Mikpotongow si Panghuꞌ Isa sok Pitu Kotow Mulidin
21
Pokpuwas nituꞌ,
mikpotongow na sop si Isa song mga mulidin dituꞌ sok kilid Linow Tiberias,
bu mamaꞌ nini og hantangan nok pokpotongowin:
2 Migdunut si Simon Petros,
si Tomas nok poktawagon nok Kambal,
si Natanael nok tidu sok Kana sog bonuwa Jalil,
bu og duwaꞌ kotow nog bataꞌ ni Sebede bug len pa nog duwaꞌ kotow mulid.
3 Na tinaluan ni Simon Petros ong mga duma nin,
“Mangoyu pa momokot.”
Taluꞌ nong mga duma nin,
“Mogunut ami dinika.”
Dadi minangoy ilon sog linow bangka tulak,
sugaid sog gobi nituꞌ daꞌdun tokodoy ong mialap nilon.
4 Dangan doliꞌ-ondow na,
dituꞌ minindog si Isa sok kilid linow,
sugaid daꞌ yanin kindanoy nong mga mulidin.
5 Tinaluan ilon ni Isa,
“U mga gumbataꞌ,
ongon taꞌ ok sodaꞌ niyu?”
Ok tabal nilon,
“Daꞌdun.”
6 Taluꞌ ni Isa dinilon,
“Labuꞌ niyu ok pokot sog dapit lintu nog bolangoy niyu,
bu mokalap amu da.”
Dadi linabuꞌ nilon.
Na ondiꞌ nilon na mogaga botongon ok pokot sog diyalom bolangoy sabap sok kodakol nok sodaꞌ.
7 Tubus tinaluan si Petros nong mulid nok kolasahan ni Isa,
“Ok Panghuꞌ ma koyon!”
Dangan midongog ni Petros ok tinaluꞌ in,
sinolugin og juba nog linuwasin,
bangka yanin okpu sog linow.
8 Sugaid og duma nong mga mulid,
migbolangoy da posunguꞌ sok kilid.
Pigbotong nilon ok pokot nong miponuꞌ nok sodaꞌ,
poꞌ kanaꞌ da ilon molayuꞌ sok kilid.
Mga lima puluꞌ dopa da og layuꞌ nilon.
9 Dangan mikodongguꞌ na ilon,
mitongow nilon og baga nog gapuy nok piktitian nok sodaꞌ,
bu ongon da sop ok pan diyon.
10 Taluꞌ ni Isa dinilon,
“Pogoyit amu dini nok sodaꞌ nong mialap niyu.”
11 Dadi simakoy si Simon Petros sog bolangoy bangka yanin pogbotong nok pokot posunguꞌ sog doksaan.
Ok pokot koyon miponuꞌ nong mokoluksang nok sodaꞌ,
sogatus bu lima puluꞌ bu tolu og dakolin.
Tibuwa bisan maꞌ nituꞌ kodakol ok sodaꞌ,
daꞌ da kogodit ok pokot.
12 Taluꞌ ni Isa dinilon,
“Angoy amu dini poksoloman.”
Na daꞌdun song mga mulidin ong mokotowakkal moksak diyanin nog,
“Sima a?”
Kiosunan na nilon nog yanin ok Panghuꞌ.
13 Doksuꞌ inalap ni Isa ok pan bangka nin bogoyoy song mga mulidin sampoy ok sodaꞌ.
14 Na yonin kini og ikotolu pokpotongow ni Isa song mga mulidin pogdoksuꞌ in motubuꞌ puliꞌ.
Si Panghuꞌ Isa bu si Petros
15 Dangan midoksuꞌ na ilon moksoloman,
tinaluan ni Isa si Simon Petros,
“Simon,
bataꞌ ni Yahiya,
molasa a taꞌ dinakon tidu sok kodumahan nu kini?”
Tinumabal si Petros,
“Oo Panghuꞌ,
kiosunan nu nong molasa u dinika.”
Taluꞌ ni Isa diyanin,
“Ipat nu ong mga sukuꞌ u mamaꞌ nok kipat nok tow nog bilibili nin.”
16 Miksak na sop si Isa diyon ni Petros,
“Simon,
bataꞌ ni Yahiya,
molasa a taꞌ dinakon?”
Tinumabal si Petros,
“Oo Panghuꞌ,
kiosunan nu nong molasa u dinika.”
Taluꞌ pa ni Isa diyanin,
“Potontuloy nu mahatul ong mga sukuꞌ u.”
17 Na sinakan puliꞌ ni Isa si Petros sog ikotolu,
“Simon,
bataꞌ ni Yahiya,
molasa a taꞌ dinakon?”
Misusa si Petros poꞌ tolu kali na yanin sakoy ni Isa nog,
“Molasa a taꞌ dinakon?”
Dadi ok tabal ni Petros,
“Panghuꞌ,
kiosunan nu og lam nituꞌ,
kiosunan nu nong molasa u dinika.”
Taluꞌ ni Isa diyanin,
“Ipat nu ong mga sukuꞌ u.
18 Taluan ku ika,
ong motudin,
song masa nong mobataꞌ a pa,
ika tokodoy ok simolug nok ponapot nu bu minangoy sog ayin-ayin kolegan nu.
Sugaid bilaꞌ gumulanga na,
dopahon nu ok komot nu bug ikotan ka nog duma bu oyitonin ika sog ondiꞌ nu kolegan.”
19 Tinaluꞌ ni Isa ong mamaꞌ niyon bagun posunanin bug olo ok kobiyan nok kopatoy ni Petros mokpotongow nok kotas nok Tuhan.
Doksuꞌ taluꞌ ni Isa ni Petros,
“Pogunuta dinakon.”
20 Na limingoy si Petros bu mitongowin nong migunut ong mulid kituꞌ nok kolasahan ni Isa.
Ong mulid koyon ong mikpolani kituꞌ ni Isa sok poglabungan nilon tagnaꞌ bu miktaluꞌ,
“Panghuꞌ,
sima buwan ong monipu dinika?”
21 Dangan mitongow ni Petros ong mulid koyon,
sinakanin si Isa,
“Panghuꞌ,
olo ma sop ong mokobiyan diyanin?”
22 Tinabal yanin ni Isa,
“Bilaꞌ og legu motubuꞌ yanin toktob song mokpuliꞌ u dini,
olo ma dinika?
Pogunuta na hadja dinakon!”
23 Dadi tidu dituꞌ milatag ok suksugan song mga koilugan nog ong mulid koyon ondiꞌ matoy.
Tibuwa daꞌ poktaluꞌ si Isa nog diꞌ matoy ong mulid koyon,
sugaid tinaluꞌ in nog bilaꞌ og legin nong motubuꞌ ong mulid koyon toktob song mokpuliꞌ yanin dini,
olo ma koyon ni Petros.
24 Ong mulid koyon ong mikosaksiꞌ nong mga kokohinang kini bug miksulat dun,
bu kiosunan nami nong motud ok suksuganin kini.
25 Na modakol pa ong mga miinang ni Isa,
sugaid bilaꞌ sulaton ok kotanan sosolobuk,
na sog gantaꞌ u diꞌ bayuꞌ in moungod sog dunya ong mga Kitab nok sulatan nok pasal dun.
Wassalam