ́nawa páŋ!
11 Ɛ́ nɛ́ ŋ cɔwɩɩlɔ́ sɩɛrʋ ŋ lɩ́sɛ kuóro pɛ́ɩ́,
ŋ cɔwɩɩlɔ́ sɩɛrʋ nɛ́ báá ŋ sɩ́ lɔ́ʋ́ ká tɛ́ɩ́.
12 Ɩfɩrayɩŋ wɩ́nyɔ́rkɛ zʋ́ kɛnɔ,
ɓa pʋ́ŋsʋ́ wɩ́bɔmɔ ná bil.
13 Wɩɩla ná háálɔ háá néé lʋlɛ́ tɛ́ŋ mɛ́ sɩ́ pérú,
bio ná há wɩ zɩmɛ́ kené ní:
ʋ lʋlɛ́ péró amá ʋ waá ja rʋ́ʋ́ lʋ́ʋ́ maá luoru mí.
14 Ŋ sɩ́ lɔ́wɔ́ tá lɛlɛtɔ́ɔ́ nɛ́sɛ mɛ́,
ŋ sɩ́ yɔ́wɛ lɔ́wɔ́ sʋʋ nɛ́sɛ mɛ́.
Sʋʋ, ɩ ballɩ́ ná mɩŋ nɛɛ́?
Lɛlɛtɔ́ɔ́, ŋ́ néí yooló hɛŋ ná?
Ŋ baá wɩ susu fá.
15 Rɩ́ Ɩfɩrayɩŋ có rʋ́ʋ́ ka ɓɩɛ kɩ́llʋ́ maábinaŋá má,
poo sɩ́ lɛ wɩɩsɛ dɩpomí rɩ́ɩ́ ko,
Nyuutɩna Wɩɩsɛ poo sɩ́ lɛ gɩrbétéke ko.
Ʋ sɩ́ a rʋ́ʋ́ nyibulsɩ́ɩ́ toki,
rʋ́ʋ́ nyipalnaa hɩl.
Ɛ́nɛ́ sɩ́ a rɩ́wɔ́ ko pɔ́ʋ́ kuóɓɩɛ rɩ́rʋ́ oŋpiŋe wuu.