Ezekiyasɛ pʋɔlɩ́ arɩ́rʋ́ duóre wɩ́ɛ́
38
1 Ɛ́ cɛ́rɛ́ mɛ́, kuóro Ezekiyasɛ ɓalʋ́ sʋʋrɛ pʋɔlɩ́. Wɩɩsɛ wɩ́laabʋllɔ Ezayi há ká Amɔtɛ bio, ko nóú a bʋ́lʋ́ rɩ́ a bʋlɛ́: «Ná Nyuutɩna Wɩɩsɛ há sʋ́ʋ́ ná: Máŋsɛ wɩ́ɛ́ pɛ́ɩ́ jaa nɩɛ, beé wɩ́ɛ́, ɩ sɩ́ sʋwɛ, ɩ waá lú lɛ.» 2 Ɛ́nɛ́ Ezekiyasɛ kánʋ́ sɩ́ɛ́ cú zéŋ mí, ká sʋl Nyuutɩna Wɩɩsɛ. 3 Ʋ sɛ́: «Aá! Nyuutɩna Wɩɩsɛ, líísí tɩɩ, rɩ́ɩ́ sɩ́ɛ́ mɛ́, ŋ va taŋá sɩɛrɛ arɩ́ sapʋmmɩ́, a ɔ́ʋ́ ná háá tɔ́rɩ́ sɩɛrʋ.» Ká Ezekiyasɛ cáásɛ bɩsɛ sɩ́mɩɩrʋ. 4 Nyuutɩna bʋl Ezayi rí a bʋlɛ́: 5 «Mʋ́ bʋl Ezayi rɩ́ a bʋlɛ́: Ná Nyuutɩna Wɩɩsɛ, ɩ áná Davidi Wɩɩsɛ há sʋ́ʋ́ ná: Ŋ nɩ́ɩ́ sʋlɛ́, a néí sɩ́mɩɩrʋ má. Ŋ sɩ́ súúri bɩŋsɛ fí arɩ́ bʋ́mmʋ́ɔ́ ɩ tápʋ́la mɛ́. 6 Ŋ sɩ́ lɛ́ɩ́ tá, a la tɔ́ɔ́ né má tá Asiiri kuóro nɛ́sɛ mɛ́. Ŋ sɩ́ cú tɔ́ tɔ́ɔ́ né mí. 7 Sɩɛ́ ná Nyuutɩna Wɩɩsɛ nyɩ́nɛ ná háá mákɛ́, rɩ Nyuutɩna Wɩɩsɛ sɩ́ tʋ́mʋ́ há sʋ́ʋ́ ná: 8 Ná, ŋ sɩ́ a rɩ fɩ́ɛ́l ná há wáárɛ tuwi Akaazɛ neŋcolo daha, rʋʋ nʋkɛ. Rʋʋ nʋkɛ, a bɩr zɩ a peri neŋcolsɩ́ɛ́ fí.» Ɛ́ nɛ́ wɩɩsɛ baa nʋkɛ ká tá neŋcolsɩ́ɛ́ ná fí fa há mɩŋ fɩ́ɛ́l mɛ́.Ezekiyasɛ wɩ́sʋlɔ́ wɩ́ɛ́
9 Ziida kuóro Ezekiyasɛ yɩl, ʋ há wɩ́ɩ́lɛ́ ká ísí har mɛ́.
10 Ŋ hiẽso sɩɛrʋ, cɛ́rɛ́ ná há wéró a páŋ,
ŋ bʋ́lɩ́ŋ tɩɩ mɛ́ a bʋlɛ́:
Ŋ mɔhɔ̃́ rɩ́ŋ col.
Lɛ́lɛ́tɔ́ɔ́ mɛ́ nɛ́
rɩ́ŋ díŋ bɩŋsɛ ná káánɛ́.
11 Ŋ sɛ́: Ŋ baá waá a rɩ́ŋ ná Nyuutɩna Wɩɩsɛ
nɩwomme tíé nyúú.
Ŋ baá waá a rɩ́ŋ bel nɛ́ŋ wuu sɩ́ɛ́ mɛ́
dúníé nɩbííne wuu sɩɛrʋ.
12 Ŋ dʋma (mɩɩsɛ) lɩ́ɔ́, a kɛ́kɩ́ŋ mɛ́ a mʋ́ dɩboli
anɛ pʋnʋɔlɔ́ lɔ́k.
Ŋ hiẽso pérú nʋɔ
anɛ ɛ́ pɛŋsɔ́ɔ́rɔ gɛpúŋ (gɛnɛ́ŋ) haá pérú nʋɔ,
kɔ́ʋ́ conni gɛŋmɛ́sɛ káánɛ a tá.
A pɔ́ cɩcʋ́ɔ́ kaá mʋ́ tɩ́táŋ
ɩ sɩ́ tɩ́ɛ́rɩ́ŋ (tenníŋ wɩ́ɛ́).
13 Ŋ sɩ́ bɩ́rmɛ oŋyɔ́ɔ́, rɩ tɔ́ɔ́ há wɩ pʋ́lɛ́.
Ʋ sɩ́ caŋsɩ́ŋ heŋgbele wuu anɛ kɩ́ŋkáná.
A pɔ́ wɔhɔ kaá já tɩ́ŋtáŋ,
ɩ sɩ́ zɔ́kɩ́ŋ a tenni.
14 Ŋ wíó anɛ cáálakowíé, ɛ́ ráá má anɛ káŋcɩ́lɩ́ (titimúí),
ŋ wíó anɛ kúokʋma.
Ŋ gúlo ká píŋ sɩ́ɛ́ cɔ́ɩ́ mɛ́:
Ŋ bɔ́lɔ́ Nyuutɩna,
fáŋ búŋse!
15 Rɩ́ŋ sɩɛ́ bʋlɛ́ béé, a makɛ rʋ́ʋ́ lɩsɛ nʋɔ páŋ>>
Beé wɩ́ɛ́, ʋ nɩ́ɩ́ tʋ́ŋ ɛ́.
Ŋ sɩ́ dí múúre ŋ hiẽso wuu mí,
sazɔkɔ́ ná há púŋ wɩ́ɛ́.
16 Nyuutɩna mɩ́nʋ́ nɩɛ laka:
ɓa sɩ́ ká mɩɩsɛ,
ʋ sabɩɩna sɩ́ a rɩ́wɔ́ tɛŋ wuu hihiẽsi»,
ɩ nɛ́ sɩ́ bɩr páŋ tɛŋfɩ́ɛ́l arɩ́ mɩɩsɛ.
17 Ŋ sazɔkɔ́ bɩ́rmɛ tɛŋfɩ́ɛ́l.
Ɩ kɛ́rɩ́ŋ mɩɩsɛ mɛ́ rɩ́ŋ sɩ́ bʋɔ sɩɛrʋ tuwu
kɛ́ɩ́ páŋ wɩ́bɔma wuu a tɛ́ɩ́ har rɩ́.
18 Beé wɩ́ɛ́, lɛ́lɛ́tɔ́ɔ́ wɩ́ɩ́ wuó píŋsi,
sʋʋ má wɩ́ɩ́ wuó dɛnnɛ.
Nɩɛ ná há zʋ bʋɔ,
ɓa baá wɩ́ɩ́ nɩcɩ́tɩ́kɔ́ náá yɩɛlɛ.
19 Nɩwommi, ʋ é dʋŋɔ nɩ́ɩ́ píŋsí,
anɛ ɛ́ ŋ háá píŋsí zaa.
Áná nɛ́ sɩ́ a rʋ́ʋ́ bɛlɛ zɩ́mɩ́ nɩcɩ́tɩ́kɔ́ ná.
20 Nyuutɩna Wɩɩsɛ láŋ tá,
á sɩ́ dɔ́ŋ rá gɔkcɩksɛ
Nyuutɩna Wɩɩsɛ Jaa sɩɛrʋ
tápʋ́l wuu á hiẽso mí.