Wɩɩsɛ jaa cáŋsɛ wɩ́ɛ́
8
1 Nyuutɩna Wɩɩsɛ bʋ́l Moyizi rɩ́ a bʋlɛ́: 2 «Bʋl Aarɔŋ rɩ́ bʋlɛ́: ‹Tɛ́ŋ ná mɛ́ ɩ há sɩ́ sakɛ cáŋsɛ ná bálpɛ, ɓa pʋmmɔ mɔhɔ̃́ rʋ́ʋ́ caasɛ cáŋdaa ná sɩ́ɛ́ nɛ́.›» 3 Aarɔŋ tʋŋ ɛ́; a sakɛ cáŋsɛ ná cáŋdaa ná sɩ́ɛ́, anɛ ɛ́ Nyuutɩna Wɩɩsɛ fa mákɛ́ pá Moyizi. 4 Ná ɛ́ ná ɓa há a cáŋdaa ná: a de pɔ́ʋ́ naasɛ mɛ́ ká zɛ́ yakʋ́ fɩ́ɩ́la mɛ́, salmɛ gulí ní ɓa pii lúkú, anɛ ɛ́ Nyuutɩna Wɩɩsɛ fa há makɛ́ pá Moyizi.Levitiwa bilé
5 Nyuutɩna Wɩɩsɛ bʋ́l Moyizi rɩ́ bʋlɛ́: 6 «Lɩsɛ Levitiwa Ɩzɩrayɛl nɩɛ sɩɛrʋ, a mʋ́ʋ́rɩ́wɔ́ busunnu. 7 Ná ɛ́ ná há mɔhɛ̃́ rɩɩ́ mʋ́ʋ́rɩ́wɔ́: mɩ́sɛ mʋ́ʋ́rɛnyii* héwó mí, (ɓa wɩ́bɔma yɩr mɛ́); ká rɩ́wɔ́ pi nyúfʋnɛ́ fʋ́ŋwɔ́ tɛ́ŋpʋsɛ wuu, a sɛ́sɩ́wɔ́ gɛnnɛ́ ká mʋ́ʋ́rɩ́wɔ́ tɩɩ. 8 Ɓa sɩ́ ka nɔɓal ɓʋɔl, a a pálɔ ɓáfurótumíŋ ná ɓa há he nʋʋ ŋmʋsɛ; kaá ká nɔɓal ɓʋɔl nɔ́ŋɔ rʋʋ́ nɛ́ a wɩ́bɔma vʋk'ɔsɔ́. 9 Ɩ sɩ́ a rɩ́ Levitiwa tuuperi Cemejaa ná sɩ́ɛ́ ká rɩ́ a rɩ́ Ɩzɩrayɛl nɩɛ wuu hé náŋá mɛ́. 10 Ɩ sɩ́ a rɩ́ Levitiwa ná tuuperi Nyuutɩna Wɩɩsɛ sɩ́ɛ́, ká rɩ́ Ɩzɩrayɛl nɩɛ páwɔ́ nɛ́ŋsa sakɩ́wɔ mɛ́. 11 Aarɔŋ sɩ́ píwó pá Nyuutɩna Wɩɩsɛ rɩ́wɔ́ a Ɩzɩrayɛl nɩɛ pálɔ, rɩ́ Nyuutɩna Wɩɩsɛ tɩllwɔ́, ʋ tʋtʋmɛ́ yɩr mɛ́. 12 *Levitiwa sɩ́ páwɔ́ nɛ́ŋsa sakɛ nɛsɛ ná nyúnni mí; ká rɩ́ɩ́ ka nɔ́ŋɔ ɔsɛ wɩ́bɔma vʋk, ká ka nɔ́ŋɔ ɔsɛ vʋkfísi a páŋ Nyuutɩna Wɩɩsɛ, a tɩŋ ɛ́ mɛ́ mʋ́ʋ́rɛ Levitiwa busunnu. 13 Ɩ sɩ́ a rɩ́ Levitiwa isi cɛ́ daha Aarɔŋ rɩ́rʋ́ bɛlɛ sɩ́ɛ́, ká rɩɩ́ píwó pá Nyuutɩna Wɩɩsɛ rʋ́ʋ́ tɩ́llɩ́wɔ́. 14 Lɩsɛ Levitiwa Ɩzɩrayɛl nɩɛ sɩɛrʋ a bílwó dʋŋɔ, rɩ́ŋ tɩllɩwɔ́. 15 Ɛ́ har mɛ́, Levitiwa sɩ́ ko aá tʋŋ Wɩɩsɛ jaa tʋtʋmɛ́. Nyɛ nɛ́ ɩ sɩ́ mʋ́ʋ́rɩ́wɔ́ ká píwó páŋ rɩ́ŋ tɩ́llɩ́wɔ́. 16 Bee wɩ́ɛ́ Ɩzɩrayɛl nɩɛ sɩɛrʋ, ɓa nɛ́ ŋ lɩ́sɛ a tɩ́llɩ́wɔ́ ɓóŋ. Ɓa nɛ́ ŋ lɩ́sɛ rɩ́wɔ́ la Ɩzɩrayɛl nɩɛ wuu dʋŋdʋ́ʋ̃́ bɛlɛ gbel. 17 Bee wɩ́ɛ́ Ɩzɩrayɛl nɩɛ bihɔ̃́ é wuu káŋ nɛ́ tʋ́ʋ̃́, nɩbííne rɩ́ pʋsɛ wuu sɩɛrʋ; a kaa pɔ́ kal ná ŋ há ɓʋ́ʋ́sɛ Ezipiti tɩnawa bihɩɛ̃́sɛ wuu, ŋ lɩ́sɩ́wɔ́ tá a páŋ tɩɩ. 18 Ŋ lɩ́sɛ Levitiwa nɛ́ rɩ́wɔ́ la Ɩzɩrayɛl nɩɛ bihɩɛ̃́sɛ wuu gbel. 19 Ŋ píwó pá Aarɔŋ rɩ́rʋ́ bɛlɛ nɛ́, Ɩzɩrayɛl nɩɛ sɩɛrʋ, rɩ́wɔ́ tʋtʋŋ Ɩzɩrayɛl nɩɛ yɩr mɛ́, céme táŋtɛjaa ná sɩɛrʋ, a mʋ́mʋ́ʋ́rɛ Ɩzɩrayɛl nɩɛ busunnu, a makɛ rɩ́wɔ́ tɩɩ sɩ́ túúperi Wɩɩsɛ dɩmɩnɩ́ ná rɩ́ wɩhála oro wuu péríwó.»
20 Moyizi rɩ́ Aarɔŋ arɩ́ Ɩzɩrayɛl nɩɛ ná wuu tʋŋ ɛ́ ná tɩɩ, Nyuutɩna Wɩɩsɛ há mákɛ́ pá Moyizi, a tɩɩnɛ Levitiwa. 21 Levitiwa mʋ́ʋ́rɩ́wɔ́ tɩɩ, a sɛ́sɩ́wɔ́ gɛnnɛ; Aarɔŋ píwó pá Nyuutɩna Wɩɩsɛ rʋ́ʋ́ tɩ́llɩ́wɔ́, ká mʋ́ʋ́rɩ́wɔ́ wɩ́bɔmɔ rɩwɔ́ busunnu. 22 Ɛ́ har mɛ́, Levitiwa púló tʋ́tʋ́ŋwɔ́ tʋtʋmɛ́ céme táŋtɛjaa ná sɩɛrʋ, ká Aarɔŋ rɩ́rʋ́ bɛlɛ sɩɛ́ bíbélwó mí, anɛ ɛ́ Nyuutɩna Wɩɩsɛ há mákɛ́ pá Moyizi, a mʋ́ tɩ́ɩ́nɛ Levitiwa mɛ́.
23 Nyuutɩna Wɩɩsɛ bʋl Moyizi rɩ́ bʋlɛ́: 24 «Nóú ná Levitiwa há sɩ́ a: a pɔ́ bɩŋsɛ mɛrɛ́ rɩ́ bɔmmʋ́ɔ́ káá mʋ́, Leviti wuu mɔhɔ̃́ rʋ́ʋ́ púl tʋtʋmɛ́ céme táŋtɛjaa ná sɩɛrʋ. 25 A mɔ́ bɩŋsɛ mɛɛ́sɛllɛ rɩ́ fí mí, ʋ sɩ́ tá tʋtʋmɛ́ a báá sɩ́ tʋ́mʋ́. 26 Ʋ sɩ́ sáŋʋ́ maábináŋa ha há mɩŋ tʋtʋmɛ́ mɛ́ céme táŋtɛjaa ná sɩɛrʋ, amá ʋ tɩɩ báá wɩ tʋtʋmɩ́ kené ráŋ. Nyɛ nɛ́ mɔhɛ̃́ rɩ́ɩ́ tʋŋ a mʋ́ tɩɩnɛ Levitiwa ná há mɩŋ tʋtʋmɛ́ sɩɛrʋ.»