Wɩɩsɛ sɩ́ dí nɩɛ wuu sarɩ́ya
66
1 Ná Nyuutɩna Wɩɩsa há sʋ́ʋ́ ná:«Bána káŋ kuóɓasa nɛ́,
ká tíé áŋ naasɛ dɩsakɩ́.
Jɩ'orí rí, ɩ́ jɩ́já rɩ́ɩ́wa sɔ́ɔ́ páŋ?
Nɛɛ́ rɛ́ sɩ́ áŋ dɩfɩɛlɩ́?
2 Onni nyaŋ wuu káŋ nɛ́sɛ oŋ'aalɛ́ nɛ́,
onni nyaŋ wuu káŋ tɩ́llɛ́ nɛ́
Nyuutɩna Wɩɩsɛ nɛ́ bʋ́l ɛ́.
Ná nɛrɔ ná, ŋ há sɩ́ píŋ sɩ́ɛ́ a cɔ́ʋ́ mɛ́:
Nɛ́ŋ ná há ká nɛ́múrtɩ́ŋ
a mɩ́ŋ sazɔkɔ́ mɛ́,
káŋ wɩ́bʋlɛ́ héwífɔɔ mɩ́nʋ́ mɛ́.
3 Nɛrɔ ná há ɓʋ́ nɔɓala
ʋ nɛ́ ŋmɔ́wɛ nɩbííno má ɓʋ́;
nɛrɔ ná há ɓʋ́ pieŋso,
ʋ nɛ́ ŋmɔ́wɛ vaa má ɓʋ́;
nɛ́ŋ ná há kéŋ satɔ́ɔ́rípalɔ ɓɔ́ cáánɛ,
koo cɛ́l nɛ́ ʋ kaa ɓɔ́;
nɛ́ŋ ná há nyɩkɛ tuláálewa,
ʋ hé bárka a pá veno ní.
Ʋ ká nyaamɩ́, ɛ́ nɩɛ tɩɩ bɛ́llɔ́
a lɩ́sɩ́wɔ́ ŋmɛ́ŋsɛ,
ɓa satɔ́ɔ́rɩ́wɩ́ɛ́ nɛ́ ká venni
ná há kéŋ sakuóso ɓáárɛ́.
4 Ɛ́ wɩ́ɛ́, ɓa wɩɩla nɛ́ sɩ́ áŋ má satɔ́ɔ́rɩ́wɩ́ɩ́,
wɩ́ɩ́ ná há sɩ́ hé héwíŋ a pɔ́wɔ́,
ʋ nɛ́ ŋ sɩ́ a rʋ́ʋ́ péríwó.
Bee wɩ́ɛ́, ŋ́ yɩrɔ́ ká nɛ́ŋ wɩ saŋɛ,
ŋ bʋl wɩ́ɛ́, ká ɓa wɩ́ŋ rɩ́ zésé.
Ʋ ná ŋ há waá já, ʋ nɛ́ ɓa ɛ́ɛ́,
ŋ́ há wʋ́ʋ́ ná có, ʋ nɛ́ ɓa bɛ́llɛ́ pi.»
5 Ɩ́ nɩɛ ná háá fá Nyuutɩna Wɩɩsɛ liŋó,
ɩ́ zésú liŋó:
Ɩ́ maábinaŋá ná há bɛ́rɩ́wa,
a vɛ́wa tá ŋ yɩr mɛ́, ɓa sɛ́:
«Rɩ Nyuutɩna Wɩɩsɛ makʋ́ píŋ,
ráá néíwa satɔrɔ́!»
Amá ɓa nɛ́ sɩ́ dí hɩ̃́ɩ̃́sɛ.
6 Liŋó rɩɩ dɔ́ŋ tɔ́ɔ́ sɩɛrʋ,
liŋó rɩɩ lɛ Wɩcʋɔlɩjɩzeno mí.
Nyuutɩna Wɩɩsɛ liŋó ní:
tumé ná ʋ dɩŋdɔma há mɔhɛ̃́ rɩ́wɔ́ ná,
ʋ nɛ́ ʋ pi aá túŋwó mí.
7 Ʋ luóru mɩŋ lɔkɛ́ mɛ́ nɛ́ ká ʋ há lʋlɛ,
ʋ luóru mɩ́ŋ wɩ́ɩ́ (ɩ́ɩ́nɛ́) mɛ́ nɛ́ ká ʋ há lʋl heŋbóle.
8 Áŋ rɛ́ há nɛ nyɛ́ wɩ́ɩ́?
Áŋ rɛ́ há ná wɩ́ɩ́ né duó?
Ɓa wo tɔ́pírmi nɩɛ aá lʋl tápʋ́l balá rɛ́?
Ɓa wo dupírmi nɩɛ aá lʋl naasɩ́ balá rɛ́?
Ká Sɩɔŋ é luóru há de mɩ́ŋ lɔkɛ́ mɛ́
nɛ́ ká ʋ há lʋl heŋbolli?
9 Ŋ sɩ́ a rɩ háálɔ ká puo ká sɩ́ lʋlʋ?
Nyuutɩna Wɩɩsɛ nɛ́ bɔsɛ ɛ́?
Ŋ sɩ́ rɩ háálɔ cɛ́ lʋ́lɛ́ mɛ́ ká sɩ́ bio lʋlʋ?
ɩ Wɩɩsɛ nɛ́ bɔsɛ ɛ́?
10 Ɩ́ rɩ́ Zerizalɛmɛ jʋ́ɔ́sɛ,
ɩ́ nɩɛ ná wuu há cóú,
ɩ́ ló rɩ́ɩ́wa sɩɛnnɛ tɔ́rʋ́ nyúú.
Ɩ́ nɩɛ ná wuu há wúú wɩ́ɛ́,
ɩ́ súúrú mí a jʋ́ɔ́sɛ kɩ́ŋkáŋ.
11 Beé wɩ́ɛ́, ɩ́ sɩ́ ɔ́sʋ́ ɩ́l ná
háá pá dóé, a vɔ́ksɛ,
ká nyɔ́ʋ́ ɩ́l ná há kéŋ píŋ (zeno)
arɩ́ satɔrɔ́.
12 Beé wɩ́ɛ́, ná Nyuutɩna Wɩɩsɛ há sʋ́ʋ́ ná:
Ŋ sɩ́ a rɩ tɛŋfɩ́ɛ́l pál anɛ fuo nyii
a ko yakɛ Zerizalɛmɛ mɛ́,
ká a rɩ duówa má píŋ
pal anɛ polcʋɔrɛ́ nyigire
a mʋ́ pérú.
Ɩ́ sɩ́ ɔsɛ ɩ́l,
a pɩ́ naasɛ mɛ́ rɩ́ŋ láárɩ́wa
ká pííwa pɛ́kɛ sama mɛ́.
13 Anɛ ɛ́ maá háá bʋɔlʋ́ bio,
ŋ é tɩɩ nɛ́ sɩ́ bʋɔlɩ́wa,
ʋ ká ɛ́ nɛ́, ɩ́ sɩ́ ná bʋɔlɛ́ Zerizalɛmɛ mɛ́.
14 Ɩ́ sɩ́ɩ́ sɩ́ ná, rɩ́ɩ́wa sɩɛnnɛ tɔrɛ,
ɩ́ heŋgbele sɩ́ bɩ́rɛ ná dóé anɛ
nyɔɔ há bɩ́rɛ tɔwɛ.
Beé wɩ́ɛ́, Nyuutɩna Wɩɩsɛ sɩ́ a
rʋ́ʋ́ tʋtʋnna zɩ́mʋ́ nɛ́sɛ,
ká makʋ́ cɔwɩɩlɔ́
a pɔ́ʋ́ dɩŋdɔma:
15 Beé wɩ́ɛ́, ná Nyuutɩna Wɩɩsɛ nɩ́ɩ́ kúé:
níŋ mí sɩɛrʋ, ʋ tɩ́ŋ aá ko,
ʋ lalyóórítorokowa nɩhɩ̃́ dopoo ní,
rʋ́ʋ́ dúú tɛŋbuóro arɩ́ cɔ́ɛ́,
rʋ́ʋ́ bɛ́ŋsɛ́ nʋɔ sú, a tɩ́ŋ níŋpoo mí.
16 Oo, Nyuutɩna Wɩɩsɛ sɩ́ tɩ́ŋ níŋ mí ní,
a dí sarɩ́ya,
a tɩ́ŋʋ́ tókówí mí,
ʋ sɩ́ dí nɩɛ wuu sarɩ́ya:
Nyuutɩna Wɩɩsɛ nɩɓʋ́ʋ́lɛ́ sɩ́ a kánɛ.
17 Nɩɛ ná há lɩ́sɩ́wɔ́ tɩɩ wɩ́bɔma mɛ́,
a mʋ́ʋ́rɩ́wɔ́ tɩɩ,
a jɩ́já rɩ́wɔ́ mʋ́ Záádɛ ɓáárɛ́ sɩɛnnɛ,
a tɩ́ŋ nɛrɔ ná há mɩ́ŋ sɩsɩɛnnɛwa har,
káá dí busunnú pʋsɛ namɩ́ŋsa, koo arɩ́ datʋ́ɩ́,
ɓa wuu sɩ́ sʋsɛ,
Nyuutɩna Wɩɩsɛ nɛ́ bʋ́l ɛ́.
18 Ŋ ɩ̃́wɔ́ sabɩŋsɛ arɩ́wɔ́ wɩ́'állɛ;
tɛ́ŋ péró, rɩ́ŋ a rɩ duówa wuu
arɩ́ liŋó wuu nɩɛ hé náŋá mɛ́;
a ká sɩ́ɩ́ ko náŋ píŋ:
19 ʋ ká ɛ́ nɛ́, ŋ sɩ́ hé nyɩ́nɛ duówa sɩsɩɛnnʋwa.
ká tʋ́ŋwɔ́ nɩkáánɛ́ ná sɩɛrʋ nɩɛ naŋá, duówa nɩɛ rɩ́:
Rɩ́wɔ́ mʋ́ Tarsiisi, Puuti arɩ́ Luudi nɩɛ há ká tuyóóre rí,
Tubal, Yavaŋ arɩ́ mʋʋ sɩɛrʋ tɔnnɛ ná
há mɩ́ŋ dɩbole,
a há wɩ́ŋ wɩ́ɛ́ nɩ́ɛ́ ná,
a há wɩ́ŋ píŋ má néé ná;
a máŋsɩ́ŋ píŋ pá ɛ́ duówa nɩɛ.
20 Ɓa sɩ́ lɩ́sɩ́wa maábináŋá
duówa ná wuu sɩɛnnɛ,
rɩ́wɔ́ zɩ záksɛ rɩ́ lalyóóritórkowa rɩ́ torkowa ná há kéŋ nyútɔllɛ,
rɩ́wɔ́ zɩ kokume nɩɛrawa arɩ́ nyʋkmawa
a ko Zerizalɛmɛ, ŋ paalɔ ná há kɔ́ʋ́ dʋŋɔ nyúú,
anɛ satɔɔrɩ́pala a pá Nyuutɩna Wɩɩsɛ,
Nyuutɩna Wɩɩsɛ nɛ́ sɛ́.
Vʋk'ɔsɔ́ ná há nɩhɩ̃́ Ɩzɩrayɛl nɩɛ vʋk'ɔsɔ́ ná
ɓa háá hé gbaŋsɛ ná há wɩ busunnú kéné sɩɛnnɛ,
a kaá ko Nyuutɩna Wɩɩsɛ Wɩcʋɔlɩjɩzeno ná sɩɛrʋ nɛ́ ɛ́.
21 Ŋ sɩ́ lɩ́sɛ vʋk'ɔɔsa arɩ́ Levitiwa ɓa sɩɛrʋ, Nyuutɩna Wɩɩsɛ nɛ́ sɛ́ ɛ́.
22 Ʋ ká ɛ́ nɛ́, anɛ ɛ́ baŋfɛlɔ́ ná rɩ́ tífɛlɔ ná ŋ há ɛ́ɛ́
há waá daarɩ́ ná ɛ́,
ɩ́ má yɩra arɩ́ɩ́wa dunɩɛ yɩra waá yʋ́ksɩ́ ná,
Nyuutɩna Wɩɩsɛ nɛ́ bʋ́l ɛ́.
23 Fɩ́ɛ́lɛ́ tápʋ́l é wuu,
arɩ́ cana é wuu wuu,
nɩɛ wuu sɩ́ ko
a ɓírmíŋ sɩ́ɛ́,
Nyuutɩna Wɩɩsɛ nɛ́ bʋ́l ɛ́.
24 Rɩ ɓa nɛ́ kúé aá lɛ́,
ɓa sɩ́ ná nɩɛ ná fa há cɛ́
Nyuutɩna Wɩɩsɛ mɛ́ lɛ́lɛ́:
ɓa deŋdule waá sʋsɩ́ ná,
ɓa níŋ má waá dʋsɩ́ ná,
ɓa sɩ́ ká sakuóso a pá nɩɛ wuu.