Kuóro tɔ́ɔ́
132
1 Davidi yɩl. Yɩl ná ɓa háá yɩ́ɛ́,
rɩ ɓa nɛ́ kuó zʋ́ ŋmɛ́nɔ, aá mʋ́ Wɩɩsɛ dɩmɩnɩ́.
Nyuutɩna Wɩɩsɛ, líísi Davidi wɩ́ɛ́,
bɩ́ɩ́nʋ́ wɩ́ɩ́la ná wuu wɩ́ɛ́.
2 Ʋ nɛ́ ŋmɩ́ɛ́sɛ a pá Nyuutɩna Wɩɩsɛ,
ká tá nʋɔ né a pá Zakɔbɛ Áŋwóŋ.
3 «Ŋ wɩ́ŋ táŋtɛjaa sɩɛrʋ cɔ́ɔ́, abádá,
ŋ wɩ́ŋ tɩɩ tɩ́ɛ́nɛ ŋ godo daha, abádá,
4 ŋ wɩ́ŋ sɩ́ɛ́ nyʋmmɩ́ abádá,
ŋ wɩ́ŋ dóŋ pɛ́,
5 rɩ́ŋ wɩ lá sɩ́ɛ́ rɩ́ɩ́ sɔ́ jaa rɩ́ɩ́ pá Nyuutɩna Wɩɩsɛ,
rɩ́ŋ nɛ́ wɩ dɩhɩ̃́ jɛ́ɛ́ pá Zakɔbɛ Áŋwóŋ ná.»
6 Á nɩ́ɔ́ rʋ́ʋ́ (nʋtʋmɛ daka) mɩ́ŋ Efɩrata mí ní,
á nóú Yaar gɩr mɛ́:
7 «Á mʋ́ʋ́ jaa,
á ɓírmi a káŋrá sɩ́ɛ́ cú tíé, ʋ naasɛ dɩksakɩ́ sɩ́ɛ́.
8 Nyuutɩna Wɩɩsɛ, isi, a kóí dɩfɩɛlɩ́,
ɩ tɩɩ arɩ́rɩ́ɩ́ nʋtʋmɛ daka ná, ɩ dóé há mɩ́nʋ́ sɩɛrʋ.
9 Rɩ taŋá nyɩ́ɩ́sɩ́ vʋk'ɔɔsa mɛ́,
rɩ́ɩ́ laadííre cícáási satɔrɔ́
10 Ɩ tʋtʋnnɔ Davidi yɩr mɛ́,
sɩ́ɩ́ nɩlɩsɛ vɛ́ɛ́ tá.»
11 Nyuutɩna Wɩɩsɛ ŋmɩ́ɛ́sɔ́ a pá Davidi;
taŋá nɛ́, ʋ wáá giri:
Ɩ duó sɩɛrʋ nɛrɔ nɔ́ŋɔ nɛ́
ɩ sɩ́ lɩsɛ rʋ́ʋ́ kéní kuóɓasa daha.
12 Rɩ́ɩ́ bɛlɛ nɛ́ cɩ́nɛ́ tɩkɩ́ŋ nʋtʋmɛ ná
arɩ́ wɩ́bile ná ŋ há sɩ́ makɛ pɔ́wɔ́,
ɓa bɛlɛ má sɩ́ kéní kuóɓasa ná daha,
a dí kuorí a káá mʋ́ wuu.»
13 Beé wɩ́ɛ́, Sɩɔŋ nɛ́ Nyuutɩna Wɩɩsɛ bɛllɛ lɩsɛ,
ʋʋ́ já rɩ ráŋ nɛ́ ɔ́ʋ́ dɩmɩnɩ́:
14 «Ráŋ nɛ́ sɩ́ áŋ dɩfɩɛlɩ́ a káá mʋ́ wuu,
ŋ bɛllɔ lɩ́sʋ́ nɛ́, rɩ́ŋ mɩ́ŋ ráŋ.
15 Ŋ sɩ́ hé bárka, bárka ʋ oŋkanɛ́ nyúú,
ŋ sɩ́ a rʋ́ʋ́ nɩyaara dí ɓɩ́dííle vɔkɛ.
16 Ŋ sɩ́ a rʋ́ʋ́ vʋk'ɔɔsa ná laatɛ́,
ká rʋ́ʋ́ laadííre cáási satɔrɔ́.
17 Ráŋ nɛ́ ŋ sɩ́ a rɩ Davidi dóé hɩ́ɛ́sɛ,
ká rɩ́ŋ já cáánɔ́ a páŋ nɩlɩsɛ́.
18 Ŋ sɩ́ a rɩ hɩ̃́ɩ̃́sɛ dúú (tɔ́ʋ́) dɩŋdɔma,
ká a rʋ́ʋ́ kuónéŋcú tʋ́tʋ́l.