Ɩzɩrayɛl nɩɛ kuótɔ́ɔ́ tenné wɩ́ɛ́
10
1 Ɩzɩrayɛl nɩɛ fa nɩhɛ̃́ viínyi tuu ná haá dí wér ní aá nɔŋ nɔnɔ kɩ́ŋkáŋ.Tɛ́ŋ ná mɛ́ ɓa nɔnɔ há kánɔ́,
ɛ́ tɛ́ŋ mɛ́ nɛ́ ɓa ɔsɛ aá má korsi kɩ́ŋkáŋ,
tɛ́ŋ ná mɛ́ ɓa tɔ́ɔ́ há wéró,
ɛ́ tɛ́ŋ mɛ́ nɛ́ ɓa ɔsɛ aá ɓɩɛrɛ dɔ́wɩ́cɔ́ŋsɛ.
2 Ɓa sɩɛnnɛ cɔ́rmɔ́,
ɛ́ nɛ́ tɛ rɩ́wɔ́ ná wɩɩla mʋ́l né mí,
Nyuutɩna Wɩɩsɛ sɩ́ zɔ́kwɔ́ korsi ná,
ká gínníwó dɔ́wɩ́cɔ́ŋsɛ ná.
3 Mʋ́l neé mí ɓa sɛ́:
«Á wɩ kuóro kené,
bee wɩ́ɛ́, á wɩ Nyuutɩna Wɩɩsɛ héwíŋ fɛ́ɛ́;
ká rí kuóro, bee rí ʋ wólli a, aá párá».
4 Ɓaá bʋl wɩ́ɛ́ kɩ́ŋkáŋ,
aá bʋrɛ nyɩɛrʋ bʋrawa,
aá tá nʋtállɛ,
ɓa é rí, sarɩ́ya nɩhɩ̃́ mɩ́pál
há mɩŋ baka fállɛ pɛ́ksɛ mɛ́ nɛ́.
5 Héwíŋ sɩ́ ka nɩɛ ná há mɩŋ Samari mí Bɛtavɛŋ nɔmaáwa ná wɩ́ɛ́;
Samari nɩɛ sɩ́ wi veno ná wɩ́ɛ́,
nɩɛ ná háá ɓáárʋ sɩ́ váklɛ,
ʋ píŋ há kɛ́kwɔ́ mɛ́ a mʋ́ zʋ́zʋ́llɛ.
6 Ɓa sɩ́ ka ɛ́ veno mʋ́ Asiiri,
a dí zilé pá kuóro Yarɛbɛ.
Hɩɩ̃sɛ sɩ́ dí Ɩfɩrayɩŋ nɩɛ,
ká rɩ́ Ɩzɩrayɛl nɩɛ má dí hɩɩ̃sɛ ɓa jáŋwa wɩ́ɛ́.
7 Samari zɔ́kɔ́ tenni,
ʋ kuóro báá wɩ tíŋ kené,
ʋ nɩhɛ̃́ dakul há dáálí nyii daha nɛ́.
8 Ɓa sɩ́ zɔkɛ Avɛŋ dɩɓaarɛ́ ná, Ɩzɩrayɛl nɩɛ há mʋ́ ráŋ aá tʋŋ bɔ́ŋbɔ́ŋ;
sɔrʋ arɩ́ sɔkolli sɩ́ nyʋ́wɔ́ korsi daha.
Ɛ́ tɛ́ŋ mɛ́ nɛ́ sɩɛ́ rɩ́wɔ́ bʋl pallɛ rɩ́ bʋlɛ́: «Ɩ́ tɔ́rá mɛ́!»
Ká bʋl dúŋdúóme má rɩ́: «Ɩ́ ɓallɛ nyáŋrá mɛ́!»
Ɩzɩrayɛl há dúú ná ʋʋ́ kʋ́mʋ́ nɛ́
9 A pɔ́ tɛ́ŋ ná mɛ́ wɩ́ɩ́ ná há tʋ́ŋ Gibeya mɛ́,
Ɩzɩrayɛl nɩɛ ɔ́ɔ́ zɔkɛ.
Ɛ́ naa mɛ́ nɛ́ ɓa ha mɩŋ, ɓa wɩ bɩ́rsɛ,
Ɩzɩrayɛl nɩɛ sɩɛ́ ha káánɛ ráŋ,
lal ná há sɩ́ ŋmɔ́wɛ Gibeya wɩ́bɔ́ŋ'áára sɩɛ́ wʋ́ɔ́ peri?
10 Ŋ sɩ́ tʋ́rwɔ́ ɛ́ ná ŋ há có;
nɩɛ sɩ́ hé náŋá mɛ́, a cɩ́ŋwɔ́ mɛ́,
a vɔ́sɩ́wɔ́, ɓa wɩ́bɔma ná bɛllɛ wɩ́ɛ́.
11 Ɩfɩrayɩŋ nɩhɛ̃́ nɔmáá ná ɓa há tʋ́rɛ́ nɛ́,
ʋ cólli mɩ́ɛ́ ŋmɔ́wɛ́,
amá ŋ sɩ́ kánʋ́ baŋ ná há wéró hé baŋdabaasɩ́ mɛ́,
ŋ sɩ́ vɔsɛ páárɛ́ cɩksɛ pá Ɩfɩrayɩŋ,
Ziida sɩ́ pɩ́parɛ́,
ká rɩ́ Zakɔbɛ tɩŋ ɓúɓósi
12 Ɩ́ du taŋá pɛ́ɩ́wa tɩɩ,
ɩ́ sɩ́ kʋsɛ cɛ́rɩ́wa cɩ́tɩkɛ́ mʋɔsɔ,
ɩ́ ɓá ɓʋ́fɛlɔ pɛ́ɩ́wa tɩɩ.
Bee wɩ́ɛ́, tɛ́ŋ péró rɩ́ɩ́wa ja Nyuutɩna Wɩɩsɛ,
a kaá jɔ́ʋ́ kóé,
rʋ́ʋ́ ko a rɩ́ taŋá kóéwa rɩ́, anɛ duóŋ.
13 Ɩ́ párɛ́ sahaksɩ́,
a kʋŋ wɩɩla,
a dí gɩragɩra nɔnɔ.
Bee wɩ́ɛ́, ɩ́ fa pííwa yɩɛla héíwa tɩɩ dóé mí ní,
arɩ́rɩ́ɩ́wa lalyoore káŋ mɛ́.
14 Ɛ́ nɛ́ tɛ, Ɩzɩrayɛl, dɔ́mɛ ɓɩzeno sɩ́ ísí nɩɛ sɩɛrʋ,
rɩ́wɔ́ zɔ́kɩ́ tɔ́sɔkɛ́rɛ wuu,
anɛ Salmaŋ há zɔ́kɛ́ Bɛtarbɛl ɛ́,
lal tápʋl,
tɛ́ŋ ná mɛ́ ɓa há ɓʋ́ʋ́sɛ maá rɩ́ bɛlɛ hé náŋá mɛ́.
15 Bɛtɛl nɩɛ, nyɛ nɛ́ sɩ́ péríwa, a tɩ́ŋɩ́wa saháksɩ́ ná há zénó wɩ́ɛ́.
Rɛɛ́ rɩ́ tɔ́ɔ́ pʋlɛ́, rɩ Ɩzɩrayɛl kuóro sʋ́wɔ́.