Pajã chiwidi mãik'aapa eujã chiwidi
21
1 Mãpai mùa unuji pajã chiwidi mãik'aapa eujã chiwidi, naapema pajã mãik'aapa eujã p'usa ome jõdarida perã. 2 Unuji p'uuru Tachi Ak'õrepa ichi–it'ee jùrùt'erada. Mãgà Jerusalén p'uuru chiwidi baai cheji ùt'ariipa, Tachi Ak'õre baparimãiipa. Pi–ia baji. Wêra chi–oo pi–ia jâparik'a miak'ãiit'ee pak'ãri, mãga pùk'a baji ma p'uuru. 3 Mãgá ak'ùmaa bùde ûriji ángel Ak'õre su–ak'ù beeparideepa golpe pedeeru:—Ârá Tachi Ak'õre bapari eperãarã t'ãide. Bapariit'ee eperãarã ome. Ichi p'uuru padait'ee. Tachi Ak'õre ichi k'ap'ùa bapariit'ee ãra ome mãik'aapa ãra Ak'õre pait'ee. 4 Ichia eperãarã tauba jõmaweda wêpapiit'ee. Mãùrã waa piuda–e pait'ee; waa jarajêeda–e pait'ee; waa p'ua sentida–e pait'ee, irua mãgee naawedapema ne–inaa jõmaweda wêpapiit'ee perã.
5 Mãpai chi su–ak'ù bùpa ma rey su–ak'ù beeparide mãgaji:
—Ârapù mùa ne–inaa jõma chiwidi papiit'ee.
Ichiaba mùmaa mãgaji:
—P'åji nãgà pedee, mùa wãarata jarapari perã.
Maap'eda mãgaji:
6 —Oojipù mùa k'îsia iru bada. Mùta Alfa; nejõmaata naa. Ichiaba mùta Omega; nejõmaata t'êe. Apida opisia nâbù pùrã, mùa pania pari teeit'ee eperãarã chok'ai p'anapipari, mãgà pania poátrù uchia bùdepema. Mãgà pania tok'ãri, ichita mù ome bapariit'ee. 7 K'achia p'oyaaparipa mãgà ne–inaa chiwidi jõmaweda iru bait'ee. Ma awara mùta iru Ak'õre pait'ee; jõdee iru mù warra pait'ee. 8 Mamîda waawee–idaa beerã mùde ijãadait'ee; ijãa amaarutaarã jõmaweda ijãadak'aa beerã ome; k'achia ooi awaa p'anùùrã; chîara peepataarã; p'ek'au oopataarã; jaipanaarã petau tau k'awaa beerã ome; ne–inaa juapa ooda k'îrapite ùt'aa t'âpataarã mãik'aapa jõmaweda seewa jarapataarã; mãgeerã p'ananadait'ee ma lagok'a t'ùpùtau azufre ome jêrajêraa jira bùde mãik'aapa t'êepema piuda apata mama piudait'eeda aji, ichita mãgá mù ik'aawaapa t'ùmà p'anapataadait'ee perã.
Jerusalén p'uuru chiwidi
9 Mãpai ángel mùmaa cheji. Mãgà angeleerã sieteerãpa vaso ne–inaa k'achiapa ipuru iru p'anadap'edaadepema paji. Mãgùpa mùmaa mãgaji:
—Chéji. Mùa ma Oveja Chak'e wêra pùmaa ak'ùpiit'eeda aji.
10 Ma k'ãimok'araa pùk'a bùde Tachi Ak'õre Jaurepa unupida mùmaa, mãgà angelpa mù ateeji ee ùt'ùa bù nok'odee. Mama p'anùde ichia mùmaa ak'ùpiji Tachi Ak'õre p'uuru jùrùt'erada, Jerusalén, baai cheru ùt'ariipa, Tachi Ak'õre baparimãiipa. 11 Ma p'uuru urua nâbaji Tachi Ak'õre k'îra wãreepa. Urua baji mãu pi–ia bëi–sãa jaspek'a. 12 Ma p'uuru t'ùak'au nâbaji muralla waibùa ùt'ùa bùpa. Aùde t'îupata doce paraaji. Ma t'îupata chaa ángel aba bainâ baji. Ichiaba ma t'îupata chaa Israeldeepa uchiadap'edaa ëreerã docedepema t'â aba p'ã baji. 13 Ma muralla i chaa t'îupata õpee–õpee p'anajida. Ak'õrejîru uchiapari eere t'îupata õpee paraaji; norte eere ichiaba; sur eere ichiaba; ak'õrejîru baaipari eere ichiaba. 14 Ma p'uuru t'ùak'au nâbada muralla edupema basa doce iru baji. Ma basa mãu pi–iadee ooda paji. Mãgà basa chaa ârù Oveja Chak'e ome nipapatap'edaarã doce t'âdepema t'â aba p'ã baji.
15 Ma ángel mùmaa pedee badapa pak'uru nêedee ooda juade atee wãji. Mãgùpa ma p'uuru chaamaa beeji; chi muralla, chi t'îupatamãi paara. 16 Ma p'uuru kuadria baji. Angelpa mãgà pak'urupa chaak'ãri, dos mil doscientos kilometrosa baji. Chi teesoo chi jobùa, chi ùt'ùa paara dos mil doscientos kilometros baji. 17 Ma muralla ichiaba chaaji. Sesenta y cinco metrob baji, eperãarãpa chaapatak'a, mãgá chaa bada perã ma angelpa.
18 Ma muralla mãu pi–ia jaspedee ooda paji. Chi p'uuru nêedee ooda paji; nêe pi–ia, maarepida nejarra wêe. Bëi–sãa baji vidriok'a. 19 Ma muralla basadepema mãu, mãu pi–ia ome p'oira baji; nãgee mãu pi–ia k'îra t'ãdoo, chi naapema basa mãu pi–ia jaspe ome; araarepema zafiro ome; omé eerepema ágata ome; õpee eerepema esmeralda ome; 20 k'îmari eerepema ónice ome; joisomaa eerepema cornalina ome; seis eerepema crisólito ome; siete eerepema berilo ome; ocho eerepema topacio ome; nueve eerepema crisoprasa ome; diez eerepema jacinto ome; once eerepema amatista ome. 21 Ma murallade t'îupata doce perla docedee ooda paji; t'îupata chaa perla abaadee. Calle jã nêedee ooda paji; nêe pi–ia, maarepida nejarra wêe. Bëi–sãa baji vidriok'a.
22 Mùa Tachi Ak'õre te unu–e paji ma p'uurude, Tachi Ak'õre Waibùa mama bapari perã ma Oveja Chak'e ome. Ãrata ma p'uurudepema tek'a, ãramaa ùt'ari p'anùùrãpa mama ichita ùt'aa t'âpataadait'ee perã. 23 Ma p'uurude p'anùùrãpa ak'õrejîru jêra wa atane âdaa faltada–e pait'ee, Tachi Ak'õre k'îra wãreepa jêrait'ee perã ma p'uuru ârù mãik'aapa ma Oveja Chak'e âdaait'ee perã lamparak'a. 24 Ma p'uuru âdaade na eujãdepemaarã k'îra t'ãdoo nipapataadait'ee mãik'aapa na eujãdepema reyrãpa ãchi net'aa pi–ia aneedait'ee ma p'uurudee, Tachi Ak'õremaa tee k'inia p'anadairã. 25 Ma murallade t'îupata jõmaweda ichita ewa nâbait'ee. Jâadak'aa pait'ee; mama p'ãrik'ua wê–e pait'ee perã. 26 Na p'ek'au eujãdepemaarãpa net'aa pi–ia iru p'anù aneedait'ee mãik'aapa Tachi Ak'õremaa teedait'ee. 27 Mamîda ma p'uurude ne–inaa k'achia apida unuda–e pait'ee. K'achia oopataarã apida mãik'aapa seewa jarapataarã apida mama unuda–e pait'ee. Aba unudait'ee Tachi Ak'õrepa t'â p'ãpidaarã Oveja Chak'e librode.