22
1 Ná Nyuutɩna Wɩɩsɛ há sʋ́ʋ́ ná a pá Zeremi: «Mʋ́ Ziida kuóre jaa, a bʋ́l wɩ́ɩ́ né ráŋ. 2 Ɩ sɩ́ bʋ́lɛ́: “Ziida kuóro, ɩ nɛ́ há ké Davidi kuóɓasa daha, zesi wɩ́ɩ́ né. Ʋ kɛ́ɩ́ tɩɩ, ɩ minísiwa ná rɩ́rɩ́ɩ́ jamáŋ ná há tɩ́ŋ dánnʋʋsɛ nyáŋ aá zʋ má wɩ́ɩ́ nɛ́.” 3 Ná Nyuutɩna Wɩɩsɛ há sʋ́ʋ́ ná: Ɩ́ tʋŋ yɛ́rɛ́ arɩ́ taŋá, ɩ́ la nɛ́múrtɩɩna tá nɩvɩrdííre nɛ́sɛ mɛ́. Ɩ́ sɩ́ nɩhʋɔrɔ rɩ́ bisíme arɩ́ yúháálɔ bɛ́ŋsʋ́, a sɩ́wɔ́ oŋkanɛ́ fórú. Ɩ́ tá nɩɛ ná há wɩ wɩ́ɩ́ zɔ́kɛ́ ɓʋ́ɩ́ dɩhɩ̃́ né. 4 Rɩ́ɩ́wa nɛ́ ɓɩ́ɛ́na bɛ́llɛ́ lɩ́sɛ rɩ́ɩ́wa tɩŋ wɩ́makɛ́ nyáŋ é, kuóre sɩ́ mɩ́ŋ, a ké Davidi kuóɓasa ná daha, a dí kuorí, a zɛ́ záksɛ ɛ́ rá má a zʋ tórko aá va. Ɓa tɩɩ, ɓa minísiwa arɩ́wɔ́ nɩɛ sɩ́ wólli tɩŋ kuójaa né dánnʋʋsɛ aá zʋ. 5 Amá rɩɩ́wa nɛ́ wɩ́ŋ há sʋ́ʋ́ ná pɛ́ɩ́wa zesi, ŋ ŋmɩ́ɛ́sɔ́ tɩɩ yɩr a pɛ́ɩ́wa, kuójaa né sɩ́ a jɩɓoó, Nyuutɩna Wɩɩsɛ nɛ́ bʋ́l ɛ́.6 «Ná Nyuutɩna Wɩɩsɛ há sʋ́ʋ́ ná a mʋ́ tɩɩnɛ Ziida kuóro jaa ná mɛ́:
Táŋa, ɩ wéró anɛ Galaadɛ gɩr,
anɛ Libaŋ paalɔ nyúú ɓóŋɓóŋ,
ŋ taŋá bʋ́lɛ́ pɛ́ɩ́, ŋ sɩ́ a rɩ́ɩ́ dɩmɩnɩ́ ná
a gɩrbétéke, tɔ́ɓoó.
7 Ŋ sɩ́ a rɩ́ nɩɛ cɩ́nɩ́ mɛ́,
oro wuu rɩ́rʋ́ lalyóórícɩksɛ.
Ɓa sɩ́ cónní sɛɛdɩrɛ daliŋwéré,
a héwó níŋ.
8 «Duowa ɓɩkana nɩɛ sɩ́ ko tɩŋ Zerizalɛmɛ laka a daarɛ. Ɓa sɩ́ bɔ́sɛ náŋá a bʋ́lɛ́: “Bee rí tɛ, Nyuutɩna Wɩɩsɛ lo nyɛ wɩ́ɩ́ duo peri tɔ́zeno né?” 9 Ɛ́ mɛ́ nɛ́ rɩ́ ɓa sɩɛ́ lɩ́sɛ nʋɔ a pɔ́wɔ́ a bʋ́lɛ́: “Zerizalɛmɛ nɩɛ há ɓírmi wɩŋsa náŋa sɩ́ɛ́ a ɓáárɩ́wɔ́ nɛ́ tɛ nyɛ́ péríwó. Ɓa wɩ cɩ́nɛ́ tɩkɛ nʋtʋmɛ ná há mɩ́ŋwɔ́ Nyuutɩna Wɩɩsɛ pɛ́kɛ.” »
Ɩ́ wí kuóro Saluumi há la Zoziyasɛ nyúú mí wɩ́ɛ́
10 Ziida nɩɛ, ɩ́ sɩ́ kuóro Zoziyasɛ
há sʋ́wɛ́, wɩ́ɛ́ wí,
ɩ́ sʋ́ʋ́ wɩ́ɛ́ híínú.
Ɩ́ taŋa wi, ɩ́ wí kuóro Saluumi a
háá mʋ́ yomí sɩɛrʋ wɩ́ɛ́ nɛ́.
Beé wɩ́ɛ́, ʋ baa waá bɩrko,
ʋ báá waá bɩr nóú tɔ́lʋlɩ́.
11 Ná Nyuutɩna Wɩɩsɛ há sʋ́ʋ́ ná a mʋ́ tɩɩnɛ Ziida kuóro Zoziyasɛ bio Saluumi, fa há lɔ́ʋ́ áná Zoziyasɛ nyúú mí. Ʋ lɛ́ dɩhɩ̃́ né: «Ʋ waá bɩ́rko rɛ́. 12 Ɓa kénú mʋ́ yomí sɩɛrʋ, ʋ dɩsʋwɩ́ nɛ́, ʋ waá bɩ́rná tɔ́ɔ́ né.»
Nyuutɩna Wɩɩsɛ gáásɛ wɩ́ɛ́ Zʋwakimi nʋɔ mɛ́
13 «Zʋwakimib, wɩhála sɩ́ púí.
Ɩ há ɛ́ɛ́ ɓa sɔ kuójaa pɛ́ɩ́,
ká taŋá tóí mí!
Ɩ há sɔ tukni aá súúri,
ká wɩ́ɩ́ ná ɩ há mɔhɛ̃́ rɩ́ɩ́ aa pá nɩɛ,
ɩ wʋ́ʋ́ é a!
Ɩ há ɛ́ɛ́ nɩɛ náŋá tʋ́tʋŋ yɔ́ɔ́,
kɛ́ɩ́ wʋ́ɔ́ túŋ!
14 Ɩ bɩ́ɩ́nɩ́ tɩɩ mɛ́ a bʋlɛ́:
“Ŋ sɩ́ sɔ kuójɩzeno
arɩ́ tukzeŋsi a páŋ tɩɩ.”
A hé tókórówa,
a pɩ́ɛ́rɛ sɛɛdɩrɛ daasɛ tɔ́ʋ́ zeŋe mí,
a fɛ́lwɔ́.
15 Ɩ há có rɩ́wɔ́ zɩŋ rɩ́ɩ́ ká kuór,
rá wɩ tɛ ɩ bɛ́llɛ a lɩ́sɛ sɛɛdɩrɛ daasɛ sɔ́ɩ́ jaa
rɩ́wɔ́ zɩŋ rɩ́ɩ́ rɩ́ nɩɛ wuu to balá rɛ́?
Ɩ áná sɩɛ́ faá dí ɓɩɛ́ kaá nyɔ
anɛ ɛ́ nɩɛ wuu haá ɛ́ɛ́ nɛ́,
amá ʋ sɩɛ́ faá tɩ́ŋ taŋá arɩ́ yɛ́rɛ́,
kɔ́ʋ́ wɩ́ɛ́ wuu cɛ́rɛ pɔ́ʋ́.
16 Ʋ la taŋá aá pá nɩyaarɔ́
arɩ́ summo,
ʋ wɩ́ɛ́ cɛ́rɛ weri.
Nɛ́ŋ ná háá tʋŋ nyɛ,
ʋʋ́ máŋsʋ́ rʋ́ʋ́ ɓɩɛ́na ɩ̃́ŋ nɛ́,
Nyuutɩna Wɩɩsɛ nɛ́ bʋ́l ɛ́.
17 Amá ɩ é,
ɩ sɩ́bélé arɩ́rɩ́ɩ́ sabɩɩna
cɔ́ɩ́ dʋŋɔ wér mí ní,
aá ɓʋ́ nɩɛ ná há wɩ wɩ́ɩ́ zɔ́kɛ́,
aá bɛ́ŋsɛ nɩɛ arɩ́ bɩbarɩ́.»
18 Ná Nyuutɩna Wɩɩsɛ há sʋ́ʋ́ ná a mʋ́ tɩɩnɛ Zoziyasɛ bio Zʋwakimi há ká Ziida kuóro mí:
«Ʋ sʋʋ mɛ́,
yúwííri gɔkɩ́ waá mɩŋ, nɛ́ŋ wáá a rʋ́ʋ́ bʋlɛ́:
“Beé wɩhála rɛ́, ŋ maábinɔ́ŋɔ!”
“Beé wɩhála rɛ́, ŋ nátoló!”
Nɛ́ŋ waá a rʋʋ wúú mí a bʋlɛ́:
Beé wɩhála rɛ́, ŋ nyúútɩ́na!”
Beé wɩhála rɛ́, ŋ kuóro!”
19 Ɓa sɩ́ húú anɛ kokúme,
ɓa sɩ́ túú lɛlɔ a mʋ́ yoo tá
rʋ́ʋ́ kɛkɛ Zerizalɛmɛ dánnʋʋsɛ mɛ́.»
Hɩɩ̃sɛ rɩ́ yɩr múúre pú Zerizalɛmɛ
20 Zerizalɛmɛ nɩɛ,
Ɩ́ zɛ́ Libaŋ paalɔ nyúú ɓóŋɓóŋ ká cáási.
Ɩ́ a rɩ́wɔ́ nɩ́ɩ́wa líŋsi
Basaŋ típaŋtaŋɩ́ ná mɛ́.
Ɩ́ kɩ́ɩ́lɛ Abarimi pallɛ daha,
Bee wɩ́ɛ́, ɩ́ nɩcólle sʋ́sɔ́.
21 Ŋ sɩɛ́ fa la sɩ́ɛ́ bʋl pɛ́ɩ́wa má rɛ́,
tɛ́ŋ ná mɛ́ ɩ́ fa há wɩ́ɩ́ wuu bɩ́ɩ́nɛ,
amá ɩ́ lɩ́sɛ nʋɔ a bʋlɛ́:
“Á wáá zesi”.
Ɩ́ wɩ́'aamalɩ́ nɛ́ ɛ́
ɩ́ heŋbííri wuu mí;
ɩ́ há wɩ́ŋ líŋo sáŋɛ ná.
22 Poo sɩ́ píésíwa sɩ́dííre ná wuu há nɩhɛ̃́ pʋnʋɔla káá col:
ɩ́ nɩcólle col yomí sɩɛrʋ.
Bɔ́ŋbɔ́ŋ ná wuu ɩ́ há tʋmɛ́,
ʋ nɛ́ tɩ́ɩ̃́wa hɩɩ̃sɛ arɩ́rɩ́ɩ́wa yɩr múúre.
23 Ɩ́ mɩŋ Libaŋ mɛ́,
a fa sɔ́ɩ́wa jɩɩsɛ arɩ́ sɛɛdɩrɛ daasɛ,
sɩɛ́ ná wɩɩla duó, há sɩ́ kánɩ́wa a úríwa mɛ́
rɩ́ɩ́wa cɩ́cɛ́ŋ,
aá bɩ́rɛ
anɛ háálɔ lʋ́lɛ́ tɛ́ŋ mɛ́!»
Zʋwakimi bio Koniya wɩ́ɛ́
24 Nyuutɩna Wɩɩsɛ nɛ́ bʋ́l ɛ́: «Ŋ ŋmɩ́ɛ́sɔ́, rɩ́ Ziida kuóro Koniya há ká Zʋwakimi bio, fa ká néciko rɩ́ɩ́ mɩ́nɩ́ŋ néduu nɛ́sɛ néní mí má, ŋ sɩ́ lɩ́sʋ́ yoo tá. 25 Ŋ sɩ́ kánɩ́ a hé nɩɛ ná há jɛ́ɩ́ ɓʋ́ɩ́, nɩɛ ná ɩ há cáásɛ aá fɔ́wɔ́, Babɩlɔɔnɛ kuóro Nebikanezaare rɩ́ Kalde nɩɛ nɛ́sɛ mɛ́. 26 Ŋ sɩ́ kírí rɩ́rɩ́ɩ́ málʋlɩ́ a hé tɔ́ɔ́ nɔ́ŋɔ mɛ́ há tóíwa tɔ́lʋlɩ́ mɛ́. Ráŋ nɛ́ rɩ́ɩ́wa sʋsɛ. 27 Ɩ́ sɩ́ jɩ́já rɩ́wɔ́ bɩ́rkóíwa tɔ́ɔ́ sɩɛrʋ, amá ɩ́ waá wolli.” »
28 Nɩɛ sɩ́ bɔ́sɛ a bʋ́lɛ́: «Báálɔ né, Koniya ká vie ná há céŋŋe, a bɩ́rmɛ oŋyɔ́ɔ́, nɛ́ŋ há wʋ́ʋ́ já nɛ́? Beé rí tɛ, ɓa kírú rɩ́rʋ́ dunɩɛ a hé tɔ́ɔ́ ná ɓa há wʋ́ʋ́ ɛ̃́ sɩɛrʋ?»