Ooze 1

Ooze kɛnɔ

1 Ziida kuóre Oziyasɛ tɛ́ŋ mɛ́ rɩ́ Yotamɛ tɛ́ŋ mɛ́ rɩ́ Akaazɛ tɛ́ŋ mɛ́ arɩ́ Ezekiyasɛ kuorí díí tɛ́ŋ mɛ́ arɩ́ Zʋasɛ bio Zerobʋamɛ há ká Ɩzɩrayɛl kuóro, ɓa kuorí díí tɛ́ŋ mɛ́ nɛ́, Nyuutɩna Wɩɩsɛ bʋl wɩ́ɛ́ pá Beeri bio Ooze.

Ooze rɩ́ hácɔrmɔ Gomɛɛrɛ bɛlɛ wɩ́ɛ́

2 Ná wɩ́ɛ́ ná Nyuutɩna Wɩɩsɛ há púle bʋl Ooze rɩ́:

Nyuutɩna Wɩɩsɛ bʋl Ooze rɩ́ bʋlɛ́:

Mʋ́ ja hácɔrmɔ,

rʋ́ʋ́ lʋ́l hácɔrmɛ bɛlɛ pɛ́ɩ́;

Bee wɩ́ɛ́, tɔ́ɔ́ ná nɩɛ vɛ́ Nyuutɩna Wɩɩsɛ tá, ká mʋʋrɛ cɔrmɛ sɩɛrʋ. 3 Ɛ́ nɛ́ Ooze mʋ́ ja Dibilayimi toló Gomɛɛrɛ. Gomɛɛrɛ ka puo, a lʋl heŋbóle. 4 Nyuutɩna Wɩɩsɛ bʋ́l Ooze rɩ́ a bʋlɛ́:

Pá bio ná yɩr Zizireyɛl;

bee wɩ́ɛ́, tɛ́ŋ mʋɔ mɛ́,

ŋ sɩ́ a rɩ́ Zehu jaa nɩɛ bílwó nʋʋsɛ;

cɛ́l ná ɓa há bɩsɛ Zizireyɛl polo mí wɩ́ɛ́:

Ŋ sɩ́ a rɩ́ Ɩzɩrayɛl duó kuorí díí tenni. 5 Ɛ́ kal, ŋ sɩ́ bóri Ɩzɩrayɛl túó Zizireyɛl polo sɩɛrʋ. 6 Gomɛɛrɛ baa ka puo, a lʋ́l toló. Nyuutɩna Wɩɩsɛ baa bʋl Ooze rɩ́, a bʋlɛ́:

Hóú yɩr Lo-Ruhama;

ʋ mʋ́l nɛ́ ká «susufɔ́ɔ́ tóó»

bee wɩ́ɛ́, ŋ baa waá a rɩ́ŋ fá Ɩzɩrayɛl duó nɩɛ susu,

rɩ́ɩ́ píwó wɩ́bɔma rɩ́ɩ́ cɛ́wɔ́.

7 Amá, Ziida jaa nɩɛ é, ŋ ha sɩ́ mákɩ́ŋ susufɔ́ɔ́ a pɔ́wɔ́. Ŋ é Nyuutɩna Wɩɩsɛ, há káwɔ́ Wɩɩsɛ ŋ tɩɩ nɛ́ sɩ́ láwɔ́ tá. Ʋ sɩɛ́ to rɩ́ŋ tɩ́ŋ túó ɛ́rá má tókowí ɛ́rá má lal yóé mí, ɛ́rá má záksɛ mɛ́, ɛ́rá má zákzɩ́nna mɛ́ nɛ́, a láwɔ́ tá. 8 Ʋ lɩ́sɛ Lo-Ruhama ɩ́l mɛ́; ká baa ka puo, a lʋl heŋbóle. 9 Ɛ́ nɛ́ Nyuutɩna Wɩɩsɛ sɛ́:

Hoú yɩr Lo-Ami;

ʋ mʋ́l nɛ́ ká «Tóŋ nɩɛ»;

bee wɩ́ɛ́, ɩ́ tóŋ nɩ́ɛ́,

ŋ má sɩɛ́ to óŋ a pɛ́ɩ́wa.