LƖƖ 32

Salmɛ nɔwie wɩ́ɛ́

1 Ɩzɩrayɛl jamáŋ ná nó rɩ Moyizi dáánʋ́ rɛ́ paalɔ ná nyúú ká waá tuwi; ɛ́ nɛ́ jamáŋ ná mʋ́ ciki Aarɔŋ laka a bʋ́lʋ́ rɩ́ bʋlɛ́: <<Isi daha, a bɩrmɛ wɩɩsɛ párá, rʋ́ʋ́ káŋrá aá va, bee wɩ́ɛ́ báálɔ né, Moyizi né há lɩ́sɩ́rá Ezipiti tɔ́ɔ́ mɛ́, á wɩ wɩ́ɩ́ ná há púú ɛ̃.>> 2 Aarɔŋ sɛ́: <<Ɩ́ kúóríwa háála rɩ́rɩ́wa bɛlɛ salmɛ dɩmmɛ́ŋsɛ a kaa ko páŋ.>> 3 Ɩzɩrayɛl nɩɛ wuu ɓɩɛ́na lɩ́sɩ́wɔ́ salmɛ dɩmmɛ́ŋsɛ a pá Aarɔŋ. 4 Ʋ lɔ́wɔ́ ɓa nɛ́sɛ mɛ́, a mɩ́ɛ́rɛ a cʋɔrɛ salmɛ nɔwie. Ɛ́ nɛ́ ɓa sɛ́: <<Ɩzɩrayɛl! Néí wɩɩsɛ ná há lɩ́sɩ́ ɩ lɛ Ezipiti tɔ́ɔ́ mɛ́.>> 5 Aarɔŋ há ná ɛ́, ʋ má vʋk'ɔ́ɔ́sɩ́koro oŋcʋɔrɩ́ ná sɩ́ɛ́, ká cáási bʋlɛ́: <<Cana mɩ́nɔ́ cíé, Nyuutɩna Wɩɩsɛ yɩr mɛ́!>> 6 Tɔ́ɔ́ pʋl cɩ́cʋɔ fól, jamáŋ ná sɩɛ́ ɓʋ́ʋ́sɛ pʋsɛ a físi, ká ɓʋ́ʋ́sɛ náŋa a ɔsɛ tɛŋfɩ́ɛ́l vʋka. Jamáŋ ná sɩɛ́ ké rɩ́wɔ́ dí a nyɔ, ká isi jʋɔsɛ.

7 Nyuutɩna Wɩɩsɛ bʋl Moyizi rɩ́ bʋlɛ́: <<Tuwi kɩ́kɛ́lɛ́; ɩ nɩɛ ná ɩ há ɛ́ɛ́ ɓa lɛ Ezipiti tɔ́ɔ́ mɛ́, ɓa zɔ́kwɔ́ tɩɩ. 8 Ɓa wáárɔ́ tá ŋmɛ́nɔ ná ŋ há mákɛ́ pɔ́wɔ́; ɓa cʋ́ɔ́rɛ́ nɔwie, a ɓírmú sɩ́ɛ́ a ɓʋ́ʋ́sɛ pʋsɛ a ɔ́sʋ́ ká bʋlɛ́: <Ɩzɩrayɛl! Néí wɩɩsɛ ná há lɩ́sɩ́ ɩ lɛ Ezipiti tɔ́ɔ́ mɛ́.>>> 9 Nyuutɩna Wɩɩsɛ baa súúri bʋlɛ́: <<Ŋ nó rɩ jamáŋ né dɩlla háákɔ́. 10 Ɛ́ wɩ́ɛ́, lo rɩ́ŋ a wɩ́ɩ́: Ŋ sɩ́ dí cɔ́ɛ́ ɓa nyúú, a ɓʋ́ʋ́sɩ́wɔ́, ká a rɩ́ɩ́ duo a duzéní.>>

11 Moyizi jɛnnɛ Nyuutɩna Wɩɩsɛ, ʋ Wɩɩsɛ a bʋlɛ́: <<Beé rí tɛ ɩ dídí cɔwɩɩlɔ́ ɩ jamáŋ nyúú? Ɩ tɩɩ ra wɩ ɛ́ɛ́ ɓa lɛ Ezipiti tɔ́ɔ́ mɛ́ a tɩ́ŋɩ́ dóé ɓɩzeno mí arɩ́rɩ́ vadóé mí rí? 12 Rɩɩ tʋ́ŋ nyɛ, Ezipiti nɩɛ sɩ́ bʋlɛ́: <Ɩzɩrayɛl nɩɛ wɩɩla wɩ́ɛ́ nɛ́ Nyuutɩna Wɩɩsɛ a ɓa lɩ́rá tɔ́ɔ́ mɛ́; ʋʋ́ já rʋ́ʋ́ ɓʋ́ʋ́sɩ́wɔ́ pallɛ nyunni ní, a tókwó duo tíé nyúú.> Lo rí cɔ́ɛ́ tuwi; tá bɔ́ŋbɔ́ŋ ná ɩ fa háá já rɩ́ɩ́ pii tʋ́mɩ́ jamáŋ ná mɛ́. 13 Bɩ́ɩ́nɩ́ tʋtʋnna Abɩrahaŋ rɩ́ Ɩzakɛ arɩ́ Ɩzɩrayɛl wɩ́ɛ́, ɓa nɛ́ ɩ tɩɩ tá nʋɔ pá a bʋlɛ́: <Ŋ sɩ́ a rɩ́ɩ́wa duo nɩɛ pul anɛ bána nyúú caŋwʋllɛ. Tɔ́ɔ́ ná wɩ́ɛ́ ŋ há bʋ́lɛ́, ŋ sɩ́ púú pɛ́ɩ́wa duo nɩɛ rʋ́ʋ́ ɔ́wɔ́ liwe a de kaá mʋ́ wuu.>>> 14 Nyuutɩna Wɩɩsɛ ɓɩɛ́na cɩ́kʋ́ tɩɩ a lo bɔ́ŋbɔ́ŋ ná ʋ fa há bɩ́ɩ́nɛ́ rʋ́ʋ́ pii tʋ́ŋwɔ́ mɛ́.

15 Ɛ́ nɛ́ ká Moyizi lɛ paalɔ ná nyúú aá tuwi, a ka dɔ́wɩ́pɛ́rsɛ ná bɛllɛ ʋ nɛ́sɛ mɛ́; ɛ́ dɔ́wɩ́pɛ́rsɛ, Wɩɩsɛ kíŋse ná nɛ́ pʋ́ŋsɩ́wɔ́ daha, oro wuu, ʋ cɔrʋ ná wuu bɛllɛ mɛ́. 16 Wɩɩsɛ nɛ́ pɛ́rsɛ ɛ́ dɔ́wʋ́ɔ́, Wɩɩsɛ tɩɩ nɛ́sɛ nɛ́ pʋ́ŋsɩ́wɔ́ daha má. 17 Zozie há nɛ́ jamáŋ ná cááse, ʋ bʋ́l Moyizi rɩ́ bʋlɛ́: <<Lal cááse ní púl mí.>> 18 Ɛ́ nɛ́ Moyizi sɛ́: <<Bɩbar cááse rá, pʋɔla cááse má rá. Ŋ nɩ́ɩ́ mɛ́, yɩɩla nɛ́ ɓaá yɛ.>> 19 Ɓa há kúé peri púl ná, ɓa ná nɔwie ná arɩ́ jamáŋ ná háá gɔ gʋɔla. Moyizi cɔ́ɛ́ há wɩ́ɛ́ daarɛ, ʋ víkí dɔ́wɩ́pɛrwɛrɛ́ ná ɓa ɓallɛ céŋŋi paalɔ ná tɩŋa. 20 Kɔ́ʋ́ mʋ́ fʋ́ʋ́rɛ nɔwie ná ɓa há cʋ́ɔ́rɛ́, a pii hé níŋ mí, a lɩ́sɛ gɛrɛ kʋ́nʋ́nʋ́, a pii mɩɛsɛ nyii nyúú, ká a Ɩzɩrayɛl nɩɛ nyɔ. 21 Moyizi bɔsɛ Aarɔŋ bʋlɛ́: <<Jamáŋ né ɛ́ɩ́ beé, a mɔ rɩ́ɩ́ yíkwó hé wɩ́bɔŋzenó né duo sɩɛrʋ?>> 22 Aarɔŋ sɛ́: <<Ŋŋ́ sʋ́lɩ́, sɩ́ cɔ́ɛ́ dí! Ɩ tɩɩ ɛ̃ jamáŋ né rí, ɓa lʋ́ŋ bɔ́ŋbɔ́ŋ ɛɛ mɛ́. 23 Ɓa kúó bʋ́lɩ́ŋ rɩ́ bʋlɛ́: <Bɩrmɛ wɩɩsɛ párá, rʋ́ʋ́ káŋrá aá va, bee wɩ́ɛ́ báálɔ né, Moyizi né há lɩ́sɩ́rá Ezipiti tɔ́ɔ́ mɛ́, á wɩ wɩ́ɩ́ ná há púú ɛ̃.> 24 Ŋ bʋ́lwɔ́ rɩ́ bʋlɛ́: <Áŋwa rɛ́ kéŋ salmɛ, ɩ́ kuori ko.> Ɓa kúóríwó dɩlla mɛ́ a kaa ko páŋ. Ŋ laa mɩ́ɛ́rɛ níŋ mí, nɔwie de ko lɛ.>>

25 Moyizi nó rɩ Aarɔŋ tá jamáŋ ná ɓa tʋ́tʋ́ŋwɔ́ satɔrɔ́, a báá to óŋ wuu ɓa dɩŋdɔmɔ sɩ́ɛ́ mɛ́. 26 Ɛ́ nɛ́ Moyizi isi mʋ́ cɛ́ púl ná dɩtɩŋzʋʋlɩ́ ká bʋlɛ́: <<Nɩɛ ná há mɩŋ Nyuutɩna Wɩɩsɛ har, ɩ́ kóŋ rɩ́!>> Levi bɛlɛ wuu ko ciki a kílú. 27 Ʋ bʋ́lwɔ́ rɩ́ bʋlɛ́: <<Nyuutɩna Wɩɩsɛ, Ɩzɩrayɛl Wɩɩsɛ sɛ́: <Nɛrɔ wuu púú tókowí hóú tɩŋa; ɩ́ zʋ púl ná sɩɛrʋ a dɛŋŋɛ dánnʋ́ɔ́wa a ɓʋ́ʋ́sɩ́wa maábináŋa, ɩ́ naŋnɔ́ŋsɛ, ɩ́ nɩtɩ́náwa, a mʋ́ yakɛ púl ná tóko.>> 28 Levi bɛlɛ tʋŋ ɛ́ Moyizi há mákɛ́, a ɓʋ́ʋ́sɛ nɩɛ jamáŋ ná sɩɛrʋ a peri bʋ́ɩ́toro ɛ́ kal. 29 Moyizi sɛ́: <<Zaa, Nyuutɩna Wɩɩsɛ bílíwa rɩ́wa tʋ́tʋ́mʋ́ mɛ́, bee wɩ́ɛ́ ɩ́ sáŋɔ́ a ɓʋ́ʋ́sɩ́wa bɛlɛ ɛ́ rá má ɩ́ maábináŋa. Rɩ́ Nyuutɩna Wɩɩsɛ héíwa nyúú bárka zaa.

Moyizi sʋ́l Wɩɩsɛ rʋ́ʋ́ hé Ɩzɩrayɛl suúri

30 Tɔ́ɔ́ pʋl Moyizi bʋl jamáŋ ná rɩ́ bʋlɛ́: <<Ɩ́ á wɩ́ɩ́ ná há bɔ́mɔ́ kɩ́ŋkáŋ. Ŋ sɩɛ́ sɩ́ bɩrzɛ́ paalɔ ná nyúú, Nyuutɩna Wɩɩsɛ rɩ́, a sʋ́lʋ́, rɩɩ́ gbé ʋ sɩ́ héíwa suúri.>> 31 Moyizi ɓɩɛ́na bɩrmʋ́ Nyuutɩna Wɩɩsɛ rɩ́ a bʋlɛ́: <<Óó, Nyuutɩna Wɩɩsɛ! Jamáŋ né á wɩ́ɩ́ ná há bɔ́mɔ́ kɩ́ŋkáŋ; ɓa bɩ́rmɛ́ salmɛ wɩɩsɛ pɔ́wɔ́ tɩɩ. 32 Ŋ sɩɛ́ jɛ́nnɩ́, héwó suúri! Rɩ ɛ́ rá, ɩ dʋ́sɩ́ŋ yɩr ɩ hiɛ̃só kɛnɔ ná ɩ há pʋ́ŋsɛ́ sɩɛrʋ.>> 33 Nyuutɩna Wɩɩsɛ bʋl Moyizi rɩ́ bʋlɛ́: <<Nɛrɔ ná há ɛ́ɛ́ zɔ́kɩ́ŋ mɛ́, ʋ yɩr nɛ́ rɩ́ŋ dʋ́sɩ́ŋ kɛnɔ sɩɛrʋ. 34 Ɩ é ha mʋ́, a tɩɛsɛ jamáŋ ná mʋ́ ráŋ ná ŋ há mákɛ́ pɛ́ɩ́. Ná, ŋ malɩ́ka sɩ́ lɛ́ɩ́ sɩ́ɛ́ a kánɩ́ va. Amá arɩ́ ɛ́ wuu, kal nɔ́ŋɔ ŋ sɩ́ bɛ́ŋsɩ́wɔ́ ɓa wɩ́bɔmɔ ná wɩ́ɛ́.>> 35 Ɛ́ nɛ́ Nyuutɩna Wɩɩsɛ ɓɩɛ́na bɛŋsɛ jamáŋ ná, ɓa há ɛ́ɛ́ Aarɔŋ bɩrmɛ nɔwie pɔ́wɔ́ ná wɩ́ɛ́.