Ɓa sɩ́ dí dóé Leviataŋ nyúú
27
1 Ɛ́ kál, Nyuutɩna sɩ́ púú tókówí ná nʋɔ háá díé,ká a zeni, a ka dóé má
a cɛ́ Leviataŋ a há ka dʋhéwítɩŋ mɛ́,
a cɛ́ Leviataŋ há ká dʋŋ ná há ká gbologbolo mí,
ʋ sɩ́ ɓʋ́ mʋʋ sɩɛrʋ oŋbérmi (dɩragɔŋ).
Nyuutɩna arɩ́rʋ́ viínyi wɩ́ɛ́
2 Ɩ́ yɩ yɩɩla ɛ́ kal a pá viínyi ná dɩvɛ́ŋ há ŋmɔ́mɔ́.
3 Ŋ é Nyuutɩna Wɩɩsɛ nɛ́ kɔ́ʋ́ pʋ́pɔ́ɔ́rɔ,
aá gáárʋ́ ɓárɓár.
Ŋ nɩ́ɩ́ pɔ́ʋ́ mɛ́ tɩ́táŋ rɩ́ wɔhɔ wuu,
a makɛ rɩ bɔ́nɛ sʋ́ʋ́ pérú.
4 Ŋ cɔ́ɛ́ baá waá wɛ́:
rɩ́ŋ nɛ́ ná sɔrɛ arɩ́ sɔkólli ráŋ,
ŋ sɩ́ ɓʋ́ʋ́sɩ́wɔ́,
ká tɔ́kɛ níŋ a héwó mí,
5 amá nɛ́ŋ ná ha sɩ́ píŋ a ɔ́ʋ́ zenaa (kɛ́rɛ),
ʋ sɩ́ ná tɛŋfɩ́ɛ́l ŋ rɩ́,
tɛŋfɩ́ɛ́l sɩ́ mɩ́nʋ́ rɩ́rʋ́ pɛ́kɛ.
Zakɔbɛ yómí arɩ́rʋ́ suúri héé wɩ́ɛ́
6 Zakɔbɛ sɩ́ nyʋ́ nalúrsi, cíé tɛ́ŋ ná háá kúé sɩɛrʋ,*
Ɩzɩrayɛl sɩ́ lukmi, a fɩ fɩ́ɛ́la,
ʋ nɔnɔ sɩ́ sú dúníé wuu.
7 Nyuutɩna ŋmɔ́wɩ́wɔ́ anɛ ɛ́
ʋ há ŋmɔ́wɛ nɩɛ ná fa háá ŋmɔ́wɩ́wɔ́ ɛ́ nɛ́>>
Ʋ ɓʋ́ʋ́sɩ́wɔ́ anɛ ɛ́ ná
ʋ háá ɓʋ́ʋ́sɛ nɩɛ ná fa háá ɓʋ́ʋ́sɩ́wɔ́ ɛ́ nɛ́>>
8 Ʋ díwó sarɩ́ya a kírwó, a lɩ́sɩ́wɔ́.
Ʋ lɩ́sɩ́wɔ́ a tɩ́ŋʋ́ sabɩɩna há duóko mí ní,
kal ná wɩpomí cáásɛ́ poo há lúé.
9 Nyɛ́ nɛ́ ʋ sɩ́ mʋ́ʋ́rɛ Zakɔbɛ wɩ́bɔmɔ,
ʋ suúri hé nɔnɔ má nɛ́ sɩɛ́ ɛ́:
ʋ sɩ́ búksi kórsi dɔ́wʋ́ɔ́ wuu
rɩ́wɔ́ nɩ́ɛ̃́sɛ tápʋmmɔ,
veŋdaasɛ arɩ́ túláále nyɩ́krɛ onni
báá waá mɩŋ.
Tɔ́ɔ́ ká wúóli
10 Tɔ́sɔ́ɔ́kɛ́rɛ́ sɩ́ ko a wuóli,
a bɩ́rmɛ pʋsɛ dɩdíí (nyilɛ́lɛ́) ɓa há vɛ́ɛ́ tá,
a pɛ́ yɔ́ɔ́ anɛ gɩrbétéke.
Nɔwie sɩ́ ko dídí ráŋ,
ʋ sɩ́ ko pɩ́pɛ ráŋ, kaá gbekli (pɩpapúksi) paarʋ ná.
11 Rɩ pɩpapúksi ná nɛ́ hɩ́lɛ́,
háála sɩ́ bónníwó, a káá ko hé níŋ.
Taŋá wuu, nɩɛ nyáŋ wɩ wɩ́ɛ́ kɩ́ɛ́lɛ (wɩ́zɩŋ):
ɛ́ nɛ́ tɛ ɓa mɩ́máárɔ́ wʋ́ɔ́ súsú fa,
nɛ́ŋ ná há tɛ́ ɓa mɩŋ, ʋ wɩ píé cɛ́wɔ́.
Nɩkɛ́sɛ wuu bɩ́rkóé wɩ́ɛ́
12 Ɛ́ kal, Nyuutɩna sɩ́ záksɛ tuuni,
a pɔ́ Ɩfɩratɛ fuo mɛ́
ká mʋ́ yakɛ Ezipiti polcʋ́ɔ́rɛ mɛ́.
Ɩzɩrayɛl nɩɛ, ɩ́ nɛ́ sɩɛ́ sɩ́ a oŋkúúne,
rʋ́ʋ́ kúúníwa balá baláwa.
13 Ɛ́ kal, nyɩ́lzeno sɩ́ dɔ́ŋ.
Nɩɛ ná fa há yʋ́ksɛ a mʋ́ mɩŋ Asiiri mí,
ɓa ná fa há fɛ́ɛ́ a mʋ́ mɩŋ Ezipiti mí,
ɓa sɩ́ bɩ́rko Zerizalɛmɛ, paalɔ́ ná há kɔ́ʋ́ dʋŋɔ nyúú,
a ɓírmi Nyuutɩna sɩ́ɛ́.