Ʋ ná há cɩ́có
7
1Yɩwero barka kɛ tulaale ná sɔ́ŋ há wero,a kɩllɩ́ há mɩŋ cana dídí (jaa mɛ́).
Bee wɩ́ɛ́, nɩbííne wuu a rɩ́wɔ́ tenni róŋ ní, ɛ nɛ́ tɛ́ nɩhiẽse mɔhɔ̃ rɩ́wɔ́ bɩbɩɩnʋ wɩ́ɛ́. 3 Ɩ sɩɛrʋ zɔkɔ́ cɩ́có ɩ sɩɛrʋ há tɔ́rɛ́. Bee wɩ́ɛ́, sazɔkɔ ná mɛ́ ɩ sɩɛrʋ é wóllo aá tɔ́rɛ, ká rɩ́ sɩ́ɛ́ nɛ́ zɔkɛ. 4 Yúó jaa mɛ́ nɛ́ wɩ́zɩnna ɔsɛ aá bɩɩnɛ wɩ́ɛ́,
ka nɩ́cʋ́llɛ é sabɩɩna mɩŋ satɔrɔ jaa mɛ́ nɛ́. 5 Rɩ́ wɩ́zɩnnɔ nɛ́ bɛsɩ́ nʋɔ mɛ́, rɩ́ zesú; ʋ wero a kɩllɛ ɩ há vɛ ká mʋ́ʋ́ zesi nɩcʋ́ʋ́lɛ yɩɩla. 6 Nɩcʋ́ʋ́lɛ mɔŋ nɩhɛ̃ dahɩl haá dí nɩŋ aá dɔ́ŋ daŋsáŋá mʋ́l ɛ nɛ́. Ʋ wɩ mʋ́l wuu kene. 7 Wɩɩla nɛ́ nɩ́ɩ́sɛ wɩzɩ́nnɔ ʋ bɩrmɛ́ nɩcʋ́ʋ́lɛ nɛ́, ká zilyɔ́wɛ́ má bɩrsɛ sabɩɩna. 8 Wɩ́ɩ́ wuu tenné nɛ́ werú púle; ká ɩ nɛ́ keŋ múúrítɩɩ sabɩɩna nɛ́ werɩ́ há keŋ mákɩ́ tɩɩ sabɩɩna. 9 Sɩ́ cɔ́ɛ́ ɓúlúɓulú dí, bee wɩ́ɛ́ nɩ́cʋ́l wɩ́ɩ́ rɛ́. 10 Sɩ́ tɩɩ mɛ́ bɩɩnɛ́ bʋlɛ́: Bee rɩ́ tɛ́ dié wer zaa? Bee wɩ́ɛ́, nɩcʋʋlɛ́ nɛ́ bɔsɛ bɔsɛ neé. 11 Ɩ há keŋ wɩzɩ́mɛ́, ʋ nɩ́ werí há keŋ liwe. Ʋ nɛ́ keŋ nyʋɔ́rɛ kɩ́ŋkáŋ a pá nɩɛ ná há mɩŋ dúníé mí. 12 Bee wɩ́ɛ́, nɛrɔ ná há keŋ wɩzɩ́mɛ́, ʋ nɛ́ keŋ meéwíé. Nɩɛ ná há keŋ wɩzɩ́mɛ́ nɩ́ɩ́ ná wer. 13 Kɩɛlɛ Wɩɩsɛ oŋ'aalɛ sɩɛrʋ a ná: Oŋ ná ʋ há kené gbeli áŋ wó kaá tʋ́rɛ? 14 Rɩ́ tapʋ́l wero nɛ́ perí, a satɔrɔ, ká tapʋ́l bɔmɔ perí ɩ keŋ bɩɩnɩ́ tɩɩ werí: Ɓa wuu ka Wɩɩsɛ nɛ́ ɛɛ; ʋ sɩɛ́ tʋ́ŋ ɛ a makɛ rɩ́ nɩbííno sɩ́ wólli zɩŋ cɩ́é wɩ́ɛ́ nɛ́.
Nɩtáŋnɛ rɩ́ wɩ́zɩmɛ́ wɩ́ɛ́
15 Tapʋ́lɛ ná mʋɔ ŋ há ɛ dúníé né mɩ́, ŋ noú: Rɩ́ nɩ́táŋá sʋwʋ́ nɩ́táŋnɛ́ sɩɛrʋ, ká nɩbɔmɔ tʋ́ŋ bɔŋbɔŋ, kɔ́ʋ́ tapʋ́lɛ ɔsɛ súsúuri. 16 Nɩtáŋnɛ kɩ́ŋkáŋ,
a rɩ́ wɩ́zɩmɛ́ má kɩ́ŋkáŋ. Ɓa nyɛ́ wɩɩ́ zɔkɛ? 17 Ká bɔmɩ́ má kɩ́ŋkáŋ, sɩ́ a rɩ́ bɩrmɛ́ nɩ́cʋ́ʋ́lɛ. Bee rɩ́ tɛ́ ɩ sʋwɛ, rɩ́ tɛ́ŋ sʋwɩ́ há wɩ peré? 18 Ɛ wɩ́ɛ́ pɔ́ werí a sɩ́ ló rɩ́ wɩ́ɩ́ né fórí nɛ́sɛ mɛ́, bee wɩ́ɛ́, nɛrɔ ná há keŋ Wɩɩsɛ heŋwɩ́ŋ fɔ́ɔ́, nɛ́ sɩ́ wólli lú lɛ́ wɩ́ɛ́ wuu mɩ́. 19 Zɩmɛ́tɩ́na nɛ́ keŋ wɩ́zɩmɛ́, ʋ doé kɛ́ dɩ́tɩllɛ bibelé nɩɛ fí há mɩŋ tɔ́ɔ́ mɛ́. 20 Nɩbɩ́ŋ wuu tó tíé nyúú a a tékétéké, a wɩ wɩ́ɩ́ a zɔkɛ. 21 Ɩ dɩ́llɛ há nɛ̃ wɩ́ɛ́ ná wuu sɩ́wɔ́ ká tʋ́ŋ, rɩ́ ɛrá ɩ tʋtʋnnɔ sɩ́ bʋ́l wɩ́ɛ́ cɩ́nɩ́ŋ mɛ́. 22 Nyɛ́ mɛ́, ɩ má fa bʋ́l wɩ́ɛ́ cɩ́nɩ́ naŋá mɛ́. 23 Ŋ kɩɛlɛ onni wuu ká bʋlɛ́: Ŋ keŋ wɩ́zɩmɛ́, ká wɩ́zɩmɛ mʋɔ wuu tóŋ mɩ́. 24 Wɩ́ɛ́ ná wáárɛ há nyɩ́ɩ́sɛ́, dɩhɩ̃ fa ból, ɓa lúŋó a ɔsɛ lúŋ kɩ́ŋkáŋ. Aŋ wówó (toko) mʋ́l bel aá ná? 25 Ŋ héŋ doé wuu rɩ́ŋ zɩŋ wɩ́zɩmɛ́ há kɔ́ɔ́ ná. Ŋ kɩɛ́lɔ, rɩ́ bɔmɩ́ rɩ́ nɩ́cʋ́llɛ má ká gɩŋgáwɩ́ɩ́ rɛ́. 26 Ŋ kɩɛlɔ, háálɔ ná há bɔmɔ ká bará rɛ́ a nɛ́ sʋʋ. Bee wɩ́ɛ́, ʋ sɩɛrʋ (nʋɔ wɩ́bʋ́lɛ) rɩ́rʋ́ nɛ́ŋsa ká bárá rɛ́ aá kɛsɛ́ nɩɛ. Wɩɩsɛ nɩcólli é sɩ́ lú lɛ́ ʋ nɛ́sɛ mɛ́, ká rɩ́ wɩ́bɔŋ'aára ɓallʋ́ nɛ́sɛ mɛ́. 27 Noú ná ŋ há kɩɛ́lɛ ná: Ɓa sɩɛrʋ, ŋ kɩɛlɩ́wɔ́ balá baláwa a ná sabɩ́ŋ. 28 Ŋ báá ɔsɛ kɩɛlɛ a ná: Báála bʋ́ɩ́ sɩɛrʋ ŋ wɩ bál balá né ɓa sɩɛrʋ; amá háála sɩɛrʋ ŋ ná hál balá ɓa sɩɛrʋ. 29 Ŋ kɩɛlɛ sɩɛrʋ, noú ná ŋ há neé: Ʋ nɛ́ ká Wɩɩsɛ maá nɩbiine a pi sabɩŋ wero pɔ́wɔ́, amá, ɓa tɩɩ nɛ́ zɔkɛ wɩ́ɛ́ ná wuu.