Vúgme zʋ́ Zerizalɛmɛ
3
1 Nyuutɩna, Doewuutɩna Wɩɩsɛ,pɔ́ɔ́ rɩ́ Zerizalɛmɛ arɩ́ Ziida sɩ́ sáŋɛ oro wuu náá,
a sɩ́ ɓɩdííli rɩ́ nyii náá,
2 rɩ́ bɩbar arɩ́ lalyooro,
sarɩ́yadííro arɩ́ wɩ́laabʋllɔ
múúlinaarɔ arɩ́ nɔhɔ̃́,
3 tʋtʋnnɩsɩ́dííro arɩ́ nɩpiŋo,
cɩ́cáánɔ arɩ́ nɛ́ŋ ná há kéŋ tɩɩwʋ́zɩmɛ́ (vʋr)
arɩ́ sɩ́náára sɩ́ ráŋ mɩ́nʋ́.
4 Nyuutɩna Wɩɩsɛ sɛ́:
«Heŋbólwíísi ní ŋ sɩ́ lɩ́sɛ
rɩ́wɔ́ ɔ́wɔ́ sɩ́dííre,
a káŋwɔ́ aá tʋŋ ɛ́ ɓa haá jɛ́ɛ́.»
5 Nɩɛ sɩ́ ká bɔmɩ́
a cɛ́ náŋá mɛ́:
nɩpʋɔsɛ́ sɩ́ cɛ́ bánɩ́ɩ́náwa mɛ́,
ká rɩ́ nɩkɔ́ŋsa má cɛ́ nɩtáŋáwa mɛ́.
6 Báálɔ sɩ́ gúrkú maábinɔ́ŋɔ,
ɓa áná jaa sɩɛrʋ ká bʋlɛ́:
«Ɩ kéŋ kapooti,
ɩ nɛ́ sɩ́ á rá nyúútɩ́na,
ɩ nɛ́ sɩ́ ká tíŋ zɔkrʋ́ né sɩɛrʋ.»
7 Amá ɛ́ kal, nɔ́ŋɔ ná sɩ́ cáási a bʋ́lɛ́:
«Ŋ wɩ wɩ́ɩ́ wo a aá pɛ́ɩ́wa;
ŋ jaa, ŋ wɩ ɓɩdííli kené, ŋ wɩ kapooti má kené:
Ŋ wɩ́ɩ́wa nyúútɩ́na wúó a.»
8 Zerizalɛmɛ gɛ́rɔ, Ziida ɓálɔ́.
Ɓa wɩ́bʋlɛ́ rɩ́wɔ́ wɩ́'állɛ
cɛ́ Nyuutɩna Wɩɩsɛ mɛ́,
ɓa kéŋ nyúduó cɩ́nʋ́ píŋ mí.
9 Ɓa sɩ́duó ká dáŋsɩ́ɛ́ a cɛ́wɔ́.
Ɓa ɔ́ɔ́ ɓa wɩ́bɔmɔ nyɩ́ɩ́sɛ anɛ ɛ́ Sodoŋ nɩɛ há ɛ́ɛ́,
ɓa wʋ́ɔ́ wɩ́bɔmɔ féŋse.
Nyúbɔ́ŋ a pɔ́wɔ́,
bee wɩ́ɛ́, ɓa já wɩɩla a pɔ́wɔ́ tɩɩ.
10 Ɩ́ bʋl nyɛ:
Nɩtaŋá ná wér,
bee wɩ́ɛ́, ʋ sɩ́ dúú wɩ́'állɛ nyʋɔrɛ.
11 Amá wɩɩla pú nɩbɔmɔ!
Wɩɩla púú,
bee wɩ́ɛ́, ʋ wɩ́'állɛ sɩ́ túmú mí.
12 Ŋ nɩɛ, nɛ́ŋ ná haá bɛ́ŋsɩ́ ká heŋbie rí;
háála nɩ́ɩ́ dí dóé ɩ́ nyúú.
Ŋ nɩɛ, nɩɛ ná haá tɩ́ɛ́sɩ́wa nɩ́ɩ́ tɛ́lɩ́wa,
ɓa kéŋ ŋmɛ́nɔ cʋ́rɛ.
Sɩ́dííre sarɩ́ya díí wɩ́ɛ́
13 Nyuutɩna Wɩɩsɛ kenú tɩɩ rʋ́ʋ́ dí sarɩ́ya,
ʋ ísí daha rʋ́ʋ́ dí nɩɛ sarɩ́ya.
14 Ʋ Nyuutɩna Wɩɩsɛ kenú nɩhɩ́ɛ̃́sɛ arɩ́ tɔ́ɔ́ sɩ́dííre mʋ́ sarɩ́ya dɩdí:
«Ɩ́ nɛ́ zɔ́kɛ viínyi tuu!
Ɩ́ pá nɩyaara ɓɩɛ́ súíwa jɩɩsɛ.
15 Beé rí tɛ́, ɩ́ gɩ́gɛ́rɩ́ŋ (nʋ́ɔ́sɩ́ŋ) nɩɛ
kaá dí bɩbarɩ́ nɩyaara nyúú,
Nyuutɩna Wɩɩsɛ, Doewuutɩna wɩɩsɛ nɛ́ bʋ́l ɛ́>>»
Zerizalɛmɛ háwéré wɩ́ɛ́
16 Nyuutɩna Wɩɩsɛ sɛ́:
«Zerizalɛmɛ tolé há kéŋ nyʋkɔ,
a ɓɔ́wɔ́ nyúnni kaá vá (a wɩ bélé aá ná nɛ́ŋ),
ɓa há kéŋ hɩ́ɛ́ŋ (ɓagɩ) sɩ́bélé,
ɓa háá nʋɔlɛ́ ká
a ɓa natáásɛwa dɩdɔ́ŋ,
17 Nyuutɩna Wɩɩsɛ
sɩ́ a rɩ́wɔ́ nyúnni ɓɩl (píéríwó nyúnni),
ká rɩ́wɔ́ tulli nyɩɩsɛ.
18 Ɛ́ kal, Nyuutɩna Wɩɩsɛ sɩ́ lɩ́sɩ́wɔ́ tɛŋɓɩ́ɛ́ra: natáásɛwa, nyúɓike ná há nɩhɩ̃́ wɩpomí, arɩ́ nyúbállɛ ná há nɩhɩ̃́ caŋwʋllɛ; 19 dɩlɓɛ́ŋsɛ, vagɩra arɩ́ nyútɔ́llɛ; 20 nyúballɛ, baŋzɛlwɩ́ɛ́la, daŋɓarsɔɔlɛ́(vɔ́ɔ́sɛ), bʋrsɩ́ɛ́, sɛ́wɩsɛ; 21 nɛ́ŋjɛlbie (nenipɩrsɛ), mɩɓɛ́ŋsɛ (mɩɩsɛ ɓɛ́ŋsɛ); 22 cana gɛnnɛ, gɛluŋe, baŋbaasɛwa, sakɔɔsɩwa (nɛ́sɛ lɔknnɛ); 23 nyilli, gɛpúwɩɛlɩwie gɛnnɛ (gɛluŋe), hávɔ́ɔ́sɛ (nyúbállɛ) arɩ́ gɛwiisi (sɩɛrʋ rɩ́ gɛnnɛ).
24 Sɔ́ŋbɔmɔ sɩ́ la tulaale gbel,
ká rɩ́ ŋmɛ́yɔ́ɔ́ nɛ́ bɩrmɛ dáŋɓara (vɔ́wɛ́).
Nyúgɓoŋtoro nɛ́ sɩ́ lá nyúpʋvɔ́wɛ́ mɛ́;
nyúwiiri gɛnnɛ sɩ́ la cana gɛnnɛ (jɔrɛ) gbel.
Ʋ ká ɛ́ nɛ́, hɩɩ̃sɛ nɛ́ sɩ́ lá háwérí nyúú mí.
Zerizalɛmɛ yúháála wɩ́ɛ́
25 Tókowí sɩ́ ɓʋʋsɩ́ báála,
ɩ sóójibɩbára sɩ́ sʋsɛ lal mɛ́.
26 Ɩ tɔ́ɔ́ dánʋʋsɛ sɩ́ wí hiĩ́ni,
a dɛ́nnɛ,
a ké tíé rɩ́ tɛŋbíí.