Wɩɩsɛ bʋl wɩ́ɛ́ cɛ́ veŋɓaarɛ mɛ́
6
1 Nyuutɩna Wɩɩsɛ bʋlɩ́ŋ rɩ́ bʋlɛ́: 2 «Nɩbiino bio, ɓɔ́ɩ́ sɩ́ɛ́ a bel Ɩzɩrayɛl pallɛ rɩ́; a láŋ nʋɔ wɩ́ɛ́ bʋl pɔ́wɔ́. 3 Ɩ sɩ́ bʋlɛ́: Ɩzɩrayɛl pallɛ, ɩ́ zesí Nyuutɩna Wɩɩsɛ wɩ́bʋlɛ́. Noú ná Nyuutɩna Wɩɩsɛ há sɛ́ a tɩɩnɛ́ pallɛ rɩ́ duŋduóme rɩ́ polli arɩ́ polcʋɔ́rɛ mɛ́: Ná, ŋ sɩ́ a rɩ́ tokowí kuéwa mɛ́, ka rɩ́ŋ zɔkɩ́wa dɩ́ɓáárɛ. 4 Ɩ́ korsi sɩ́ zɔkɛ́, rɩ́ɩ́wa tulaalewa dɩnyɩ́kɛ má bonni. Ká rɩ́ŋ a rɩ́ɩ́wa nɩɛ sʋsɛ ɩ́ venni sɩ́ɛ́. 5 Ŋ sɩ́ pa Ɩzɩrayɛl nɩsʋsɛ a púwó venni sɩ́ɛ́, ká rɩ́ŋ pɛɛwa heŋgbele jɛrɛ kilíwa korsi. 6 Ɩ́ há sɩ́ ké ráŋ ná wuu, ɩ́ tɔ́nɛ sɩ a tɔ́ɓoru, ká rɩ́ɩ́wa venni dɩɓáárɛ zɔkɛ. A makɛ rɩ́wɔ́ zɔkɩ́wa korsi, rɩ́rɩ́wa venni rɩ́wɔ́ baá sɩ́ mɩnʋ́. Ɩ́ tulaalewa dɩnyɩ́kɛ́ sɩ́ ceŋŋí, ká rɩ́ɩ́wa óŋ'aalɛ oŋ wuu báá sɩ́ káánʋ́. 7 Ɩ́ sɩɛrʋ nɩɛ sɩ́ sʋsɛ, ɛ, ɩ́ sɩ́ zɩ́ŋ rɩ́ŋ nɛ́ ká Nyuutɩna Wɩɩsɛ. 8 Amá, ɩ́ nɩɛ ná há sɩ́ lu lɛ́ lal ná mɛ́, a pɩsɛ zʋ mɩ́ŋ tɔ́nɛ sɩɛrʋ; ɩ sɩ́ lo rɩ́ɩ́wa nɩɛ naŋá káánɛ́. 9 Ɩ́ nɩkáánɛ sɩ́ liisɩ́ŋ wɩ́ɛ́, duowa ná sɩɛrʋ ɓa há sɩ́ kɛsɩ́wa mʋʋ́ hé. Ŋ sɩ́ zɔkwɔ́ sɩɛnnɛ ná há wɩ́ŋ mɛ́ cɔ́ŋ, rɩ́wɔ́ sɩ́ɛ́ ná ɓa há pié cɔ́ venni mí. Ɓa tɩɩ sɩɛrʋ sɩ́ lɩ́wɔ́ tɩɩ, a tɩ́ŋ wɩ́tɩɛnnɛ ná ɓa há ɛɛ́ mɛ́. 10 Ɛ mɛ́ nɛ́, rɩ́wɔ́ zɩ́ŋ rɩ́ŋ é nɛ́ ka Nyuutɩna Wɩɩsɛ. Ʋ toó yɔɔ ŋ há sɩ́ pi wɩɩla né ɔ́wɔ́ mɛ́.»11 Ɛ́ wɩ́ɛ́, Nyuutɩna Wɩɩsɛ sɛ́: «Ŋmɛ́wɛ náporo, a yakɛ naasɛ, ka bʋlɛ́: “Nyúbɔ́ŋ!” Ɩzɩrayɛl wɩ́tɩɛnnɛ ná wuu; lal rɩ́ losu arɩ́ pʋɔlɩ́táárɩ́ nɛ́ sɩ́ ɓʋ́ʋ́sɩ́wɔ́ tenni. 12 Ɓa ná há mɩ́ŋ dɩ́bolé pʋɔlɩ́táárɩ́ sɩ́ ɓʋ́ʋ́sɩ́wɔ́, ɓa ná há mɩ́ŋ tɔ́ɔ́ sɩɛrʋ, lal sɩ́ ɓʋ́ʋ́sɩ́wɔ́; ka ɓa nɩkáánɛ ná ɓa há tɔ́ɛ́ hé má sʋ́sɛ losu. Ŋ sɩ́ díŋ tɛ́ŋbuoro ɓa nyúú a mʋ́ perú tokó. 13 Ɓa nɩsʋsɛ sɩ́ ɓɛsɛ tíé ɓa venni sɩsɩɛnnʋwa, ɓa korsi kile, ɓa dúŋduome isé nyúnni, ɓa pallɛ wuu nyúnni, ɓa tuó wuu sɩɛnnɛ, tulɔɔ wuu mʋ́l, arɩ́ róŋ ná wuu ɓa há nyɩ́kɛ tulaalewa aá pɔ́wɔ́ venni. Ɛ́ mɛ́ nɛ́, rɩ́ɩ́wa zɩ́ŋ rɩ́ŋ nɛ́ ka Nyuutɩna Wɩɩsɛ. 14 Ŋ sɩ́ makɩ́ŋ ballɩ́ pɔ́wɔ́, ká a rɩ́ tɔ́ɔ́ né, ráŋ ná wuu ɓa há mɩnɛ́ rʋ́ʋ́ a tɔ́wuoli. A pɔ́ girbétéké mí ka kaa mʋ́ lɛ́ Rɩbila tɔ́ɔ́. Ɛ́ mɛ́ nɛ́ rɩ́wɔ́ zɩŋ, rɩ́ŋ nɛ́ ká Nyuutɩna Wɩɩsɛ.»