Wɩɩsɛ sɩɛrʋ zɔ́k Ɩzɩrayɛl há kɔ́ʋ́ bio nyúú
11
1 Ɩzɩrayɛl fa há ká heŋbié, ŋ fa cóú:Ɛ́ nɛ́ ŋ yɩ́rɩ́ŋ bio ʋ lɛ Ezipiti tíé mí.
2 Amá, ɓa kéŋwó tɩɩ kɛkɛ nɩɛ ná fa há yɩ́rwɔ́ mɛ́;
ɓa ɔ́sɛ́ vʋka a pá Baalwa,
ká nyɩkɛ áŋsáŋsɛwa a pá venni.
3 Ŋ é tɩɩ nɛ́ cɔ́ Ɩfɩrayɩŋ nɛ́sɛ mɛ́,
a máŋsʋ́ valɛ́;
amá ɓa wɩ ɛ̃ rɩ́ŋ á wérí pɔ́wɔ́.
4 Ŋ tɩ́ŋ nɩbinní vɔ́ɔ́sɛ mɛ́ nɛ́ a tɩ́ɛ́sɩ́wɔ́,
arɩ́ cólle ŋmɛ́sɛ.
Ŋ fa nɩhɩ̃́ nɛrɔ ná háá púú bio baasɛ, ʋ tɩ́ɛ́kʋ́ tɛŋgbɛlɩ́ mɛ́ nɛ́, a pɔ́wɔ́,
ŋ nɛ́ pɔ́wɔ́ ɓɩdííle.
5 Ɓa wáá bɩrmʋ́ Ezipiti;
Asiiri nɩɛ nɛ́ sɩ́ dí kuorí ɓa nyúú,
bee wɩ́ɛ́, ɓa vɔ́ɔ́ rɩ́wɔ́ bɩrkóŋ rí.
6 Lal sɩ́ díwó tɔ́nɛ,
a zɔ́kwɔ́ tɔ́sɔɔkɛ́rɛ,
ʋ sɩ́ zɔkɛ zɔ́krʋ
ɓa sabɩɩna jáŋwa ná wɩ́ɛ́.
7 Ŋ nɩɛ taalɔ́ nɛ́ bɩ́rwɔ́ har yakɩ́ŋ;
ɓaá yɩ́rwɔ́ rɩ́wɔ́ bɩrɛ kóŋ rí,
amá ɓa nɛ́ŋ balá má wɩ ísé.
8 Ɩfɩrayɩŋ, ŋ sɩɛ́ a rɩ́ŋ ɛ́ɛ́ wɩ́ɛ́ ɛrɛ́ rɛ́?
Ɩzɩrayɛl, ŋ sɩ́ wólli kánɩ́ pá?
Ŋ sɩ́ɛ́ a ɛrɛ́ rɩ́ɩ́ bɛ́ŋsɩ́
anɛ ɛ́ ŋ há bɛ́ŋsɛ́ Adma tɔ́ɔ́?
Rɩ́ŋ sɩɛ́ a rɩ́ɩ́ má nɩɛsɛ Seboyiimi tɔ́ɔ́?
Ŋ sɩɛrʋ wuu nɛ́ zɔ́kɛ́,
susu wuu ní keníŋ.
9 Ŋ waá sáŋ díŋ cɔ́wɩɩlɩ́zeno ná,
ŋ báá wáá sáŋ zɔkɛ Ɩfɩrayɩŋ;
bee wɩ́ɛ́, ŋ to nɩbíŋ, ŋ ká Wɩɩsɛ nɛ́.
Ŋ káŋ dʋŋɔ́ rɛ́ a mɩ́nɩ́wa sɩɛrʋ:
Ŋ báá wáá ko rɩ́ cɔwɩɩlɔ́.
10 Ɓa sɩ́ tɩŋ Nyuutɩna Wɩɩsɛ mɛ́,
háá uuré anɛ kɩ́ŋkána;
Ʋ sɩ́ uuri,
rʋ́ʋ́ bɛlɛ cel a fá lɛ mʋʋ rɩ́ɩ́ ko.
11 Ɓa sɩ́ cel fá lɛ Ezipiti mí ko,
anɛ diíwiisi,
a fá lɛ Asiiri mí ko, anɛ kuókʋ́sɛ.
Ɛ́ mɛ́ nɛ́ sɩɛ́ rɩ́ŋ a rɩ́wɔ́ kéŋwó tɔ́nɛ mɛ́,
Nyuutɩna Wɩɩsɛ nɛ́ bʋ́l ɛ́.