Akazia kuorí díí wɩ́ɛ́
(2K 8. 25-29; 9. 27-29)
22
1 Zoramɛ sʋʋ har mɛ́, Zerizalɛmɛ nɩɛ tʋ́ŋ nʋɔ mɛ́, a lɩsɛ́ Akazia há ká Zoramɛ bɛlɛ sɩɛrʋ ɓɩwie, ʋ lɔ́ʋ́ nyúú mí a dí kuorí. Bee wɩ́ɛ́, Arabɛwa lalyoore púl kó Ziida nɩɛ púl, a ɓʋʋ mááláwa wuu ní. Ɛ́ nɛ́ ɛ́ɛ́ Zoramɛ bio Akazia dí Ziida kuorí. 2 Akazia kúó aá dí kuorí rʋʋ fa kéŋ bɩŋsɛ mɛɛ́sɛllɛ rɩ́ bɛllɛ, ká dí kuorí bɩná balá, Zerizalɛmɛ mɛ́. Ʋ maá yɩr nɛ́ fa ká Atali, Omiri toló. 3 Ʋ má tɩŋ Akaabɛ jaa nɩɛ nabulle ní, bee wɩ́ɛ́ ʋ maá nɛ́ fa kɔ́ʋ́ cɩ́cáánɔ, a cáánʋ́ hé bɔ́ŋbɔ́ŋ ɛɛ mɛ́. 4 Ʋ ɔ́ɔ́ zɔkɛ Nyuutɩna Wɩɩsɛ mɛ́, anɛ Akaabɛ jaa nɩɛ há tʋ́ŋ ɛ́; bee wɩ́ɛ́ ʋ áná sʋʋ har mɛ́, nɩɛ nyáŋ nɛ́ kɔ́ʋ́ cɩ́cáána, a cáánʋ́ hé gɩr mɛ́. 5 A tɩ́ŋwɔ́ caana ná mɛ́, Akazia kenú tɩɩ mʋ́ cɔ́ Ɩzɩrayɛl kuóro Zoramɛ há ká Akaabɛ bio mí; rɩ́wɔ́ mʋ́ yo Siiri kuóro Hazayɛl Ramɔtɛ mɛ́, Galaadɛ dɩtɩ́llɛ. Amá Siiri nɩɛ yóó a pɩrɛ Zoramɛ. 6 Kɔ́ʋ́ bɩrmʋ́ Zizireyɛl rʋ́ʋ́ váárʋ́ fʋrsɛ ná ɓa há hé pɔ́ʋ́ Ramɔtɛ mɛ́, tɛ́ŋ ná mɛ́ ʋ háá yo Aramɛ kuóro Hazayɛl. Ɛ́ nɛ́ Zoramɛ bio Akazia há ká Ziida kuóro isi mʋ́ Zizirayɛl rʋ́ʋ́ nóú, bee wɩ́ɛ́, ʋ faá ná wɩɩla wérí.7 Akazia há mʋ́ɛ́ rʋ́ʋ́ ná Zoramɛ, Wɩɩsɛ tɩ́ŋ ɛ́ mɛ́ rʋ́ʋ́ zɔ́kʋ́. Ʋ há mʋ́ɛ́ pérí, ʋ rɩ́ Zoramɛ lɩ́ɔ́ céŋ Nimisi bio Zehu ŋmɛ́nɔ mɛ́. Nyuutɩna Wɩɩsɛ lɩ́sɛ Zehu rʋ́ʋ́ dí kuorí, ká rʋ́ʋ́ tɩ́ŋʋ́ mɛ́ a zɔkɛ Akaabɛ jaa. 8 Tɛ́ŋ ná mɛ́, Zehu háá yo Akaabɛ jaa nɩɛ, ʋ ná Ziida sɩ́dííre arɩ́ Akazia maábináŋa bɛlɛ ná há tʋ́mɛ́ aá pá kuóro, ʋ ɓʋ́ʋ́sɩ́wɔ́. 9 Ahazia fɔ́ɔ́ mʋ́ féŋsí Samari mí, ɛ́ nɛ́ Zehu a ɓa ja a kánʋ́ a ko pɔ́ʋ́, ʋ a ɓa ɓʋ́ʋ́. A púú hu, bee wɩ́ɛ́ ɓa fa sɛ́: «Zozafa bio ná fa há já Nyuutɩna Wɩɩsɛ arɩ́rʋ́ sɩɛrʋ wuu nɛ́ ɛ́.»
Ahazia jaa mɛ́, nɛ́ŋ báá fa tó ráŋ a wólli kuorí aá dí.
Atali dí kuorí
10 Tɛ́ŋ ná mɛ́ kuóro Ahazia máá Atali há nóú rʋʋ bio sʋ́wɔ́, ʋ kenú tɩɩ rʋ́ʋ́ ɓʋ́ Ziida kuóro dunɩɛ wuu. 11 Amá Yosebatɛ há ká Kuóro toló, kéŋ Zʋasɛ há ká Akazia bio kuóro bɛlɛ ná ɓa háá já rɩ́wɔ́ ɓʋ́ʋ́sɛ sɩɛrʋ, a kánʋ́ rɩ́ bikannɔ a zʋʋ féŋsi Wɩɩsɛ jaa sɩɛrʋ, sɩɛ́rɩ́. Ɛ́ wɩ́ɛ́ Zosebatɛ há ká kuóro Zoramɛ toló, ká a vʋk'ɔɔsɔ Yehoyada háálɔ, a a Akazia natoló kéŋ Zʋasɛ féŋsi Atali sɩ́ɛ́ mɛ́, ʋ wʋ́ʋ́ ɓʋɛ́. 12 Ʋ rɩ́wɔ́ féŋsi Nyuutɩna Wɩɩsɛ jaa ná sɩɛrʋ bɩŋsɛ balgo. Ká Atali dídí kuorí tɔ́ɔ́ ná mɛ́ ɛ́ tɛ́ŋ mɛ́.