Zakɔbɛ ísó mʋ́ Ezipiti tíé
46
1 Zakɔbɛ ná ɓa háá yɩ́rɛ Ɩzɩrayɛl ísó zʋ ŋmɛ́nɔ arɩ́rʋ́ nɛ́sɛ oŋkanɛ́ wuu, aá mʋ́ Ezipiti tíé. Ʋ há mʋ́ɛ́ peri Bɛɛrɩsɩba, ʋ ɔ́sɛ́ vʋka pɔ́ʋ́ áná Ɩzakɛ Wɩɩsɛ kal oro. 2 Ɛ́ kal tɩ́taŋ, Wɩɩsɛ tɩŋ duose mí, a bʋl wɩ́ɛ́ pɔ́ʋ́. Ʋ yɩ́rʋ́ bʋlɛ́: <<Zakɔbɛ! Zakɔbɛ!>> Zakɔbɛ sɛ́: <<Néŋ ní!>> 3 Ɛ́ nɛ́ Wɩɩsɛ sɛ́: <<Ŋ nɛ́ ká Wɩɩsɛ, ɩ áná má Wɩɩsɛ. Sɩ́ Ezipiti tuwé héwíŋ fá, bee wɩ́ɛ́ ráŋ nɛ́, rɩ́ŋ a rɩ́ɩ́ dunɩɛ pul kɩ́ŋkáŋ. 4 Ŋ tɩɩ nɛ́ sɩ́ kánɩ́ tuwi Ezipiti, ká nɛ́ baa kánɩ́ lɛ Ezipiti mí. Ɩ sʋʋ mɛ́, Zɔzɛfɛ tɩɩ nɛ́sɛ nɛ́ sɩ́ tɩ́ksɩ́ sɩ́ɛ́ tɔ́.>> 5 Zakɔbɛ isi Bɛɛrɩsɩba mɛ́.Ʋ bɛlɛ sɩɛ́ púú, a pɔ́wɔ́ háála rɩ́wɔ́ bɛlɛ wuu hé tórkowa ná Faarɔŋ há tɛ́ɛ́ rɩ́wɔ́ zʋʋ ko sɩɛrʋ, ɓa col. 6 Ɓa pɔ́ɔ́ kɛ́sɩ́wɔ́ pʋsɛ, a pɔ́wɔ́ ɓɩɛ ná wuu, ɓa há tʋ́mɛ́ ná Kanaŋ tíé. Ɛ́ ná nɛ́ Zakɔbɛ rɩ́rʋ́ duo wuu mʋ́ Ezipiti: 7 ʋ rɩ́rʋ́ bɛlɛ rɩ́rʋ́ tolé arɩ́rʋ́ nihẽ, báála rɩ́ tolé wuu. Ʋ duo nɛrɔ é wuu tɩ́ŋʋ́ mɛ́, ɓa tuwi Ezipiti tíé.
8 Zakɔbɛ rɩ́rʋ́ duo nɩɛ ná há túwí Ezipiti, ʋ bɛlɛ rɩ́rʋ́ nihẽ ní. Nówó yɩra:
Ribaŋ nɛ́ ká Zakɔbɛ bihɔ̃́. 9 Ribaŋ bɛlɛ nɩ́ ká: Hɩnɔkɛ, Paalu, Hɛtɩsɩrɔŋ rɩ́ Karmi. 10 Sɩmɩyɔŋ bɛlɛ nɛ́ ká: Yɩmʋɛl, Yamiŋ, Ohadɛ, Yakiŋ, Sʋharɛ rɩ́ Kanaŋ tɩ́náwa toló bio Sawul. 11 Levi bɛlɛ nɩ́ ká: Gɛrsɔŋ, Kɩhatɛ rɩ́ Merari. 12 Ziida bɛlɛ nɩ́ ká: Ɛrɛ, Onaŋ, Seela, Pɛrɛsɛ rɩ́ Zera; amá Ɛrɛ rɩ́ Onaŋ sʋ́sɛ́, Kanaŋ tíé ní. Pɛrɛsɛ bɛlɛ nɛ́ ká: Hɛtɩsɩrɔŋ rɩ́ Hamul. 13 Ɩsakaarɛ bɛlɛ nɛ́ ká: Tola, Puva, Yɔbɛ rɩ́ Sɩmɩrɔŋ. 14 Zabɩlɔŋ bɛlɛ nɛ́ ká: Sɛrɛdɛ, Eloŋ rɩ́ Yahɩlɛl. 15 Bɛlɛ ná Leya há lʋ́lɛ́ pá Zakɔbɛ Mezopotami mí ní ɛ́, a sɩɛ́ píwó nátoló Dɩɩna súúri. Ʋ bɛlɛ rɩ́rʋ́ tolé wuu há hé náŋá mɛ́, ɓa nɛ́ nɩɛ mɛrɛ́ rɩ́ fí rí botoro.
16 Gaadɛ bɛlɛ nɛ́ ká: Tɩsɩfɩɔŋ, Haagi, Suuni, Ɩsɩbɔŋ, Eri, Arodi rɩ́ Areli. 17 Asɛrɛ bɛlɛ nɩ́ ká: Yɩmɩna, Yɩsɩva, Yisivi rɩ́ Beriya; a píwó nátoló Sera. Beriya bɛlɛ nɛ́ ká: Hɩbɛrɛ rɩ́ Malɩkɩɛl. 18 Bɛlɛ ná Zilpa há lʋ́lɛ́ pá Zakɔbɛ nɩ́ ɛ́. Zilpa ná Labaŋ há píé pɔ́ʋ́ toló Leya, ʋ ɔ́ʋ́ dudoo nɛ́ lʋ́lwɔ́. ɓa wuu ní fí rí balgo.
19 Zakɔbɛ háálɔ Rasɛl bɛlɛ nɛ́ ká: Zɔzɛfɛ rɩ́ Bɛŋzamɛ. 20 Zɔzɛfɛ lʋ́l bɛlɛ bɛllɛ Ezipiti mí. ɓa nɛ́ ká: Manase rɩ́ Efirayiŋ. Ʋ rɩ́rʋ́ háálɔ Potifera toló Asɩnatɛ nɛ́ lʋ́lwɔ́. Potifera ná há ká Ɔŋ tɩ́náwa vʋk'ɔɔsɔ, ʋ toló ní.
21 Bɛŋzamɛ bɛlɛ nɛ́ ká: Bela, Bɩkɛrɛ, Asɩbɛl, Gera, Naamaŋ, Ehi, Rɔsɛ, Mupimi, Hupimi rɩ́ Ardɛ. 22 Bɛlɛ ná Rasɛl há lʋ́lɛ́ pá Zakɔbɛ nɛ́ ɛ́. ɓa wuu ní nɩɛ fí rí baná.
23 Daŋ bio ní ká Husimi. 24 Nɛfɩtalɩ bɛlɛ nɩ́ ká: Yatɩsɩɛl, Guuni, Yɛtɩsɛr rɩ́ Siilemi. 25 Bila ná Labaŋ há píé pɔ́ʋ́ toló Rasɛl ʋ kaa mʋ́ dɔwɛ, ʋ bɛlɛ nɛ́ ɛ́, ʋ lʋl pá Zakɔbɛ. ɓa wuu ní nɩɛ balpɛ.
26 Zakɔbɛ jaa nɩɛ, ɓa ná há tɩ́ɩ́nʋ́ mɛ́, a tɩ́ŋʋ́ mɛ́ tuwi Ezipiti, ɓa wuu ní nɩɛ mɛɛ́sɩbotoro rɩ́ balgo, ká Zakɔbɛ biháála wɩ́ɛ́ to ráŋ. 27 Zɔzɛfɛ bɛlɛ ná ʋ há lʋ́l Ezipiti mí ní nɩɛ bɛllɛ. Zakɔbɛ jaa nɩɛ ná wuu há túwí Ezipiti ní, nɩɛ mɛɛ́sɩbotoro rí fí.
28 Zakɔbɛ tʋŋ Ziida rʋ́ʋ́ lɔ́ʋ́ sɩ́ɛ́, a mʋ́ bʋl Zɔzɛfɛ mɛ́, rʋ́ʋ́ isi kɛ́rʋ́ Gosaŋ mɛ́. Zakɔbɛ rɩ́rʋ́ nɩɛ há kúé aá saasɛ Gosaŋ, 29 Zɔzɛfɛ ɔ́ɔ́ ɓa bɩ́rmʋ́ záka rɩ́rʋ́ tórko pɔ́ʋ́, ʋ zɛ́, a mʋ́ Gosaŋ, a cémú áná Zakɔbɛ. Zɔzɛfɛ há dé yo sɩ́ɩ́ nóú ní, ká ʋ há vɔ́wʋ́ baŋ mɛ́; ʋ vɔ́wʋ́ baŋ mɛ́ ɛ́ nɛ́ ká wi, a dáánɛ. 30 Zakɔbɛ sɩɛ́ bʋl Zɔzɛfɛ rɩ́ bʋlɛ́: <<Sɩ́sɛ́nyɛ, ŋ wúóló aá sʋwɛ, bee wɩ́ɛ́ ŋ há bɩ́rɛ́ néí, rɩɩ haá híẽ́sú.>> 31 Ká Zɔzɛfɛ sɩɛ́ bʋl pɔ́ʋ́ mááláwa ná arɩ́rʋ́ áná jaa nɩɛ ná bʋlɛ́: <<Ŋ sɩ́ mʋ́ hé duosi pá Faarɔŋ, ká bʋlɛ́: ŋ mááláwa rɩ́rɩ́ŋ maábɛlɛ arɩ́rɩ́ŋ áná jaa nɩɛ ná fa há mɩŋ Kanaŋ tíé, ɓa nɛ́ kóŋ rɩ́. 32 Ɛ́ nɩɛ sɩɛ́ ká penʋɔla rɛ́, pʋdɔɔra nɛ́; ɓa kéŋwó pʋwɩɛla rɩ́wɔ́ pʋzeŋsi ko, arɩ́wɔ́ nɛ́sɛ ɓɩɛ wuu. 33 Rɩ Faarɔŋ nɛ́ kúé yɩ́rɩ́wa rɩ́ɩ́ bɔ́sɩ́wa: <Beé tʋtʋmɩ́ rɛ́ ɩ́ tʋ́tʋŋ?> 34 Ɩ́ bʋl pɔ́ʋ́ bʋlɛ́: <Ɩ tʋtʋnna ká pʋdɔɔra nɛ́ á heŋbiíru mí wuu, a ko lɛ zaa; á ánáwa má faá tʋ́mʋ́ nɛ́.> Rɩɩ́wa nɛ́ bʋ́l ɛ́, ɓa sɩ́ pɛ́ɩ́wa ŋmɛ́nɔ rɩ́ɩ́wa kéníwa dʋŋɔ Gosaŋ dɩtɩ́llɛ, bee wɩ́ɛ́ Ezipiti tɩ́náwa bɛ́rɛ pʋdɔɔra kɩ́ŋkáŋ.>>