Ezipiti ká beé>>
31
1 Wɩ́hala! Ezipiti rɩ́ɩ́ nɛ́ɓa mʋ́ aá já saŋɛ.
Ɓa píwó tɩɩ yelli záksɛ mɛ́,
a píwó yɩɛla hé lalyóórítórkowa mɛ́,
ɓa há kánɔ́ wɩ́ɛ́,
ɓa la zakzɩnna a dí, ɓa há kéŋ dóé wɩ́ɛ́,
amá ɓa wɩ lóé rɩ́wɔ́ sɩ́ɛ́ cɔ́
Ɩzɩrayɛl Wɩɩsɛ ná há kɔ́ʋ́ dʋŋɔ mɛ́,
ɓa wɩ Nyuutɩná já.
2 Ʋ má sɩɛ́ há cɛ́ ɛ́, ʋ kéŋ zɩ́mɛ́:
ʋ wúólo a wɩ́ɩ́la kuko.
Ʋ wʋ́ʋ́ nʋɔ har bɩr.
Ʋ cɛ́ nɩbɔma púl mí,
arɩ́ wɩ́tɛ́'áára ná ɓa háá jɔ́wɔ́ saŋɛ mɛ́.
3 Ezipiti nɩɛ ka nɩbííne ní, ɓa tó wɩŋsa,
ɓa záksɛ ka namɩŋsa nɛ́, ká tó sabɩŋsɛ.
Rɩ Nyuutɩna nɛ́ kúé tɩ́ɛ́nʋ́ váámɔ,
pʋ́pɔ́ɔ́rɔ sɩ́ lékli, ká rɩ́ nɛ́ŋ ná ʋ háá pɔ́ʋ́ mɛ́ má ɓal:
ɓa wuu sɩ́ hé náŋá a nyɩ́ɩ́kɛ.
Nyuutɩna sɩ́ pɔ́ Zerizalɛmɛ mɛ́
4 Nyɛ́ nɛ́ Nyuutɩna máŋsɛ a páŋ:
Rɩ kɩ́ŋkáná ɛ́ ráá má rɩ kɩ́ŋkáŋbio
nɛ́ úúri namɩ́ɛ́ laka,
rɩ pʋnʋɔla káŋ có rɩ́wɔ́ mɔ́ ɛ́ rɛ́ɛ́ má aá kóú mí,
ɓa kʋ́ɔ́llɛ wɩ héwíŋ kéné a pɔ́ʋ́,
ɓa dɔ́mɛ́ wɩ baŋcɩ́fɔ́ɔ́ kéné ʋ rɩ́ (wʋ́ʋ́ walmɛ mʋ́ɔ́ má tɩɩ.)
Nyɛ́ nɛ́ sɩɛ́ Nyuutɩna, Doewuutɩna,
sɩ́ tuwi Sɩɔŋ paalɔ́ nyúú, ʋ dúŋdúó daha,
a yo lal ráŋ.
5 Nyuutɩna, Doewuutɩna sɩ́ cú tɔ́ Zerizalɛmɛ mɛ́
anɛ ɛ́ diíwíísi háá jɛ́rwɔ́ kíŋkéru aá tɔ́wɔ́ bɛlɛ mɛ́.
Ʋ sɩ́ pɔ́ʋ́ mɛ́, a lɔ́ʋ́ tá,
ʋ sɩ́ fɔ́ʋ́ búŋse ká saŋʋ́ mɛ́.
6 Ɩzɩrayɛl nɩɛ, ɩ́ bɩ́rɛ ko nɛ́ŋ ná rɩ́,
ɩ́ há cáásɛ vɛ́ɛ́ tá.
7 Ɛ́ kal, nɛ́ŋ wuu sɩ́ yóú warɛ veŋgúlli arɩ́rʋ́ salmɛ veŋgúlli a tá,
venni ná ɩ́ wɩ́bɔ́ŋ'áárɛ nɛ́ŋsa há mɛ́ɛ́.
8 Tokówí ná há tó nɩbíŋ tokówí ní sɩ́ ɓʋ́ʋ́sɛ Asiiri nɩɛ,
tokówí ná há tó nɩbíŋ ɓɩ́ŋ nɛ́ sɩ́ zɔ́kwɔ́.
Ɓa sɩ́ fá tokówí sɩ́ɛ́ mɛ́,
ká rɩ́wɔ́ lalyóóre ná há ka bápʋ́ɔ́sɛ́
tʋ́tʋ́ŋ tʋ́tʋ́ŋduóru.
9 Héwíŋ sɩ́ káŋwɔ́ bʋ́ɩ́ ná, rʋ́ʋ́ fá,
ká rɩ́wɔ́ sɩ́dííre má mʋ́ʋ́nɛ, ɓa sɩ́ɩ́ há sɩ́ ná yóóridirapo.
Nyuutɩna nɛ́ bʋl ɛ́. Ʋ níŋ mɩŋ Sɩɔŋ mɛ́,
kɔ́ʋ́ níŋjaa (níŋbʋɔ) má mɩŋ Zerizalɛmɛ mɛ́.