Wɩɩsɛ bʋl wɩ́ɛ́ a cɛ́ Edomitiwa mɛ́
35
1 Nyuutɩna Wɩɩsɛ bʋlɩŋ rɩ́ bʋlɛ́: 2 Báálɔ bio, ɓɔɩ́ sɩ́ɛ́ caasɛ Seyiri paalɔ rɩ́, a láŋ nʋɔ wɩ́ɛ́ bʋl pɔʋ́ bʋlɛ́! 3 Bʋl pɔʋ́ bʋlɛ́: Nyuutɩna Wɩɩsɛ sɛ́: Ɩ é Seyiri tɔ́ɔ́, ŋ cɩnɩ́ mɛ́ rɛ́! Ŋ sɩ́ zɔkɩ́ ɓóŋ ká rɩ́ bɩrmɛ tɔ́ɔ́ tɔ́ɓoó (vataalɛ, tɔ́ɔ́ wúóli). 4 Ɩ tɔ́nɛ sɩ́ a tɔ́ɓonni, bee wɩ́ɛ́ ŋ sɩ́ zɔkʋ́ ká rʋ́ a tɔ́ɔ́ vataalɔ́. Ɛ mɛ́ nɛ́, rɩ́ɩ́ zɩŋ rɩ́ŋ nɛ́ ká Nyuutɩna Wɩɩsɛ. 5 Bee wɩ́ɛ́, Ɩzɩrayɛl nɛ́ kɛɩ́ dɩŋdɔbɩnɛ́, tɛ́ŋ ná mɛ́ ʋ fa há mɩŋ sazɔkɔ ɓɩzeno mɩ́, tɛ́ŋ ná ʋ wɩ́bɔmɔ há caasɛ duki nɛ́sɛ kɩ́ŋkaŋ; ɩ tɩ́ŋ ɛ mɛ́, a ɓʋ́ʋ́sɩ́wɔ́ rɩ́ tokowí. 6 Ŋ é Nyuutɩna Wɩɩsɛ há wommó nɛ́ bʋlɛ́: Ŋ sɩ́ bɔsɩ́ cɛ́l ná ɩ há bɩsɛ tá wɩ́ɛ́, bee wɩ́ɛ́ ɩ wɩ hewíŋ fɛɛ́ ká bɩsɛ cɛ́l; ɩ sɩ́ túŋ ɛ cɛ́l. 7 Ŋ sɩ́ zɔkɩ́ tɔ́ɔ́ ná, ká rʋ́ bɩrmɛ́ tɔ́wúóli. Nɩɛ ná há zʋ́ tɔ́ɔ́ ná, rɩ́wɔ́ ná wuu há lɩɛ́, ŋ sɩ́ ɓʋ́ʋ́sɩ́wɔ́. 8 Tokowí nɛ́ sɩ́ ɓʋ́ʋ́sɩ́ nɩɛ́, rɩ́ pallɛ nyúnni, rɩ́ dɩŋduóme nyúnni, polli, arɩ́rɩ́ polcʋɔ́rɛwa sɩsɩɛnnɛ wuu sú nɩsʋsɛ ná tokowí há ɓʋɛ́. 9 Ŋ sɩ́ zɔkɩ́ tɔ́ɔ́ wuu, nɛ́ŋ báá wʋ́ɔ́ mɩŋ róŋ. A makɛ rɩ́ɩ́wa zɩ́ŋ rɩ́ŋ nɛ́ ká Nyuutɩna Wɩɩsɛ. 10 Ɩ ŋmɔ́wɩ́ baŋcɩ́la mɩ́ bʋlɛ́: Duowa ná bɛllɛ, rɩ́ tɔ́nɛ ná má bɛllɛ, ŋ nɛ́ tɩ́wɔ́, á nɛ́ sɩ́ tɩllɩ́wɔ́. Ká ɓa fa ká Nyuutɩna Wɩɩsɛ tɩllɛ nɛ́. 11 Ɛ wɩ́ɛ́, ŋ wommó! Nyuutɩna Wɩɩsɛ nɛ́ bʋlɛ́. Ɩ tʋŋ bánɔ́ŋnɩ́ rɩ́ cɔwɩɩlɔ́́ ɓa nyúú a wɩ́wɔ́ susu mʋɔ́ wuu fɛɛ́. Ɛ nɛ́ tɩllɛ rɩ́ŋ má dí cɔwɩɩlɔ́ rɩ́ bɔmɩ́ ɓa nyúú, rɩ́wɔ́ zɩmɩ́ ɓa sɩɛrʋ. 12 Ɩ sɩ́ zɩŋ, rɩ́ŋ é Nyuutɩna Wɩɩsɛ nɛ̃́ wɩ́ɛ́ ná wuu ɩ há bʋlɛ́ caasɛ Ɩzɩrayɛl pallɛ ná rɛ́. Bee wɩ́ɛ́, ɩ sɛ́: Ɓa bɩrmɛ́ girbétéké, á pʋsɛ dídí! 13 Ɩ́ bʋl wɩ́ɛ́ a cɩ́nɩ́ŋ mɛ́, á bʋl nyʋkwɩ́ɛ́ caasɩ́ŋ. Ɛ wɩ́bʋlɛ́ wuu nɛ́ sɩɛ́ zʋŋ dɩlla. 14 Ɛ nɛ́ Nyuutɩna Wɩɩsɛ sɛ́: Tɛ́ŋ ná mɛ́ tɔ́ɔ́ ná há sɩ́ mɩŋ satɔrɔ mɛ́, ɛ nɛ́ rɩ́ŋ a rɩ́ɩ́ bɩrmɛ́ gɩrbétéké; 15 bee wɩ́ɛ́, ɩ jʋɔsʋ rɛ́, ɓa há zɔkɛ Ɩzɩrayɛl ɓɩɛ wuu, ɛ wɩ́ɛ́, ɛ zɔkrɛ tɩɩ nɛ́ sɩ́ perí má. Seyiiri paalɔ, rɩ́ Edɔŋ wuu sɩ́ bɩrmɛ́ gɩrbétéké. Ɛ mɛ́ nɛ́, rɩ́ nɩɛ zɩŋ rɩ́ŋ nɛ́ ká Nyuutɩna Wɩɩsɛ.