Wɩɩsɛ tʋtʋnna sɩ́ ná satɔrɔ́ ká rɩ́ nɩbɔma ná wɩɩla
65
1 Ŋ ló nɩɛ ná fa há wɩ́ŋ sʋ́l jáŋ,ŋ ló nɩɛ ná fa há wɩ́ŋ já néŋ.
Ŋ bʋ́l duó ná fa há wɩ́ŋ yɩr yɩ́rɛ rɩ́ a bʋlɛ́:
«Néŋ ní, néŋ ní.»
2 Ŋ jɛ́rɩ́ŋ nɛ́ŋsa tɛ́ŋ wuu mí,
a cáásɛ duó ná há ká nyúdotɩ́ŋ,
a cáásɛ nɩɛ ná há pi ŋmɛ́ŋbɔmɔ,
aá tɩŋwɔ́ tɩɩ cólle.
3 Ɓa ká nɩɛ ná háá jáŋ nʋɔ mɛ́
nyaamɩ́, tɛ́ŋ wuu mí:
ɓaá ɔsɛ vʋka záádɛwa mɛ́ nɛ́,
kaá nyɩkɛ tulaalewa warɛwa korsi daha.
4 Ɓa ká nɩɛ ná háá zʋ́ lɛlblli sɩɛnnɛ nɛ́,
aá cɔ́ pallɛ bɔnnɛ sɩɛnnɛ.
Ɓáá dí koo namɩ́ɛ́,
ɓa gbaŋsɛ sɩɛnnɛ namɩŋsɛ wuu ká busunnú ní.
5 Ɓa sɛ́: «Pɔ́ɩ́ tɩɩ mɛ́,
sɩ́ tuupéríŋ, beé wɩ́ɛ́, ŋ lɩ́sɩ́ rɩ́ɩ́ ɛ́ɩ́ dʋŋɔ!»
Wɩ́'allɛ nyáŋ wuu nɩhɩ̃́ nyʋ́ɔ́sɛ nɛ́
ŋ mɩ́ŋgbelwie sɩɛrʋ,
anɛ níŋ háá kánɛ́ tápʋ́l wuu.
6 Ɩ́ sɩɛ́ pɔ́ wérí, wɩ́ɛ́ nyáŋ mɩ́ŋ kɛnɔ mɛ́,
ŋ sɩ́ɩ́ cɔ́wɔ́ mɛ́,
ɛ́ wɩ́ɛ́, ŋ wɩ́ŋ nʋɔ taŋŋɛ,
a kaá já tɛ́ŋ ná mɛ́ ŋ há sɩ́ túŋ kɩ́ŋ,
a túŋ rʋ́ʋ́ nʋɔ cesi,
7 Nyuutɩna Wɩɩsɛ nɛ́ bʋlɛ́,
ɩ́ tɩɩ wɩ́bɔma arɩ́rɩ́ɩ́wa naabálwa wɩ́bɔma,
ɓa wuu kɩma nɛ́ ŋ sɩ́ túŋ.
Ɓa nɛ́ faá nyɩkɛ tulaalewa pallɛ daha,
kaá tʋ́ɔ́mɩ́ŋ yɩr má dúŋdúóme daha.
Ŋŋ́ sɩɛ́ sɩ́ túŋwó wɩ́'állɛ ná
ɓa há ɛ́ɛ́ ɓa daarɛ kɩ́ŋ
rɩ́wɔ́ nʋɔ cesi.
8 Ná Nyuutɩna Wɩɩsɛ há sʋ́ʋ́ ná:
Anɛ ɛ́ ɓa háá ná víínyi nɔŋcik
rʋ́ʋ́ kéŋ nyii ɓa sɛ́:
«Ɩ́ sʋ́ʋ́ ɓʋ́,
beé wɩ́ɛ́, bárka mɩ́nʋ́ mɛ́»,
ɛ́ tɩɩ nɛ́, ŋ má sɩ́ tʋ́míŋ tʋtʋnna yɩr mɛ́,
a makɛ rɩ́ŋ sɩ́ nɩɛ wuu zɔkʋ́.
9 Ŋ sɩ́ a rɩ Zakɔbɛ ká duó,
ʋ ká ɛ́ nɛ́, rɩ nɛ́ŋ mɩ́ŋ Ziida mɛ́, a tɩ́llɩ́ŋ pallɛ ná:
ŋ nɩlɩ́sɛ́ sɩ́ tɩ́llɩ́wɔ́,
ŋ tʋtʋnna ná sɩ́ mɩ́ŋ ráŋ.
10 Saarɔŋ típáŋtaŋŋɩ́ ná sɩ́ bɩ́rmɛ pʋwɩ́ɛ́la nyilɛ́lɛ́ (nyɔ́ɔ́ dɩdíí)
ká rɩ Akɔɔrɛ polo má bɩ́rmɛ pʋzeŋsi dɩpɩnɛ́,
a pá nɩɛ ná háá jáŋ.
11 Amá ɩ́ é nɩɛ ná há vɛ́ŋ é Nyuutɩna Wɩɩsɛ a tá,
a sʋ́llɩ́ŋ paalɔ́ ná há kɔ́ʋ́ dʋŋɔ (pár) wɩ́ɛ́,
a bíl ɓɩdííle a pá veno Gaadɛ
ká kuósi dɩvɛ́ŋwa a sú nyiŋgbaŋa
a pá veno Meni má,
12 ŋ sɩ́ tɛ́ɩ́wa pá tokówí:
ɩ́ wuu sɩ́ ɓírmí tíé, rʋ́ʋ́ ɓʋ́ʋ́sɩ́wa.
Beé wɩ́ɛ́, ŋ yɩ́rɩ́wa, kɛ́ɩ́ wɩ saŋɛ,
ŋ bʋlɩ́wa rɩ́, kɛ́ɩ́ wɩ zesé.
Ɩ́ ɔ́ɔ́ ná há wɩ wérí ŋ rɩ́,
ká bɛllɛ a lɩ́sɛ wɩ́ɩ́ ná ŋ há waá já.
13 Ɛ́ nɛ́ tɛ́ Nyuutɩn Wɩɩsɛ sɛ́:
Ná, ŋ tʋtʋnna sɩ́ dí,
kɛ́ɩ́ é, rɩ́ɩ́wa ká losu.
Ná, ŋ tʋtʋnna sɩ́ nyɔ,
kɛ́ɩ́, rɩ́ɩ́wa ká nyinyʋ́ɔ́sɛ.
Ná, ŋ tʋtʋnna sɩ jʋ́ɔ́sɛ,
kɛ́ɩ́ é, rɩ́ɩ́wa dí hɩ̃́ɩ̃́sɛ.
14 Ná, ŋ tʋtʋnna sɩ́ cáási satɔrɔ́,
wér há péríwó wɩ́ɛ́,
amá ɩ́ é sɩ́ cáási,
wɩɩla há nɩ́ɩ́sɩ́wa wɩ́ɛ́,
oo, ʋ ká ɛ́ nɛ́, ɩ́ sɩ́ buŋsi,
sazɔkɔ́ há kénííwa wɩ́ɛ́
15 Ɩ́ yɩr sɩ́ a malla a páŋ laadííre,
rɩ ɓa nɛ́ kúé aá bʋl bʋra wɩ́ɛ́,
ɓa sɩ́ bʋlɛ́:
«Rɩ Nyuutɩna Wɩɩsɛ a, rɩ́ɩ́ sʋʋ nɩ́ɛ́sɛ nyɛ!»
Amá ʋ sɩ́ hé yɩfɛlɔ a pɔ́ʋ́ tʋtʋnna.
16 Tɔ́ɔ́ sɩɛrʋ, nɛ́ŋ ná háá ja bárka,
ʋ mɔhɔ̃́ rʋ́ʋ́ yɩ́rɛ Wɩɩsɛ ná há ká táŋa yɩr nɛ́
a pɔ́ʋ́ tɩɩ,
tɔ́ɔ́ sɩɛrʋ nɛ́ŋ ná háá ja rʋ́ʋ́ ŋmɩ́ɛ́sɛ
ʋ mɔhɔ̃́ rʋ́ʋ́ ŋmɩ́ɛ́sɛ Wɩɩsɛ ná há ká táŋa yɩr mɛ́ nɛ́.
Beé wɩ́ɛ́, díé wɩɩla sɩ́ dáárɛ,
oo, ɓa sɩ́ nyɩ́ɩ́kɩ́ŋ sɩ́ɛ́ mɛ́.
17 Ŋ sɩ́ a bána ɓɩfɛlɔ arɩ́ tífɛlɔ;
ɛ́ é, díé ná yɩr baá waá yɩ́rɛ,
nɛ́ŋ baá waá a rʋ́ʋ́ bɩ́ɩ́nʋ́ (díé) wɩ́ɛ́.
18 Ɩ́ jɩ́jʋ́ɔ́sɛ,
ɩ́ mɩ́ŋ satɔrɔ́ mɛ́ tɛ́ŋ wuu mí,
a tɩ́ŋ wɩ́ɛ́ ná ŋ há ɛ́ɛ́ wɩ́ɛ́:
Beé wɩ́ɛ́, ŋ sɩ́ a rɩ Zerizalɛmɛ ká satɔrɔ́
rʋ́ʋ́ nɩɛ jɩ́jʋ́ɔ́sɛ.
19 Oo, ŋ sɩɛrʋ sɩ́ tɔrɛ Zerizalɛmɛ nyúú,
ŋ sɩ́ jʋ́ɔ́sɩ́ŋ nɩɛ yɩr mɛ́.
Nɛ́ŋ baá waá a rʋ́ʋ́ nɛ́
wííle ɛ́ ráá má cááse ráŋ.
20 Ráŋ, bíí baá waá sʋwɛ rɩ́rʋ́ nʋɔ ɩ́l,
ráŋ, nɔhɔ̃́ waá sʋwɛ rʋ́ʋ́ tápʋ́lɛ́ ráá wɩ péré;
beé wɩ́ɛ́, nɛ́ŋ ná há kéŋ bɩŋsɛ zɔlɔ ká sʋwɛ
há ká heŋbie ní,
rɩ wɩ́bɔ́ŋ'aarɔ nɛ́ sʋwɛ bɩŋsɛ zɔlɔ nʋɔ mɛ́,
bʋra nɛ́ dúú.
21 Ɓa sɩ́ má jɩɩsɛ,
aá zʋ́,
ɓa sɩ́ cɔŋsɛ tuuni baksɛ
aá díwɔ́ nɔnɔ;
22 ɓa baá wɩ jaa sɔ́
rɩ nɛ́ŋ rɩ tɩ́llʋ́,
ɓa baá wɩ tuuni cɔ́ŋsɛ
rɩ nɛ́ŋ rɩ díwó nɔnɔ.
Beé wɩ́ɛ́, tuuni bɩŋsɛ nʋɔ há ká ɛ́ ná,
ŋ nɩɛ má bɩŋsɛ ká ɛ́ nɛ́,
ŋ nɩɛ sɩ́ díwó nɛ́ŋsa tʋtʋmɛ́ nyʋ́ɔ́rɛ.
23 Ɓa baá wɩ bɔlɛ dí yɔ́ɔ́,
ɓa baá wɩ bɛlɛ lʋl rɩ́ɩ́ huhú,
beé wɩ́ɛ́, ɓa nɛ́ ká duó ná
Nyuutɩna Wɩɩsɛ bárka há mɩŋwɔ́ mɛ́ nɩɛ
ɓa rɩ́wɔ́ dunɩɛ.
24 Ŋ sɩ́ saŋwɔ́ sʋ́lɛ́
rɩ́wɔ́ há wɩ́ŋ yɩ́rɛ má tɩɩ,
ɓa mɩ́ŋ bʋlɛ́ mɛ́ nɛ́ ká
ɓa liŋó há zʋ́ŋ dɩllɛ.
25 Naŋcéwuri arɩ́ pewie sɩ́ hé náŋá mɛ́ aá dí nyɔɔ,
kɩ́ŋkáná arɩ́ nɔɔ sɩ́ dí nyɔɔ,
ká rɩ kúŋkulo nɛ́ a dʋŋ é ɓɩdííli.
ɓa bɛlɛ sɩ́ pɛ́ lɛ́l náŋá.
Ŋ paalɔ́ ná há dʋŋɔ́ nyúú wuu mí,
bɔ́ŋbɔ́ŋ waá mɩŋ, zɔkrʋ́ waá mɩŋ,
Nyuutɩna Wɩɩsɛ nɛ́ sɛ́.