Satanás mil año jâa bada
20
1 Mãpai mùa unuji ángel ùt'ariipa baai cheru. Mãgùpa ma uria nãpùa bùdepema llave cadena choma bù ome iru baji ichi juade. 2 Ichia jita ataji mãgà je choma bù; mãgà chonaarãwedapema taama; Netuara Poro Waibùa maa–e pùrã Satanás apata. Ma cadenapa mãgà jâ nâbùji mil año wãyaaru misa. 3 Mãpai bat'at'aaji ma uria nãpùa bùdee. Jâa nâbùji ma llavepa mãik'aapa ma uria pia jâat'aaji apidaapa ewanaadamerã. Mãga ooji ma je choma bùpa na eujãdepemaarã waa k'ûranaamerã ma mil año wãyaaru misa. Aù t'êepai k'ena pëiit'ee, mak'ùara taarã–epai.4 Mãpai mùa unuji rey su–ak'ù beepari chok'ara. Tachi Ak'õrepa jaraji aùde su–ak'ù p'anadap'edaarãmaa reyrãk'a eperãarã ak'ùpataadamerã. Mãùrã ome unuji eperãarã jaureerã; chi otau t'ùap'edap'edaa awaraarãmaa jaradap'edaa perã Tachi Ak'õre Ûraa mãik'aapa Jesupa ooda eperãarã k'aripait'ee. Mãgùùrãpa ùt'aa t'âdak'aa paji ma nemîsiamaa maa–e pùrã ichi k'îrak'a bùmaa. Ichiaba mãgà tauchaa bùpidak'aa paji ãchi tau bùùrùde wa juade. Mãgùùrã chok'ai padaidap'eda, Cristo ome eperãarã ak'ùpachida reyrãk'a, ma mil año wãyaaru misa. 5 Ma chok'ai padaidaarã naapùara eperãarã p'irabaidap'edaa paji ichita chok'ai p'anapataadamerã. Apemaarã piudap'edaarã p'irabaidait'ee ma mil año jõrumaa. 6 O–îa p'anù Tachi Ak'õrepa awara bùdaarã ichideerã p'anadamerã. Mãùrãta naapùara chok'ai p'irabaidait'ee ichita p'anapataadait'ee. Atuada–e pait'ee. Ma k'ãyaara p'aareerã mimia oodait'ee Tachi Ak'õre–it'ee mãik'aapa Cristo–it'ee. Cristo ome ãrapa eperãarã ak'ùpataadait'ee reyrãk'a, ma mil año wãyaaru misa.
Satanás p'oyaada
7 Ma mil año wãyaap'eda, angelpa Satanás k'ena pëiit'ee ichi jâa badamãiipa. 8 Mãpai ichi uchiait'ee na p'ek'au eujã jõmaade, jõmaarã eujãdepemaarã k'ûrade. K'ûrait'ee Gog mãik'aapa Magog, ãchi soldaorã chip'edaidamerã jura chõodait'ee Tachi Ak'õredeerã ome. Ãchi soldaorã audú chok'ara p'anadait'ee, ipu tau nãusaa audú chok'ara paraaparik'a p'usa ide.
9 Mãgùùrã jîchoojida na eujãde mãik'aapa Tachi Ak'õredeerã wap'ùra #ata?jida; ichia p'uuru k'inia iru bù t'ùak'auda edajãde p'anadap'edaarã mãik'aapa taawa p'anadap'edaarã paara. Mamîda mãga bù misa, ùt'ariipa t'ùpùtau baai cheji ãchi ârù mãik'aapa ãchi k'iniidachida. 10 Mãpai Tachi Ak'õrepa Netuara Poro Waibùa, chi eperãarã k'ûradapa, bat'apit'aaji ma lagok'a t'ùpùtau azufre ome jêrajêraa jira bùdee. Mama ma nemîsia, ma ne–animal k'achia, chi seewa jarapari ome ichita miapi bapariit'ee, jõ–ee.
Rey su–ak'ù beepari waibùa t'orroo bù
11 Mãpai mùa unuji rey su–ak'ù beepari waibùa, t'orroo bù. Aùde Tachi Ak'õre su–ak'ù baji. Ichi k'îrapite na eujã mãik'aapa pajã wêpadachida. Maarepida unu–e paji ma nâbadamãi, wê–e pada perã. 12 Mãpai mùa unuji piudap'edaarã; waibùara beerã, ek'ariara beerã paara. Mãùrã bainâ p'anajida ma rey su–ak'ù beepari k'îrapite. Mãpai angeleerãpa librora ewat'ùjida. Ma librode ne–inaa jõma eperãarãpa oopatap'edaa p'ã baji. Awaraa libro ichiaba ewat'ùjida. Mãgùde Tachi Ak'õre ome ichita p'anapataadait'eerã t'â p'ã jêra baji. Tachi Ak'õrepa ma piudap'edaarãpa oopatap'edaa p'ãda mãik'aapa chok'ai p'anùùrã t'â p'ãda ak'ùji jarait'ee chisãgùùrã wãpii ichi truadee mãik'aapa chisãgùùrã atuapii. 13 Ma piudap'edaarã p'usadeepa p'irabai uchiajida. Piudap'edaarãmãiipa ichiaba uchiajida. Tachi Ak'õrepa ma piudap'edaarã jõmaarãpa ne–inaa oopatap'edaa ak'ùji jarait'ee pia wa k'achia. 14 Mãpai angeleerãpa k'achia beerã jõmaweda mãik'aapa piudap'edaarã p'anapatamãi bat'at'aajida ma lagok'a t'ùpùtau jêrajêraa jira bùdee. Maadamãiipa apida piuda–e paji. Mãgà lagok'a eperãarã piuda t'êepema apata. 15 Mamaa ichiaba bat'at'aajida jõmaweda t'â p'ã–ee beerã ma libro chok'ai p'anùùrã t'â p'ã jêra bùde.