Ezipiti nɩɛ vúkme wɩ́ɛ́
19
1 Sarɩ́ya liŋó ná há tɩ́ɩ́nɛ “Ezipiti” mí.
Nyuutɩna Wɩɩsɛ zɛ́ duóbana ná háá vá kɩ́kɛ́lɛ́,
a mʋ́ Ezipiti.
Ezipiti nyɩɛnnɛ wɩŋsa ná
váklʋ́ sɩ́ɛ́ mɛ́,
Ezipiti nɩɛ tɩɩ mʋ́ʋ́nɔ́.
2 «Ŋ sɩ́ a rɩ́ Ezipiti nɩɛ pá lalcɩ́ksɛ a gɩrɛ cɛ́ náŋá mɛ́,
rɩ́ nɛrɔ wuu cɩ́nʋ́ maábinɔ́ŋɔ arɩ́rʋ́ nannɔŋɔ mɛ́,
rɩ́ tɔ́ɔ́ rɩ́ tɔ́ɔ́ cɛ́ náŋá mɛ́,
rɩ́ dɩtɩ́llɛ rɩ́ dɩtɩ́llɛ cɛ́ náŋá mɛ́.
3 Ezipiti nɩɛ sabɩɩna sɩ́ yʋ́ksɛ,
ŋ sɩ́ pɔ́ rɩ́wɔ́ jáŋwa sɩ́ dí;
ɓa sɩ́ bɔ́sɛ nyɩɛnnɛ wɩŋsa
arɩ́ nɩɛ ná háá yɩrɛ lɛlnʋʋsɛ,
ɛ́ ráá má vʋra ɛ́ ráá má nɩɛ ná háá yɩrɛ kaŋtɔma.
4 Ŋ sɩ́ ká Ezipiti
a hé nyúútɩ́nawa ná wɩ́ɛ́ há duóko nɛ́sɛ mɛ́;
kuóro ná sɩɛrʋ há haakɔ́
sɩ́ dí dóé ɓa nyúú.»
Nyuutɩna Wɩɩsɛ, Doewuutɩna nɛ́ bʋl ɛ́.
 
5 Mʋʋ nyii sɩ́ tenni,
fuo sɩ́ hʋ̃́ʋ̃́sɛ a hɩl.
6 Fonni nyii sɩ́ ká sɔ́ŋ,
Ezipiti mí, Nil mʋnaasɛ nyii hʋ̃́ʋ̃́sɛ,
ɓa sɩ́ tenni,
fuo nʋɔ nyɔ́ɔ́ (ná ɓa háá yɩrɛ róózowa arɩ́ zɔ́ŋkwa) sɩ́ zɛkɛ:
7 Nil fuo ná laka rɩ́rʋ́ nyilpanaa laka sɩ́ a wúóli.
Nil mʋʋ laka óŋparɛ́ ná wuu sɩ́ hɩl,
poo sɩ́ pɔ́wɔ́
a kaa yʋ́ksɛ.
8 Naŋwʋɓʋ́ʋ́ra sɩ́ hííni,
ʋ sɩ́ a yúó a pá nɩɛ ná háá hé nɛ́ŋhɛ́mɛ́ Nil fuo ná sɩɛrʋ;
nɩɛ ná háá yo filewa nyii sɩɛrʋ,
sɩɛnnɛ sɩ́ zɔ́kɛ.
9 Hɩ́ɩ̃́sɛ sɩ́ ká gɛpuyoore,
Háála ná háá tɩ́ɛ́nɛ ɛ́ gɛpúŋmɛ́sɛ,
pɛ́ŋsɔ́ɔ́ra rɩ́ pɛŋbíé bɩ́bɩ́rma sɩ́ɛ́ sɩ́ fɛ́l.
10 Nɩɛ ná há ká tɔ́ɔ́ ná dóé naasɛ sɩ́ yʋ́ɔ́rɛ,
tʋtʋnna ná háá la tume sɩɛnnɛ sɩ́ zɔ́kɛ.
 
11 Sʋwaŋ tɔ́ɔ́ sɩ́dííre
ɓɩ́ɛ́na ká nɩcʋ́llɛ;
Zɩmɛ́ tɩ́náwa ná háá cáánɛ Faarɔŋ
bɩ́mɛ nɩlááma púl.
Ɛ́ rɛ́ɛ́ mɛ́ rɩ́, ɩ́ saŋ
bʋl Faarɔŋ rɩ́ a bʋlɛ́:
«Ŋ ká zɩmɛ́tɩ́na bio ní,
díé kuóre bio!»
12 Faarɔŋ, ɩ́ zɩmɛ́tɩ́náwa ná mɩŋ nɛ́ɛ́>>
Rɩ́wɔ́ caanɩ́ ká a rɩ́ɩ́ zɩŋ
Nyuutɩna Wɩɩsɛ, Doewuutɩna
há kénú ná a cɛ́ Ezipiti mí!
13 Sʋwaŋ tɔ́ɔ́ sɩ́dííre cʋ́ʋ́lɔ,
Maŋfisi sɩ́dííre má mɩ́ŋ tɛ́l sɩɛrʋ,
ʋ jɩmʋ́ʋ́la sɩ́dííre
nɩ́ɩ́ tɛ́l Ezipiti!
14 Nyuutɩna Wɩɩsɛ yíkí
sɩ́bír poo hóú mí:
rʋ́ʋ́ a rɩ́ Ezipiti bɩ́bɛ́ŋŋɛ
ʋ wɩ́'állɛ wuu sɩɛrʋ,
anɛ sɩ́nyɔɔrɔ háá bɛŋŋɛ ɛ́,
ʋ tʋɔsɛ́ sɩɛrʋ.
15 Ezipiti mí, nɛ́ŋ wuu waá wóllí tʋ́ŋ nyúú ɛ́ ráá má mʋdúŋ,
ɛ́ ráá má habɛ́ tuhile, ɛ́ ráá fuonyɔ́ɔ́ tʋtʋmɩ́.
Ezipiti cíé nɩ́ɩ́sɔ́
16 Ɛ́ kal, Ezipiti nɩɛ sɩ́ nɩ́ɛ́sɛ háála: Ɓa sɩ́ vaklɛ, héwíŋ há zʋ́wɔ́ wɩ́ɛ́, tɛ́ŋ ná ɓa há sɩ́ ná Nyuutɩna Wɩɩsɛ, Doewuutɩna rʋ́ʋ́ ɓɔ́ʋ́ nɛ́sɛ cɛ́ Ezipiti nɩɛ mɛ́. 17 Ziida tíé sɩ́ ká héwíŋ pá Ezipiti. Tɛ́ŋ ná é wuu mí ɓa há sɩ́ yɩ́rʋ́ yɩr ʋ sɩ́ɛ́ mɛ́, ʋ sɩ́ hírsi, á tɩŋ tʋtʋmɩ́ ná Nyuutɩna Wɩɩsɛ, Doewuutɩna há kéné cɩ́nʋ́ mɛ́ wɩ́ɛ́.
18 Ɛ́ kal, Ezipiti mí, tɔ́nɛ bɔ́mmʋ́ɔ́ sɩ́ bʋl Kanaŋ nɩɛ liŋó, ká ŋmɩ́ɛ́sɛ Nyuutɩna Wɩɩsɛ, Doewuutɩna yɩr mɛ́: Ɛ́ tɔ́nɛ́ sɩɛrʋ, nɔŋɔ yɩr sɩ́ a “Iirherɛsɛ”.
19 Ɛ́ kal nɔŋɔ, koro sɩ́ mɩŋ Ezipiti tɔ́ɔ́ sɩsɩɛnnʋwa Nyuutɩna Wɩɩsɛ yɩr mɛ́, arɩ́ dɔ́wɩ́ ɓa há cɔ́ŋsɛ susubʋɔ laka Nyuutɩna Wɩɩsɛ yɩr mɛ́. 20 Ʋ sɩ́ a nyɩnɛ arɩ́ dáŋsɩ́ɛ́ Ezipiti mí, a pá Nyuutɩna Wɩɩsɛ, Doewuutɩna: Rɩ́ dɩŋdɔma nɛ́ kóé aá bɛ́ŋsɩ́wɔ́, rɩ́wɔ́ ŋmɔwɛ búŋse pá Nyuutɩna Wɩɩsɛ, ʋ sɩ́ tʋŋ laatáárɔ, rʋ́ʋ́ láwɔ́ nɛsɛ ná, ká láwɔ́ tá. 21 Nyuutɩna Wɩɩsɛ sɩ́ kánʋ́ tɩɩ nyɩɩsɛ Ezipiti nɩɛ mɛ́. Ɛ́ kal, Ezipiti nɩɛ sɩ́ zɩ́mʋ́. Ɓa sɩ́ ɓáárʋ́ a tɩ́ŋ vʋka arɩ́ satɔ́ɔ́rɩ́pallɛ mɛ́, ɓa sɩ́ tá nʋʋsɛ a pɔ́ʋ́, ká lɩ́sɛ ɛ́ nʋtallɛ. 22 Ɛ́ mɛ́ nɛ́ rɩ́ Nyuutɩna Wɩɩsɛ ŋmɔ́wɛ Ezipiti nɩɛ: ʋ ŋmɔ́wɛ amá ʋ sɩ́ duóríwó. Ɓa sɩ́ bɩrko Nyuutɩna Wɩɩsɛ rɩ́, ʋ sɩɛ́ sɩ́ zésíwó sʋ́lɛ́, a duóríwó.
23 Ɛ́ kal, ŋmɛ́nɔ́ sɩ́ lɛ́ Ezipiti mí a mʋ́ Asiiri: Asiiri nɩɛ sɩ́ mʋ́ Ezipiti ká rɩ́ Ezipiti nɩɛ má mʋ́ Asiiri. Ɓa sɩ́ hé náŋá mɛ́ a ɓáárɛ (+Nyuutɩna Wɩɩsɛ>>).
24 Ɛ́ kal, Ɩzɩrayɛl nɛ́ sɩ́ a botoro nyúú mí tɔ́ɔ́ há sɩ́ súúri Ezipiti arɩ́ Asiiri mí, a a, bárka tíé nyúú 25 Nyuutɩna Wɩɩsɛ, Doewuutɩna há sɩ́ bʋ́rkɛ (a hé barka) nyɛ́ a pɔ́wɔ́: «Rɩ́ bárka mɩ́ŋ Ezipiti nɩɛ há káŋ nɩɛ nyúú, a mɩ́ŋ Asiiri há káŋ nɛ́ŋsa oŋmáálɛ nyúú, arɩ́ Ɩzɩrayɛl há káŋ tɩ́llɛ́ nyúú.»