Sayul rɩ́rʋ́ bɛlɛ sʋʋ wɩ́ɛ́
31
1 Gibeya paalɔ nyúú, Filisiti nɩɛ yó Ɩzɩrayɛl nɩɛ. Ɩzɩrayɛl nɩɛ fá ɓallɛ sʋsɛ Gibeya paalɔ nyúú. 2 Filisiti nɩɛ kuó lɛrɛ Sayul rɩ́rʋ́ bɛlɛ; ɓa ɓʋ́ Zonataŋ, Abinadabɛ arɩ́ Malkisuwa, kuóro Sayul bɛlɛ. 3 Lal dúóró pá Sayul; túyoore kuó túkú mí, ʋ cel kɩ́ŋkáŋ ɓa sɩ́ɛ́. 4 Ɛ́ nɛ́ Sayul bʋl nɛ́ŋ ná há láálʋ́ lalyóórí cɩksɛ: >> Fókí tókowi a cɔ́kɩ́ŋ ɓʋ́, a makɛ rɩ́ pɛŋkɛnnɛ nyáŋ tɩ́náwa sɩ́ kó cɔ́kɩ́ŋ rɩ́ ɓʋ́ ká cícérmíŋ mí. >> Amá nɛrɔ ná há láálʋ́ cɩksɛ vɔ́ʋ́, bee wɩ́ɛ́ héwíŋ ɓɩzeno zʋ́ʋ́. Ɛ́ nɛ́ Sayul la tókowí ná, a kaa bɩ́rɛ cɔ́ŋsɛ tíé ká ɓal cúú daha, a ɓʋ́ʋ́ tɩɩ. 5 Nɛrɔ ná há láálʋ́ cɩksɛ há néí rʋʋ nyúútɩna sʋ́wɔ́, ʋ má púú tókowí cɔ́ŋsɛ tíé, a ɓal cúú daha, a ɓʋ́ʋ́ tɩɩ.. 6 Kuóro Sayul rɩ́rʋ́ bɛlɛ ná botoro sʋ́ʋ́ ɛ́ nɛ́, nɛrɔ ná háá láálʋ́ cɩksɛ rɩ́rʋ́ sóójiwa wuu sʋ́wɛ́ tápʋ́l balá nɛ́. 7 Ɩzɩrayɛl nɩɛ ná há mɩŋ paalɔ butuo cɔɔ nɔ́ŋɔ a rɩ́ fuo daarɛ́ cɔɔ nɩɛ náŋa há néí rɩ Ɩzɩrayɛl nɩɛ zʋ́ fɛ́ɩ́ ká Sayul rɩ́rʋ́ bɛlɛ sʋsɛ. Ɓa de fá ká tɔ́wɔ́ tɔ́nɛ, ɛ́ nɛ́ Filisiti nɩɛ mʋ́ ké ráŋ. 8 Ʋ cɩ́cʋɔ, Filisiti nɩɛ há mʋ́ɛ́ rɩ́wɔ́ wúlli sʋsɛ, ɓa ná Sayul a rɩ́rʋ́ bɛlɛ botoro há ɓállɛ́ sʋsɛ pɛ́ Gibeya paalɔ nyúú. 9 Ɓa cokí kuóro Sayul nyúú, a pɔ́ʋ́ lalyóórícɩksɛ. Ká a ɓa ka labár wero zʋʋ bʋl pá Filisiti tɔ́ɔ́ wuu rɩ́wɔ́ venni jɩɩsɛ sɩɛrʋ a bʋl pá nɩɛ. 10 Ɓa kéŋ kuóro Sayul lalyóórí cɩksɛ zʋʋ hé venni jaa mɛ́, ká púú lɛlɔ a ɓásɛ Bɛtɩsaŋ zeŋ nyúú. 11 Yabɛsɛ tɔ́ɔ́ nɩɛ ná há mɩ́ŋ Galaadɛ dɩtɩ́llɛ nɛ̃ Filisiti nɩɛ há á Sayul ɛ́. 12 Ɛ́ nɛ́ tɔ́ɔ́ ná baŋcɩpɩrtɩɩna isi zʋ ŋmɛ́nɔ a pi títaŋ ná wuu va a mʋ́ peri Bɛtɩsaŋ a kóri Sayul lɛlɔ arɩ́rʋ́ bɛlɛ lɛlɛ, tɔ́ɔ́ ná zeŋ nyúú, a kaa bɩrɛ ko Yabɛsɛ, ráŋ nɛ́ ɓa nyɩ́kwɔ́. 13 Ɓa pɔ́wɔ́ heŋgbele hé náŋá mɛ́ a hu Yabɛsɛ sɔ́ŋɛ tuu mʋ́l, ká vɔwɛ nʋɔ tápʋlɛ́ balpɛ.