4
1 Bʋazɛ mʋ́ cɛ́ dannʋɔ laka. Mʋɔ́ rɩ́ nɛrɔ ná há wo Riti yɔwɛ aá la, ʋ fa bʋ́lʋ́ wɩ́ɛ́, nɛ́ kúé aá daarɛ. Ɛ́ nɛ́ Bʋazɛ bʋ́lʋ́ rɩ́: «Tuu peri cɩ́ rɛ́ ɩ é ɓɩ́ŋ.» Ɛ́ nɛ́ ʋ tuu peri cɛ́. 2 Ɛ́ nɛ́ Bʋazɛ yɩ́rɛ tɔ́ɔ́ nɩhɩ́ɛ̃́sɛ fí, a sɩɛ́ bʋ́lwɔ́ rɩ́ bʋlɛ́: «Ɩ́ ké rɛ́.» Ɛ́ nɛ́ ɓa ké. 3 Ɛ́ nɛ́ ʋ sɩɛ́ bʋl nɛrɔ ná há wówó yɔwɛ aá la rɩ́ bʋlɛ́: «Nawomi há bɩ́rɛ́ lɛ́ Mowabɛ tíé ko, ʋ pí rá maábinɔ́ŋɔ Ɩlɩmɛlɛkɛ baka aá yɛ́llɛ nɛ́. 4 Ŋ có rɩ́ŋ hóú duosi pɛ́ɩ́, rɩ́ laa yɔwɛ; tɔ́ɔ́ nɩɛ sɩ́ɛ́, arɩ́ nɩhɩ́ɛ̃́sɛ nyáŋ sɩ́ɛ́, a makɛ rɩ́ ɓá a dáŋsɩ́ɛ́wa. Rɩ́ɩ́ nɛ́ có rɩ́ɩ́ lɔ́ɔ́ yɔwɛ, ɩ́ láá yɔwɛ; rɩɩ nɛ́ báá wɩ có má ɩ bʋl rɩ́ŋ zɩŋ ɛ́ mɛ́. Bee wɩ́ɛ́ ɩ nɛ́ ká dʋ́ŋdʋ́ʋ̃́ nɛrɔ ná há wóú yɔwɛ aá la. Ɩ har rɩ́ mɛ́, ŋ má nɛ́ báá wóú yɔwɛ aá la.» Ɛ́ nɛ́ báálɔ ná bʋl Bʋazɛ rɩ́ bʋlɛ́: «Ŋ sɩ́ yɔwɛ la.» 5 Ɛ́ nɛ́ Bʋazɛ sɛ́: «Tápʋl ná ɩ háá rɩ́ túŋ tíé ná meéwí pá Nawomi, ɩ sɩ́ pɛ́ ka Riti má, Mɔwabɛ tɩ́náwa toló ná bála há sʋ́wɛ́ ká tá, a makɛ rɩ́ ɛ́ tíé a ker a cɛ́ nɩtoó ná yɩr mɛ́.» 6 Ɛ́ nɛ́ báálɔ ná há wówó yɔwɛ aá la sɛ́: «Ŋ wʋ́ɔ́ wo yɔwɛ aá la ŋ tɩɩ mɛ́; ŋ dóé wɩ péré, láŋ nyúú mí, ŋ é wɩ wo.» 7 Tésíé mí fa, Ɩzɩrayɛl tɩ́náwa tíé mí, rɩ wɩ́ɩ́ wuu rí mʋ́ɛ́ tɩɩnɛ yɔwɛ lɛɛ mɛ́, ɛ́ rá má onni lenné mí, nɔ́ŋɔ́ fókú natɔwɔ nɛ́ pá nɔ́ŋɔ, a makɛ rɩ́ ɓá zɩŋ rɩ́ wɩ́ɩ́ ná bʋ́lɔ́ tenni rí. Ʋ ɛ́ ká sɩɛ́da rɛ́ Ɩzɩrayɛl tíé. 8 Nɛrɔ ná sɩɛ́ fa há tɛ yɔwɩlɛɛ, sɩɛ́ bʋl Bʋazɛ rɩ́ bʋlɛ́: «Yɔwɛ laa pɛ́ɩ́ tɩ́ɩ́.» Ká kánʋ́ natɔwɔ foki. 9 Ɛ́ nɛ́ Bʋazɛ sɩɛ́ bʋl nɩhɩ́ɛ̃́sɛ ná rɩ́ jamáŋ ná wuu rí bʋlɛ́: «Ɩ́ wuu zaa dí daŋsɩɛ́ rɩ́ŋ yɔ́wɔ́ la onni ná wuu há ká Ɩlɩmɛlɛkɛ rɩ́ kɩlɩzɔŋ rɩ́ Makɩlɔŋ onni, Nawomi nɛ́sɛ mɛ́. 10 Ɛ́ wɩ́ɛ́, Mɔwabɛ tɩ́náwa toló Riti, ʋ bála Makɩlɔŋ há sʋ́wɛ́ ká ta, ʋ má bɩ́rmɩ́ŋ háálɔ nɛ́. A makɛ rɩ́ŋ ja duo pɔ́ʋ́ ká rʋ́ʋ́ yɩr má sɩ́ yʋ́ksʋ́ ʋ dunɩɛ sɩɛrʋ. Ɩ́ zaa ká ɛ́ wɩ́ɛ́ wuu dáŋsɩ́ɛ́wa rɛ́.» 11 Jamáŋ ná wuu há cɛ́ dánnʋɔ, arɩ́ nɩhɩ́ɛ̃́sɛ ná wuu sɛ́: «Óó! Á ká dáŋsɩ́ɛ́wa. Rɩ́ Nyuutɩna Wɩɩsɛ a rɩ́ háálɔ́ né háá zʋ́ɩ́ jaa, de nɛ́ Rasɛl arɩ́ Leya; ɓa é wuu bɛllɛ sɔ́ Ɩzɩrayɛl jaa. Lo rí dóé nyɩɩsɛ Ifirati mɛ́. Ká lo ríí yɩr lɛ Beteleyɛmɛ mɛ́. 12 Rɩ́ duo ná Nyuutɩna Wɩɩsɛ háá rʋ́ tɩŋ háálɔ́ néé mí pɛ́ɩ́, de a rɩ́ɩ́ jaa nɛ́ Pere ná Tamaarɛ há lʋ́lɛ́ pá Ziida jaa.» 13 Bʋazɛ pi Riti ja ʋ bɩ́rmʋ́ háálɔ, ʋ rɩ́rʋ́ hé náŋá mɛ́. Ɛ́ nɛ́ Nyuutɩna Wɩɩsɛ a ʋ ka puo, a lʋl heŋbóle. 14 Ɛ́ nɛ́ háála bʋl Nawomi rí bʋlɛ́: «Bárka mɩŋ Nyuutɩna Wɩɩsɛ rɩ́, ʋ há lóé ɩ ná bála, ʋ wóllí pi aá ja, a makɛ rʋ́ʋ́ yɩr yɩ́rɛ Ɩzɩrayɛl tíé wuu mí. 15 Ɛ́ bio sɩ́ bɩrhɩ̃́ŋsɩ́ dʋma. Ʋ sɩ́ a nafará ɩ nɩɩnɛ́ sɩɛrʋ, rɩ́ɩ́ yéllú mí; bee wɩ́ɛ́, ɩ biháálɔ ná há cóí wɩ́ɛ́ nɩ́ lʋ́lʋ́. Ɩ biháálɔ ná kéŋ nyʋɔrɛ́ pɛ́ɩ́ kɩ́llɛ bibáála balpɛ.» 16 Ɛ́ nɛ́ Nawomi pi bio ná hóó sáma mɛ́, a nɛ́ bɩ́rmʋ́ bíbello. 17 Ʋ kénni náŋa sɛ́: «Nawomi lʋ́l bio.» Ká sɩɛ́ hóú yɩr Ɔbɛdɛ. Ʋ nɛ́ ká Davidi áná Izayi má áná. 18 Ná Péré duo há vá ɛ́: 19 Péré lʋ́l Ɛtɩsɩrɔŋ, Ɛtɩsɩrɔŋ má lʋl Ramɛ, Ramɛ má lʋl Aminadabɛ má lʋl Nakɩsɔŋ; 20 Nakɩsɔŋ má lʋl Salmɔŋ. 21 Salmɔŋ má lʋl Bʋazɛ, 22 Bʋazɛ má lʋl Obɛdɛ; Obɛdɛ má lʋl Izayi. Ɛ́ nɛ́ Izayi má lʋl Davidi.