Sʋʋ mɛ́ bɩr'isé wɩ́ɛ́
12
1 «Ɛ́ tɛ́ŋ mɛ́ Malɩkawa nɔhɔ̃́ Mɩsɛl ná háá belí tɔ́ɔ́ nɩɛ mɛ́ sɩ́ ko. Ʋ sɩ́ a tɛ́ŋ ná wɩɩla há sɩ́ duki nɛ́sɛ. Bee wɩ́ɛ́, ɛ́ tɛ́ŋ mɛ́ wɩɩla a de pɔ́ dúníé púle wuu mí a kaa ko aá lɛ zaa, nɛ́ŋ há wɩ ɛ́ wɩɩla duo néé ná. Ɛ́ tɛ́ŋ mɛ́ nɛ́ sɩɛ́, rɩ́ɩ́ duo ná nɩɛ wuu yɩra há pʋ́ŋsɛ hiẽsó kɛnɔ mɛ́, rɩ́wɔ́ ná laatɛ́. 2 Ɛ́ tɛ́ŋ mɛ́, sʋsɛ ɓɩkana sɩ́ bɩr'isi lɛ lɛlbulli mí: Ɓa náŋa sɩ́ mɩŋ, mɩɩsɛ ná há waá tenni sɩɛrʋ. Ka rɩ́ náŋa má mɩŋ wɩɩla rɩ́ hɩ̃́ɩ̃́sɛ ná há waá tenni sɩɛrʋ. 3 Wɩ́zɩnna sɩ́ tʋ́tʋ́l anɛ bána pʋmmɔ, ká ɓa ná há kármɛ́ nɩkana ɓa cɛ́ tékétéké Wɩɩsɛ sɩ́ɛ́, ɓa má sɩ́ tʋ́tʋl tɛ́ŋ wuu mí anɛ caŋwʋllɛ.4 “Ɩ é Danɩɛl, sɩ́ ló rí kɛnɔ́ né wɩ́féŋse ná nyɩɩsɛ a kaá mʋ́ tɛ́ŋ tenné, bee wɩ́ɛ́ rʋ tɛ́ŋ nɛ́ péré, nɩkana sɩ́ kármʋ́, rɩ́wɔ́ zɩmɛ́ ɔsɛ súúrí kɩ́ŋkáŋ.”»
Dúníé tenné wɩ́féŋse wɩ́ɛ́
5 Ɛ́ nɛ́, ŋ é Danɩɛl baá bel a ná báála bɛlɛ há cɛ́ fuo nʋɔ, nɔ́ŋɔ cɛ́ cɔɔ nɔ́ŋɔ, ká nɔ́ŋɔ má cɛ́ cɔɔ nɔ́ŋɔ. 6 Ɛ́ nɛ́, ɓa nɔ́ŋɔ bɔsɛ báálɔ ná há sú gɛŋpúwɩɛlɩ́wie a cɛ́ fuo ná nyii dáha a bʋlɛ́: «Tɛ́ŋ béé mɩ́ rɩ́, rɩ́ wɩ́nyáŋsɛ nyáŋ tenni?» 7 Ɛ́ nɛ́ báálɔ ná há sú gɛpúwɩɛlɩ́wie gɛrɔ a cɛ́ nyii daha ɓɔ́ʋ́ nɛ́ŋsa bána rɩ́, ká ŋmɩ́ɛ́sɛ Wɩɩsɛ ná há ká dɩŋɛ́ yɩrɛ mɛ́ a bʋlɛ́: «Ʋ sɩ́ a bɩŋsɛ botoro rɩ́ fa. Tɛ́ŋ ná mɛ́ Wɩɩsɛ nɩɛ dóé há sɩ́ tenni, wɩ́ɛ́ má wuu sɩ́ tenni.»
8 Amá, ŋ é Danɩɛl há nɛ́ wɩ́ɛ́, ŋ wʋ́ɔ́ mʋ́ʋ́la ɛ̃, ɛ́ nɛ́ ŋ bɔsɛ bʋlɛ́: «Ŋ Nyuutɩna tɛ́ŋ béé mí rɩ́, ɛ́ wɩ́ɛ́ á rɩ́wɔ́ tenni?» 9 Ɛ́ nɛ́ ʋ sɛ́: «Danɩɛl, mʋ́mʋ́, kɛnɔ néé wɩ́ɛ́ mɔhɔ̃́ rɩ́wɔ́ a wɩ́féŋse rí, nɛ́cɩkó mɩŋ raŋ a kaá ja hatɩ́ŋnɛ́ tápʋlɛ. 10 Ɛ́ tɛ́ŋ mɛ́, wɩhála sɩ́ a rɩ́ nɩkana sɩ́ lɩsɩ́wɔ́ tɩɩ busunnu mí, a ká taŋá arɩ́ sapʋmmɩ́. Ká rɩ́ nɩbɔma ɔsɛ píwó tɩɩ hé bɔ́ŋbɔ́ŋ ɛɛ mɛ́. Amá wɩ́zɩnna sɩ́ nɛ wɩ́ɛ́ ná mʋ́ʋ́la. 11 A kaa pɔ́ tɛ́ŋ ná ɓa há sɩ́ vɛ Wɩɩsɛ kál wuu vʋk ná ɔsɛ́, ká wɩ́bɔmɔ ná há kéŋ zɔ́krʋ ɓɩzeno zʋʋ sú wɩcʋ́ɔ́lɩ́jaa ná, ʋ sɩ́ a tápʋlɛ́ bʋ́ɩ́ rɩ́ zɔwɛllɛ mɛɛ́sɩbaná rɩ́ fí (1290). 12 Amá nɩɛ ná há sɩ́ cɩ́ tɩ́kwɔ́ yardá, a kaá ja tápʋlɛ bʋ́ɩ́ rɩ́ zotoro mɛrɛ́ rɩ́ fí rɩ́ bɔmmʋ́ɔ́ ná nʋɔ (1 335) mɛ́ ɓa sɩ́ ná wér. 13 Ɩ é Danɩɛl, dí nyamma a peri tokó. A makɛ rɩ́ tɛ́ŋ tenní mí, rɩ́ɩ́ ná fɩɛla rɩ́ bɩbatúme.»